اقتوبە. 13 ءساۋىر. ۇلتتىق ەكونوميكا مينيسترلىگىنىڭ وبلىس اكىمدىگىمەن بىرلەسە وتىرىپ, «100 ناقتى قادام» ۇلت جوسپارىن جۇزەگە اسىرۋ اياسىندا وتكىزگەن كەڭەسىندە جەر كودەكسىنىڭ جانە باسقا زاڭنامالىق اكتىلەرگە ەنگىزىلگەن وزگەرىستەر كەڭىنەن ءتۇسىندىرىلدى. بۇل تۋرالى egemen.kz ءتىلشىسى حابارلادى.
وبلىستىق باسقارمالار مەن دەپارتامەنتتەر باسشىلارى, اۋدان اكىمدەرىنىڭ ورىنباسارلارى جانە اۋىلدىق اكىمدەر, اۋىل شارۋاشىلىعى تاۋار وندىرۋشىلەرى قاتىسقان القالى جيىندا اۋىل شارۋاشىلىعى ماقساتىنداعى جەرلەردى ءتيىمدى پايدالانۋ, قۇرىلىس سالاسىنداعى جاڭا ەنگىزىلىمدەر, سونداي-اق, سالىق جانە كەدەن زاڭنامالارىنا ەنگىزىلەتىن وزگەرىستەر سىندى وزەكتى ماسەلەلەر تالقىلاندى.
كەڭەستى قىسقاشا ءسوز سويلەپ اشقان وبلىس اكىمى بەردىبەك ساپارباەۆ وڭىردە 25 ميلليون گەكتار اۋىل شارۋاشىلىعى ماقساتىنداعى جەر بار ەكەنىن, سونىڭ 1 ميلليون گەكتارعا جۋىعى ەگىنشىلىككە جارامدى ەكەنىن تىلگە تيەك ەتە كەلىپ, 112 مىڭ گەكتار جەردىڭ پايدالانىلماي جاتقانىن اتاپ ءوتتى. بيىل اۋكتسيون ارقىلى 184 مىڭ گەكتار جەر ساتىلاتىنىن, وسىنشاما القاپتى ساتۋعا دايىنداۋ قۇجاتتارىن جاساۋعا 58 ميلليون تەڭگە قارجى بولىنگەنىن جەتكىزدى.
كەڭەستە ءسوز العان ۇلتتىق ەكونوميكا ۆيتسە-ءمينيسترى قايىربەك وسكەنباەۆتىڭ ايتۋىنشا, قازىرگى كۇندە ەلىمىزدەگى اۋىل شارۋاشىلىعى ماقساتىنداعى جەرلەردىڭ 99,5 ميلليون گەكتارى, ياعني 99,7 پايىزى ۇزاق مەرزىمدى جالعا بەرىلگەن, تەك 1,3 پايىزى جەكە مەنشىكتە ەكەن. «100 ناقتى قادام» ۇلت جوسپارىنىڭ 35جانە 36 قادامدارىن جۇزەگە اسىرۋ اسياىندا اۋىل شارۋاشىلىعى ماقساتىنداعى جەرلەردى جەكە مەنشىككە بەرۋدىڭ جاڭا مەحانيزمىن ەنگىزۋ ماقساتىندا 2015 جىلعى 2 قاراشادا قازاقستان رەسپۋبليكاسىنىڭ «جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى, بۇل زاڭ ۇستىمىزدەگى جىلعى 1 شىلدەدەن باستاپ كۇشىنە ەنەدى.
ول بۇل وزگەرىستەر مەن تولىقتىرۋلاردا مەملەكەت مەنشىگىندەگى اۋىل شارۋاشىلىعى ماقساتىنداعى جەر تەلىمدەرىن جەكە مەنشىككە اۋكتسيون ارقىلى بەرۋ, جالعا بەرىلگەن جەر تەلىمدەرىن ساتىپ الۋ بويىنشا جەڭىلدىك شارتتارىن ۇسىنۋ, جالعا الىنعڭان اۋىل شارۋاشىلىعى ماقساتىنداعى جەرلەردى پايدالانۋ بويىنشا شەكتەۋلەردى الىپ تاستاۋ, اۋىل شارۋاشىلىعى جەرلەرىنىڭ نىسانالى ماقساتىن وزگەرتۋ ءراسىمىن الىپ تاستاۋ قارالعانىنا ەرەكشە توقتالدى. «اتالاعان شارالار اۋىل شارۋاشىلىعى ماقساتىنداعى جەرلەردى نارىقتىق اينالىمعا ەنگىزۋ ءۇشىن قاجەتتىجاعدايلار تۋعىزادى, جەر قورلارىن ۇتىرلى پايدالانۋ بويىنشا جەر يەلەرىنىڭ جاۋاپكەرشىلىگى مەن ىنتاسىن ارتىرادى», دەپ تۇيىندەدى ويىن قايىربەك وسكەنباەۆ.
سونداي-اق, ساتۋدان الىناتىن سالىقتى قولدانۋدىڭ الەمدىك تاجىريبەسىن زەردەلەۋ بويىنشا جۇمىس جۇرگىزۋدە, شاعىن جانە ورتا بيزنەس ءۇشىن پاتەنت جانە وڭتايلاتىلعان دەكلاراتسيا نەگىندەگى ارناۋلى سالىق رەجىمدەرىن, شارۋا جانە فەرمەر قوجالىقتارى ءۇشىن ارناۋلى سالىق رەجىمدەرىن رەفورمالاۋ ماسەلەلەرى پىسىقتالۋدا ەكەنى, قولدانىستاعى سالىق جەڭىلدىكتەرى مەن سالىقتىق جانە كەدەندىك ۇردىستەرىن اكىمشىلەندىرۋ تەتىگىنە تالداۋ جاسالاپ جاتقانى ءسوز بولدى.
ۇلتتىق ەكونوميكا ۆيتسە-ءمينيسترى قايىرباك وسكەنباەۆ, وسى مينسيترلىكتىڭ سالىق جانە كەدەن دەپارتامەنتى ديرەكتورىنىڭ ورىنباسارى دارىن ءابدۋالي كەڭەسكە قاتىسۋشىلاردىڭ جەر ماسەلەسىنە قاتىستى بىرقاتار ساۋالدارىنا جاۋاپ بەردى.
ساتىبالدى ءساۋىرباي.
دەرەك, فوتو: egemen.kz