وڭىردەگى وزەندەردىڭ تاسۋ مەرزىمى جىلداعى مەجەسىنەن ءبىر اپتا ەرتە باستالدى. وبلىس اكىمى بەردىبەك ساپارباەۆ كوكتەمگى سۋ تاسقىنىنا قاتىستى احۋالدى ءبىلىپ, الداعى اتقارىلار شارالاردى بەلگىلەۋ ءۇشىن قارعالى, اقتوبە جانە سازدى سۋ قويمالارى اۋماقتارىن ارالاپ, جاعدايمەن تانىستى.
قازىرگى ۋاقىتتا اتالعان سۋ قويمالارىنىڭ بارلىعى دەرلىك قاردىڭ ەرىگەن سۋىن قابىلدايتىن مۇمكىندىكتەرى بار. وبلىستىڭ سولتۇستىك وڭىرلەرىندەگى مارتوك, حرومتاۋ, قارعالى, ايتەكە بي اۋداندارىندا جانە اقتوبە قالاسى اۋماعىندا عانا قار قالىپ وتىر. قاردىڭ قالىڭدىعى 5-87 سانتيمەتر شاماسىندا دەپ ەسەپتەلۋدە.
وبلىستىق توتەنشە جاعدايلار جونىندەگى دەپارتامەنتتىڭ باسشىسى باۋىرجان سىزدىقوۆ, «قازسۋشار» رمك اقتوبە فيليالىنىڭ ديرەكتورى بەكزات نامەتوۆ وزدەرى جەتەكشىلىك ەتەتىن سالالار بويىنشا جۇزەگە اسىرىلىپ جاتقان جۇمىستار جونىندە بايانداپ بەردى.
وبلىس بويىنشا اقپان ايىنان باستاپ سۋ تاسقىنىنا قارسى جۇمىستار تياناقتى جۇرگىزىلىپ جاتىر. سۋ اعاتىن ارىقتاردى تازالاۋ, وزەندەردىڭ ارناسىن كەڭەيتۋ قولعا الىندى.
بەردىبەك ساپارباەۆ قارعالى اۋدانىندا بولعان ساتىندە وسى وڭىردەگى قاۋىپتى ايماقتاردىڭ ءبىرى قوسەستەك اۋىلىنىڭ كوكتەمگى سۋ تاسقىنىنا ازىرلىگىمەن تانىستى. اۋدان اكىمى راحات سىدىقوۆ جەرگىلىكتى جەردە اتقارىلعان شارالار تۋرالى باياندادى. اعىمداعى جىلى كوكتەمگى سۋ تاسقىنى قاۋپىنىڭ الدىن الۋ ماقساتىندا «قازسۋشار» رمك اقتوبە فيليالى سۋ شارۋاشىلىعى نىساندارىندا كوتەرگىش مەحانيزمدەرىنە, سۋ تورابىنداعى ەلەكتر جۇيەلەرىنە تەكسەرىستەر جۇرگىزىپ, جانار-جاعارماي جانە اپاتتىق ماتەريالدار قورىن دايىندادى. رەزەرۆكە اپاتتىق ديزەل ەلەكتر ستانسا ازىرلەندى. بارلىق رەسپۋبليكالىق مەنشىكتەگى نىساندار تەحنيكالىق تەكسەرۋدەن وتكىزىلدى. نىسانداردا تۇراقتى بايلانىس جۇيەلەرى جۇمىس ىستەيدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.