استانا. 13 ءساۋىر. قازاقستان پرەزيدەنتى نۇرسۇلتان نازارباەۆ تۇركيا رەسپۋبليكاسىنىڭ پرەزيدەنتى رەدجەپ تايپ ەردوعانمەن كەزدەستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى.
نۇرسۇلتان نازارباەۆ پەن رەدجەپ ەردوعان كەزدەسۋدە تۇركيا پرەزيدەنتىنىڭ قازاقستانعا بىلتىر ساۋىردەگى ساپارىندا قول جەتكەن ۋاعدالاستىقتاردىڭ جۇزەگە اسىرىلۋ بارىسىن قاراستىردى.
سونداي-اق, ەكى ەل كوشباسشىلارى ساۋدا-ەكونوميكا, ينۆەستيتسيا, اۋىل شارۋاشىلىعى جانە مادەني-گۋمانيتارلىق سالالارداعى ىنتىماقتاستىقتى نىعايتۋ ماسەلەلەرىن تالقىلادى. بۇل باعىتتاردا بىرلەسكەن پەرسپەكتيۆالى جوبالار بار ەكەنى, ولاردى جۇزەگە اسىرۋعا ەكى ەلدىڭ شاعىن جانە ورتا بيزنەس وكىلدەرى قاتىسا الاتىنى ايتىلدى.
مەملەكەتتەر باسشىلارى حالىقارالىق كۇن تارتىبىندەگى وزەكتى ماسەلەلەر مەن تەرروريزمگە جانە ەكسترەميزمگە قارسى كۇرەس اياسىندا قابىلدانىپ جاتقان شارالار جونىندە پىكىر الماستى.
قازاقستان پرەزيدەنتى بيىل ناۋرىز ايىندا انكارادا بولعان تەررورلىق اكتىگە بايلانىستى رەدجەپ ەردوعانعا تاعى دا كوڭىل ايتتى.
ەكىجاقتى قارىم-قاتىناس ماسەلەسىنە توقتالعان مەملەكەت باسشىسى تۇركيانىڭ جەتەكشى كومپانيالارى مەن حولدينگتەرىنىڭ مەملەكەتىمىز تاراپىنان ەلەۋلى قاراجات ءبولىنىپ وتىرعان يندۋستريالىق-يننوۆاتسيالىق دامۋ جانە «نۇرلى جول» باعدارلامالارىن جۇزەگە اسىرۋعا بەلسەنە قاتىسا الاتىنىنا نازار اۋداردى.
مەملەكەت باسشىسى قازاقستاننىڭ دۇنيەجۇزىلىك ساۋدا ۇيىمىنا كىرۋى تاۋار اينالىمىن, سونىڭ ىشىندە تۇركيامەن اراداعى تاۋار اينالىمى كولەمىن ارتتىرۋ ءۇشىن ەلىمىزدىڭ الدىنان زور مۇمكىندىكتەرگە جول اشاتىنىن ايتتى.
قازاقستان پرەزيدەنتى ءبىزدىڭ رەسپۋبليكامىزدىڭ ترانزيتتىك-كولىكتىك الەۋەتى جوعارى ەكەنىن, ونى ەكى ەل ەكونوميكاسىنىڭ يگىلىگىنە ءتيىمدى پايدالانۋعا بولاتىنىن اتاپ ءوتتى.
سونىمەن قاتار, مەملەكەت باسشىسى انتاليادا «ەكسپو-2016» جانە استانادا «ەكسپو-2017» كورمەسىن وتكىزۋ تۇرعىسىنان قازاقستان مەن تۇركيانىڭ تاجىريبە الماسۋى ماڭىزدى ەكەنىنە نازار اۋداردى.
رەدجەپ ەردوعان بىرقاتار باعىتتار بويىنشا العا قويىلعان ماقساتتارعا جەتۋ ءۇشىن ەكىجاقتى ىنتىماقتاستىقتى ودان ءارى نىعايتۋ قاجەتتىگىن ايتتى.
تالعات رايىمبەك.
دەرەك, فوتو: akorda.kz.