استانا. 13 ءساۋىر. قىزىلوردادا قازكسرو-نىڭ ەڭبەك سىڭىرگەن جاتتىقتىرۋشىسى لي ۆالەنتين ءزاحاروۆيچتى ەسكە الۋعا ارنالعان ۇلدار مەن قىزدار اراسىندا رەسپۋبليكالىق ۆەلوجارىس اياقتالدى. بۇل تۋرالى egemen.kz ءتىلشىسى حابارلادى.
العاش رەت ۇيىمداستىرىلعان جارىسقا الماتى قالاسى, باتىس قازاقستان جانە قىزىلوردا وبلىستارىنان 9 كوماندا باق سىناستى.
ەكى كۇنگە سوزىلعان جارىس ناتيجەسىندە 5 شاقىرىمدىق جەكەلەي جارىستا قىزدار اراسىندا قىزىلوردالىق ۆەلوشاباندوزدار جاقسى ونەر كورسەتتى. اتاپ ايتساق, ارۋجان عالىمجان 10 مينۋت 44 سەكۋندتا مارەگە ءبىرىنشى بولىپ كەلسە, اسەم تەلەمىسوۆا كۇمىس جۇلدەنى, مەرۋەرت اماندىق قولا جۇلدەنى ەنشىلەدى.
15 شاقىرىمدىق جەكەلەي جارىستا ۇلدار اراسىندا الماتى قالاسىنىڭ سپورتشىلارى يليا مانتۋروۆ جەڭىس تۇعىرىنا كوتەرىلسە, ارتەم سيلچەنكو ەكىنشى ورىندى, قىزىلوردالىق دامير امانتاي ءۇشىنشى ورىندى يەلەندى.
6 اينالىم كريتەريۋم جارىسىندا قىزدار اراسىندا قىزىلوردالىق سپورتشىلار وزدەرىنىڭ مىقتى ەكەندىكتەرىن دالەلدەدى. ءبىرىنشى ورىنعا ارۋجان عالىمجان, ەكىنشى ورىنعا اناستاسيا يۆانوۆا, ءۇشىنشى ورىنعا مەرۋەرت اماندىق يە بولدى. ال 12 اينالىم كريتەريۋم سايىسىندا ۇلدار اراسىندا الماتىلىق يليا مانتۋروۆ جەڭىمپاز اتانسا, قالعان ورىنداردى باتىسقازاقستاندىق بەرىك جۇماليەۆ پەن الماتىلىق ماكسيم پوپۋگاەۆ يەلەندى.
داستان كەنجالين.
دەرەك, فوتو: شتاتتاعى ۇلتتىق كوماندالار جانە سپورت رەزەرۆى ديرەكتسياسى.