نەمەسە زەينەتكەر ايەلدىڭ قۋانىشى
اتتاي 22 جىل. وسىنشا ۋاقىت وتباسىنان الىستا ءومىر ءسۇرۋ كىمگە بولسا دا وڭاي ەمەس. تاياۋدا قىزىلجار ءوڭىرىنىڭ پوليتسەيلەرى ءۇي ىشىنەن جىراقتاپ قالعان ايەلدىڭ تۋعان-تۋىستارىن تابۋىنا كومەكتەستى.
66 جاستاعى سىمبات اپا پەتروپاۆل قالالىق ىشكى ىستەر باسقارماسىنىڭ كوشى-قون پوليتسياسىنا كەلىپ, قۇجاتتارىن قالپىنا كەلتىرۋگە ءوتىنىشىن جازعان. كوپ جىل بۇرىن ەسىن جوعالتقان ايەل ءوزى تۋرالى ناقتى دەرەكتەر ايتا الماعاندىقتان, كومەككە جەرگىلىكتى پوليتسەيلەر كەلگەن. اتاپ ايتقاندا, پوليتسيا كاپيتانى دانا ەلەۋسىزوۆا زەينەتكەرگە تۋىستارىن تابۋعا جاردەمدەسكەن. كەزەكتى رەت مالىمەتتەر بازاسىنداعى فوتوسۋرەتتەردى كورسەتۋ كەزىندە جامبىل وبلىسىندا بالالارى مەن نەمەرەلەرى تۇراتىنىن انىقتاعان. ول جاققا سىمبات اپايدىڭ فوتوسى جولدانىپ, ۇزاماي ۇلى تەلەفون سوققان. ءسويتىپ, كوپ جىلعا سوزىلعان سەرگەلدەڭگە سوڭعى نۇكتە قويىلىپ, بەيباق انا وتباسىمەن تابىسقان.
ونىڭ التى بالاسى وسىدان 22 جىل بۇرىن ءىز-ءتۇزسىز عايىپ بولعان انالارىن قانشا ىزدەستىرسە دە, تاپپاي, شارق ۇرعان. ءتيىستى ورىندار ونى اقىرىندا «ولگەندەر» ساناتىنا قوسىپ, ەسەپتەن شىعارعان. 1990-جىلداردىڭ ورتاسىندا ساۋدامەن اينالىسقان ايەل قاراعاندىدا قىلمىسكەرلەردىڭ قۇربانىنا اينالعان. ەسىن جوعالتىپ, ۇزاق جىلدار بويى قايدا بولسا سوندا جۇمىس ىستەپ, كۇن كورگەن. قاراعاندىدا ءبىر ەر ادام وعان پانا بولىپ, وتباسىن قۇرعان. ايەل ەسىمىنەن باسقا ءوزى تۋرالى ەشتەڭە ايتا الماعان.
بۇدان ەكى جىل بۇرىن زەينەتكەرلەر قاراعاندىدان پەتروپاۆلعا كوشىپ كەلگەن. تالاي جىل سەرگەلدەڭگە تۇسكەن وعان جۋىردا جەكە كۋالىك تاپسىرىلىپ, تۇراقتى ءتىركەۋگە الىندى.
ءومىر ەسقالي,
«ەگەمەن قازاقستان»