قازاقستان رەسپۋبليكاسى پارلامەنتى سەناتىنىڭ توراعاسى, الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى قاسىم-جومارت توقاەۆ بيىلعى 31 مامىر مەن 2 ماۋسىم ارالىعىندا استانادا وتەتىن «دىندەر تەرروريزمگە قارسى» حالىقارالىق كونفەرەنتسياسى مەن سەزد حاتشىلىعىنىڭ XV وتىرىسىنا ازىرلىك ماسەلەلەرى بويىنشا جۇمىس بابىنداعى كەڭەس وتكىزدى.
كونفەرەنتسيا قازاقستان پرەزيدەنتى ن.نازارباەۆتىڭ 2015 جىلعى قىركۇيەكتە بۇۇ باس اسسامبلەياسىنىڭ 70-ءشى سەسسياسىندا ايتقان تەرروريزمگە قارسى ءىس-قيمىل تۋرالى باستامالارىن ىسكە اسىرۋ اياسىندا وتەدى. سەنات توراعاسى حالىقارالىق ۇيىمداردىڭ, پارلامەنتتىك جانە الەمدىك ءدىني قاۋىمداستىقتاردىڭ, قازاقستاندا ءتىركەلگەن ديپلوماتيالىق كورپۋستىڭ وكىلدەرى العاش رەت قاتىساتىن كونفەرەنتسيانىڭ ەرەكشە سيپاتىنا نازار اۋداردى. تەرروريزممەن كۇرەستەگى ماڭىزدى ماسەلەلەردى تالقىلاۋعا ەلىمىزدىڭ جانە شەتەلدىك ساراپشىلار دا قاتىسادى. توراعانىڭ پىكىرىنشە, كونفەرەنتسيا مەملەكەت باسشىسى جاريا ەتكەن جاھاندىق ماڭىزى بار «الەم. ءححى عاسىر» مانيفەسىن ءتۇسىندىرۋ جانە ىلگەرىلەتۋ ءۇشىن ءتيىستى تۇعىرناما بولادى.
شارالارعا ازىرلىك بارىسى تۋرالى سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى يكرام ادىربەكوۆ, سىرتقى ىستەر مينيسترىنىڭ ورىنباسارلارى ەرجان اشىقباەۆ پەن رومان ۆاسيلەنكو, مادەنيەت جانە سپورت ءمينيسترىنىڭ ورىنباسارى مارات ءازىلحانوۆ حاباردار ەتتى, دەپ حابارلادى پارلامەنت سەناتىنىڭ ءباسپاسوز قىزمەتى.