ەۋرازيالىق توپ قۇرامىنا كىرەتىن «قازحروم» تۇك» اق ءدوڭ تاۋ-كەن بايىتۋ كومبيناتىنىڭ ءبىرىنشى ۇساتىپ بايىتۋ فابريكاسىندا ورناتىلعان گيدروجىكتەمە سىناقتان ءساتتى ءوتتى. جاڭا قوندىرعىنىڭ ارقاسىندا ەندى بايىتىلۋى قيىن شلام قالدىقتارىن قايتا وڭدەپ, ودان قوسىمشا كونتسەنترات الۋعا بولادى.
2015 جىلى ءبىرىنشى ۇساتىپ بايىتۋ فابريكاسىندا «سەتكو قازاقستان» كومپانياسى عىلىمي-زەرتتەۋ جۇمىستارىن جۇرگىزىپ, ونەركاسىپتىك گيدروجىكتەمە قوندىرعىسىن اكەلىپ ورناتقان بولاتىن. بۇل قوندىرعى ۇساق تۇيىرشىكتى ماتەريالداردى ءىرىلىگى مەن قالىڭدىعىنا سايكەس بولشەكتەپ, شيكىزاتتى گراۆيتاتسيالىق بايىتۋعا دايىنداۋ ءۇشىن قولدانىلادى.
جاڭا وندىرىستىك جەلى سىناق جۇمىستارى كەزەڭىندە ءوزىنىڭ تيىمدىلىگىن تانىتتى. قوندىرعى بۇعان دەيىن وندىرىستىك قالدىق سانالىپ كەلگەن بايىتىلۋى قيىن شلام قالدىقتارىن قايتا وڭدەپ, قوسىمشا بايىتۋعا العىشارت جاسايدى. وسىلايشا بۇرىن سۋ شايۋ كارتاسىنا جونەلتىلىپ كەلگەن شلام قالدىقتارىنان ەندىگى جەردە نەگىزگى كومپونەنت – حرومدى ءبولىپ الۋعا بولادى. ءوز كەزەگىندە بۇل ايىنا قوسىمشا 800 توننا كونتسەنترانت وندىرۋگە مۇمكىندىك بەرىپ وتىر.
– وسى قۇرىلعى جۇمىسىنىڭ ناتيجەلەرىن ەسكەرە وتىرىپ, تاعى دا ءبىر گيدروجىكتەمە قوندىرعىسىن ساتىپ الۋ جونىندە شەشىم قابىلداندى, – دەدى ۇساتىپ بايىتۋ فابريكاسىنىڭ باس تەحنولوگى الەكساندر لۋحمەنوۆ.
– بۇل ەۋرازيالىق توپتىڭ 2016 جىلعا ارنالعان تاۋاردىڭ وزىندىك قۇنىن 10 پايىز تومەندەتۋ جانە تيىمدىلىكتى ارتتىرۋ جونىندەگى باعدارلاماسىنىڭ نەگىزگى باعىتتارىنىڭ ءبىرى بولىپ تابىلادى. تاۋ-كەن مەتاللۋرگيا سالاسىندا قازىر قالىپقاستان كۇردەلى كەزەڭدە ءبىزدىڭ كومپانيادا وسىنداي جوبالاردى ازىرلەپ, جۇزەگە اسىرۋ ەرەكشە ماڭىزدى, – دەپ اتاپ ءوتتى ءدوڭ تاۋ-كەن بايىتۋ كومبيناتىنىڭ ديرەكتورى مارال بەكەەۆ. – جوبا ءوندىرىس شىعىندارىن تومەندەتە وتىرىپ, ءبىزدىڭ ءونىمنىڭ الەمدىك مەتالدار نارىعىندا باسەكەگە قابىلەتتى بولۋىن قامتاماسىز ەتەدى. شلام قالدىقتارىنان قوسىمشا كونتسەنترات الۋ, الدىمەن ونىمدىلىكتى ارتتىرۋعا, سايكەسىنشە جۇمسالاتىن شيكىزات شىعىنىنىڭ ۇلەسىن ازايتا وتىرىپ, تۇپكى ءونىمنىڭ وزىندىك قۇنىن تومەندەتۋگە مۇمكىندىك بەرەدى.
الەمدىك قارجى داعدارىسى جاعدايىندا كاسىپورىننىڭ قۋاتىن ارتتىراتىن وسىنداي ىشكى رەزەرۆتەر ىسكە قوسىلۋى ماڭىزدى بولماق. بۇل كەندى تەرەڭىرەك وڭدەۋگە مۇمكىندىك بەرىپ قانا قويمايدى, سونداي-اق, تاۋ-تاۋ بولىپ جاتقان وندىرىستىك قالدىقتاردىڭ دا كادەگە جاراتىلۋىنا قول جەتكىزەدى. سونداي-اق, ەكولوگيالىق جاعدايدى ساۋىقتىرۋعا دا العىشارت جاسايدى. مۇنىڭ ءوزى قازىرگىدەي ءار تيىن ەسەپتە بولاتىن قارجىلىق كۇردەلى جاعدايدا كاسىپورىننىڭ داعدارىستى ەڭسەرۋىنە مۇمكىندىك بەرەدى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى,
حرومتاۋ اۋدانى