سايرامداعى №4 بالالار ءۇيى وبلىستىق سوتتىڭ قامقورلىعىندا. ءار مەرەكە سايىن سوت ۇجىمى بالالار ۇيىنە بارىپ, جاۋتاڭكوز بوتاقانداردى قۇتتىقتاپ, سىيلىقتار ۇلەستىرەدى.
وڭتۇستىكتىڭ سۋديالار قاۋىمداستىعى تولە بي اۋدانىنداعى تاۋ بوكتەرىندە ورنالاسقان «الماتاۋ» دەمالىس ايماعىندا ناۋرىز مەرەكەسىن وتكىزگەندە بالالار ءۇيىنىڭ 100-گە جۋىق جاسوسپىرىمدەرىن قوناققا شاقىرعان ەكەن.
– ەشكىم جاراتقاننان ءوز تاعدىرىن سۇراپ المايدى, – دەيدى وبلىستىق سوتتىڭ توراعاسى نۇرسەرىك ءشارىپوۆ. – اكە-شەشەسى بار, بولعان-تولعان بالالاردان بۇلاردىڭ ەش كەمدىگى جوق. ايىرماشىلىعى سول, بۇل بالالارعا اكە-شەشەنىڭ ايالى الاقانى, ازاماتتاردىڭ ىستىق ىقىلاسى, مەيىرىم شۇعىلاسى جەتىسە بەرمەيدى.
بۇل كۇنi وبلىستىق جانە اۋداندىق سوتتاردىڭ سۋديالارى مەن ماماندارىنان قۇرالعان 9 كوماندا ونەر جارىستىردى. «ۇزدiك ۇجىم», «ۇزدiك ساحنالىق قويىلىم», «ۇزدiك ورىنداۋشى», «ۇزدiك بي», «ۇزدiك توپ» اتالىمدارى بويىنشا بايقاۋعا قاتىسىپ, باقتارىن سىنادى.
مەرەكەلىك شاراعا بالالار ءۇيىنىڭ 100-گە جۋىق جەتكىنشەكتەرى قاتىستى. اعا بۋىننىڭ وزدەرىنە دەگەن ىستىق ىقىلاسىنا, اكەلىك مەيىرىمىنە رازى بولعان تاربيەلەنۋشىلەر ءسوز الىپ, العىستارىن ايتتى.
كەش سوڭىندا بايقاۋ قورىتىندىسى شىعارىلىپ, سايرامداعى №4 بالالار ءۇيىنىڭ ۇجىمى «جەڭىمپاز توپ» نوميناتسياسىنا يە بولدى. ولارعا سۋديالار قاۋىمداستىعى اتىنان ءۇي كينوتەاترى تابىس ەتىلدى.
باقتيار تايجان,
«ەگەمەن قازاقستان».