ول رەسپۋبليكادا ساتىلاتىن فارماتسەۆتيكا ونىمدەرى باعالارىن ىرىقتاندىرىپ وتىرۋعا قىزمەت ەتەدى. دەنساۋلىق ساقتاۋ جانە الەۋمەتتىك دامۋ مينيسترلىگى فورمۋلياردى الداعى مامىر ايىنىڭ باسىندا ىسكە قوسپاقشى.
بۇل ۆەدومستۆو باسشىسى تامارا دۇيسەنوۆانىڭ فارماسسوتسياتسيالار وكىلدەرىمەن مەموراندۋمعا قول قويۋ ءراسىمى ءوتىپ جاتقان كەزدە بەلگىلى بولدى.
جاڭا قۇجاتقا سايكەس, 105 ءتۇرلى ءدارى-دارمەكتىڭ باعالارى بۇرىنعى قالىپتارىندا ۇستالىپ تۇراتىنى اتاپ كورسەتىلدى. «ءبىز قازاقستاننىڭ ۇلتتىق ءدارى-ءدارمەك فورمۋليارىن جاسادىق. ول وتكەن جىلعى قاراشا ايىنان بەرى ءبىزدىڭ سايتىمىزدا ءىلۋلى تۇردى. فورمۋلياردى جاساۋعا بارلىق مەديتسينالىق ۇيىمدار اتسالىستى. ەندى 1 مامىر كۇنى ءبىز ونى وندىرىستىك ەكسپلۋاتاتسياعا قوسپاقشىمىز», – دەدى مينيستر.
ۆەدومستۆو باسشىسىنىڭ اتاپ كورسەتكەنىندەي, ەندى ەلىمىزدەگى ءدارىگەرلەر, مەدبيكەلەر, ستوماتولوگتار, مەديتسينالىق وقۋ ورىندارىنىڭ ستۋدەنتتەرى مەن باسقا دا مەديتسينالىق قىزمەتكەرلەر ءۇشىن ءدارى-دارمەكتەردى تاڭداپ الۋ مەن قولدانۋدا اتالمىش فورمۋلياردى باسشىلىققا الاتىن بولادى.
جوبالىق نۇسقاعا كەپىلدى تەگىن مەديتسينالىق كومەك كورسەتۋ شەڭبەرىندە ساتىپ الىناتىن ءدارى-دارمەكتەردىڭ ءتىزىمى ەنگىزىلگەن. بۇل تىزىمدە قازىرگى تاڭدا قازاقستاننىڭ نارىعىندا اينالىمدا جۇرگەن ءدارى-دارمەكتىڭ بارلىق ءتۇرى بار.
مينيستر فورمۋليارعا دالەلدى كلينيكالىق بازاسى بار ءدارى-دارمەكتەر ءتىزىمى كىرگەنىن ەرەكشە اتاپ ءوتتى. سونىمەن بىرگە, بۇل ءتىزىم كۇن سايىن فارماتسەۆتىك اسسوتسياتسيالار مەن حالىقارالىق كىتاپحانالاردىڭ تالداۋىنان ءوتىپ تۇرادى.
مۇرات ايتقوجا.