كەشە پرەزيدەنت جانىنداعى مەملەكەتتىك باسقارۋ اكادەمياسىندا «ەتنوسارالىق قاتىناستار جانە ەتنوساياسات سالاسىندا جۇرگىزىلگەن عىلىمي زەرتتەۋلەر ناتيجەلەرى بويىنشا ۇسىنىمدار ازىرلەۋ تەحنولوگياسى» تاقىرىبىندا ادىستەمەلىك سەمينار-ترەنينگ ءوز جۇمىسىن باستادى.
وندا اتالعان زەرتتەۋ جۇمىستارىن ءادىسنامالىق, عىلىمي-ادىستەمەلىك جانە كادرلىق جاعىنان قامتاماسىز ەتۋدى جەتىلدىرۋ ماسەلەلەرى ءسوز بولدى. جيىندى اشقان مەملەكەتتىك باسقارۋ اكادەمياسىنىڭ رەكتورى بولاتبەك ءابدىراسىلوۆ وسىمەن ءتورتىنشى رەت ۇيىمداستىرىلىپ وتىرعان سەميناردىڭ ماڭىزدىلىعىن اتاپ ءوتتى. ونىڭ ايتۋىنشا, عىلىمي زەرتتەۋلەردىڭ مىندەتتەرى مەن تاجىريبەلىك ناتيجەلەرى تالقىلاناتىن مۇنداي باسقوسۋدىڭ بەرەرى مول. سونداي-اق, ول ءىس-شارانىڭ وتۋىنە قازاقستان حالقى اسسامبلەياسى مەن ءبىلىم جانە عىلىم مينيسترلىگىنىڭ عىلىم كوميتەتى تىكەلەي مۇرىندىق بولعانىن جەتكىزدى.
ءوز كەزەگىندە قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ «قوعامدىق كەلىسىم جانە جالپىۇلتتىق بىرلىك سالاسىنداعى مەملەكەتتىك ساياساتتى عىلىمي-ساراپتامالىق سۇيەمەلدەۋ: ءمىندەتتەردىڭ قويىلۋى جانە جاڭا شەشىمدەر» تاقىرىبىندا بايانداما جاساپ, ۇلتارالىق ساياسات جانە ەتنوسارالىق قاتىناس ماسەلەسىندە عىلىمي زەرتتەۋلەردىڭ باعىت-باعدارى قانداي بولۋى كەرەكتىگىنە توقتالدى. بۇل جونىندە ول: «قازىردىڭ وزىندە ۇلتارالىق ساياساتقا قاتىستى كەيبىر ماسەلەلەردىڭ بار ەكەنى بەلگىلى. ونداي جاعدايلاردى عىلىمي تۇرعىدا زەرتتەپ, وڭتايلى دەگەن ناتيجەنى تاجىريبەگە ەنگىزۋىمىز كەرەك. وسىلايشا كەز كەلگەن تۇيتكىلدى وڭ باعىتتا شەشۋگە بولادى. جالپى, ۇلتارالىق كەلىسىم ماسەلەسىندە ءومىردىڭ شىندىعىن, ناقتى ساياساتتى ەسكەرۋ كەرەك. سوندىقتان, وسى تاقىرىپتا جازىلعان عىلىمي جۇمىستا ەلدى بىرىكتىرۋشى فاكتوردىڭ بولۋى ءتيىس», – دەدى.
سونىمەن قاتار, ە.توعجانوۆ «ماڭگىلىك ەل» جالپىۇلتتىق پاتريوتتىق يدەياسىنىڭ قۇندىلىقتارىن تىلگە تيەك ەتتى. «ەلدىڭ بىرلىگى مەن بىرتۇتاستىعىن نىعايتاتىن ۇستىن رەتىندە «ماڭگىلىك ەل» يدەياسىنىڭ ماڭىزى زور. سەبەبى, تاۋەلسىزدىكتىڭ تۇعىرى دا, نەگىزى دە, باعىت-باعدارى دا وسى يدەيامەن تىكەلەي بايلانىستى. سوندىقتان, ەلباسىنىڭ وسىعان قاتىستى بەرگەن ناقتى تاپسىرمالارىن جۇزەگە اسىرىپ, ونى حالىققا ءتۇسىندىرۋ جولىندا كۇش جۇمساۋىمىز كەرەك», – دەگەن قحا توراعاسىنىڭ ورىنباسارى جاڭا قازاقستاندىق پاتريوتيزمدى قالىپتاستىرۋدا بۇل جۇمىستاردىڭ ءرولى ەرەكشە ەكەنىن اتاپ ءوتتى.
ودان بولەك, سەمينارعا قاتىسۋشى عالىمدار دارىستەر مەن ترەنينگتەر وتكىزۋ ارقىلى ەلباسىنىڭ 2012 جىلعى 14 جەلتوقسانداعى «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋى مەن «100 ناقتى قادام» ۇلت جوسپارى اياسىندا ەلىمىزدىڭ مەملەكەتتىك ەتنوساياساتىنىڭ جاڭا مىندەتتەرىن ءتۇسىندىرۋ, اتالعان سالاداعى زەرتتەۋ جۇمىستارىنىڭ باسىم باعىتتارىن ايقىنداۋ, ولاردىڭ قازىرگى جاي-كۇيىنە تالداۋ جاساۋ ماسەلەلەرى بويىنشا ءوز تاجىريبەلەرىمەن ءبولىستى. سونداي-اق, شارا شەڭبەرىندە عىلىمي زەرتتەۋ ءادىسناماسى, تاجىريبەلىك ۇسىنىمداردى ازىرلەۋ, الىنعان تەوريالىق ءبىلىمدى قولدانىسقا ەنگىزۋ, پوليەتنوستىق قوعامداعى ءبىرەگەيلىك ماسەلەلەرىن زەرتتەۋ, وسى سالاداعى جاڭا تەحنولوگيالاردى مەڭگەرۋ ماسەلەلەرى قاراستىرىلدى.
ايتا كەتەيىك, سەمينار-ترەنينگ بۇگىن اياقتالادى. باعدارلاما بويىنشا ەكىنشى كۇنى زەرتتەۋشى عالىمدار «ەتنوستىق ءجانە ءدىني بىرەگەيلىكتى زەرتتەۋ فاكتورلارىنىڭ ەرەكشەلىكتەرى» تاقىرىبىندا ونلاين-دارىسكە قاتىسادى. سونداي-اق, بۇگىن «ەتنوسارالىق قاتىناس سالاسىنداعى زەرتتەۋ جوبالارى: تاجىريبە جانە ارالىق ناتيجەلەر» اتتى دوڭگەلەك ۇستەل وتكىزىلمەك.
ەلامان قوڭىر,
«ەگەمەن قازاقستان»