استانا. 13 ءساۋىر. تايلاندتا سونگكران جاڭا جىل مەرەكەسىنىڭ العاشقى كۇندەرى جول اپاتىنان 52 ادام مەرت بولىپ, 431 تۇرعىن ءتۇرلى دەڭگەيدە جاراقات الدى. سونداي-اق, 387 جول-كولىك وقيعاسى تىركەلدى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
پوليتسيا قىزمەتكەرلەرىنىڭ ايتۋىنشا, جول اپاتىنىڭ 37 پايىزى جىلدامدىقتى شامادان تىس ارتتىرعاننان, ال 27 پايىزى ماس كۇيىندە كولىك جۇرگىزگەننەن بولعان. مەرەكەنىڭ العاشقى كۇندەرى بولعان جاعداي وتكەن جىلمەن سالىستىرعاندا ەكى ەسەگە كوپ.
ايتا كەتەيىك, تايلاندتا سونگكران مەرەكەسى 10 ءساۋىر مەن 17 ءساۋىر ارالىعىندا تويلانادى. رەسمي تۇردە دەمالىس كۇندەرى 13-15 ءساۋىر ارالىعى بولعانىمەن, كوپشىلىك بىرنەشە كۇنگە دەمالىس الادى. وسى ۋاقىت ارالىعىندا جول-كولىك وقيعالارى ءجيى تىركەلگەندىكتەن «وتە قاۋىپتى اپتا» دەپ اتالىپ كەتكەن. مالىمەتتەرگە سايكەس, بۇل كۇندەرى ورتاشا ەسەپپەن العاندا ءاربىر ساعات سايىن 2,3 ادام قازا تاۋىپ, 160 ادام ءتۇرلى دەڭگەيدە جاراقات الادى.
ايان ءابدۋالي.
دەرەك, فوتو: ريا «نوۆوستي».