استانا. 13 ءساۋىر. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ تۇركيا حولدينگتەرى مەن كومپانيالارىنىڭ باسشىلارىمەن كەزدەستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى.
كەزدەسۋگە تۇركيانىڭ Ulker Group, Turkuaz Group, Yildirim Group, Yildiz Holding, Akfel Holding, Aselsan Electronic, Acibadem سياقتى 25-كە جۋىق كومپانياسىنىڭ باسشىلارى قاتىستى.
اڭگىمە بارىسىندا ىنتىماقتاستىقتىڭ ءتۇرلى سالالارىندا بىرلەسكەن جوبالاردى جۇزەگە اسىرۋ مۇمكىندىكتەرى جونىندە پىكىر الماسىلدى. كومپانيا باسشىلارى قازاقستاندا شەتەلدىك ينۆەستورلار ءۇشىن جاعداي جاسالعانىنا العىس ءبىلدىرىپ, مۇنىڭ قازاقستاندىق سەرىكتەستەرمەن ءوزارا ءىس-قيمىل اياسىن كەڭەيتۋ مۇمكىندىگىنە جول اشىپ وتىرعانىن ايتتى.
قازاقستان پرەزيدەنتى قازىرگى كەزدە ەلىمىزدە تۇرىك كاپيتالىنىڭ ۇلەسى بار 1600-دەن اسا كومپانيا جۇمىس ىستەيتىنىنە, سونداي-اق تۇركيانىڭ 15 مىڭعا جۋىق ازاماتى تۇرىپ جاتقانىنا نازار اۋداردى.
«قيىندىقتار بار ەكەنىنە قاراماستان, ەكى ەل اراسىنداعى تاۋار اينالىمى 2 ميلليارد دوللاردان اسىپ تۇسەدى. پرەزيدەنت ەردوعانمەن ۋاعدالاستىق بويىنشا, بۇل كورسەتكىشتى 10 ميلليارد دوللارعا جەتكىزۋىمىز كەرەك. سوڭعى 10 جىلدا تۇرىك بيزنەسىنىڭ ءبىزدىڭ ەكونوميكاعا سالعان ينۆەستيتسياسى 2 ميلليارد دوللاردان استى. بىلتىر قازاقستاندا بەلسەندى ينۆەستيتسيالىق جۇمىس جاساعان شەتەلدىك ون كومپانيانىڭ ۇشەۋى تۇرىكتىكى بولدى. مىسالى, قازىر قازاقستان مەن تۇركيانىڭ جالپى قۇنى شامامەن 3 ميلليارد دوللار بولاتىن 91 بىرلەسكەن جوباسى جۇزەگە اسىرىلۋدا», – دەدى مەملەكەت باسشىسى.
نۇرسۇلتان نازارباەۆ قازاقستاننىڭ ەۋرازيالىق ەكونوميكالىق وداققا مۇشەلىگى مەن قىتاي حالىق رەسپۋبليكاسىمەن كورشىلەستىگى اياسىندا بيزنەس ءۇشىن تۋىندايتىن زور مۇمكىندىكتەردى اتاپ ءوتتى.
مەملەكەت باسشىسى قازاقستاندا جۇزەگە اسىرىلىپ جاتقان بەس ينستيتۋتسيونالدىق رەفورما تۋرالى دا اڭگىمەلەپ, ونىڭ اياسىندا شەتەلدىك ينۆەستورلار ءۇشىن قولايلى جاعداي جاساۋ جونىندە شارالار قاراستىرىلعانىن ايتتى.
سونىمەن قاتار, ءبىزدىڭ ەل كوزدەگەن ماقساتتارى جونىنەن قىتاي حالىق رەسپۋبليكاسىنىڭ جىبەك جولى ەكونوميكالىق بەلدەۋى باستاماسىنا ۇقساس «نۇرلى جول» باعدارلاماسىن بەلسەندى تۇردە جۇزەگە اسىرۋدا. اتالعان جوسپار اياسىندا ەلىمىزدى ينفراقۇرىلىمدىق تۇرعىدان دامىتۋ سالاسىندا اۋقىمدى جۇمىستار جۇرگىزىلىپ جاتىر.
نۇرسۇلتان نازارباەۆ «نۇرلى جولدىڭ» جانە يندۋستريالىق-يننوۆاتسيالىق دامۋ باعدارلاماسىنىڭ مۇمكىندىكتەرىن تۇرىك كومپانيالارى دا ءتيىمدى پايدالانا الاتىنىنا سەنىم ءبىلدىردى.
سونداي-اق, قازاقستان پرەزيدەنتى تۇرىك كومپانيالارىن الداعى «ەكسپو-2017» كورمەسىنە قاتىسۋعا شاقىردى.
مەملەكەت باسشىسى كەزدەسۋ بارىسىندا ايتىلعان بارلىق ۇسىنىستار مەن باستامالارعا قولداۋ بىلدىرە وتىرىپ, تۇركيا بيزنەسمەندەرىنىڭ قىزمەتىنە ءبىزدىڭ ەلدە جان-جاقتى قولداۋ كورسەتىلەتىنىن اتاپ ايتتى.
تالعات رايىمبەك.
دەرەك, فوتو: akorda.kz.