جاقىندا ىلە اۋدانىنىڭ ورتالىعى وتەگەن باتىر اۋىلىندا ارقايسىسى 72 پاتەردەن تۇراتىن, تالاپقا ساي سالىنعان 2 تۇرعىن ءۇي يەلەرىن تاپتى.
پاتەر كىلتتەرىن سالتاناتتى تۇردە تاپسىرۋ راسىمىنە اۋدان اكىمى قايىرجان جاقسىمبەتوۆ قاتىستى. اۋدان باسشىسى حالىقتى تۇرعىن ۇيمەن قامتاماسىز ەتۋ كۇن تارتىبىندەگى وزەكتى ماسەلە ەكەنىن, بۇل باعىتتا اۋقىمدى جۇمىستار اتقارىلىپ جاتقانىن اتاپ ءوتتى.
«بۇگىن ۇزاق جىل بويى كەزەكتە تۇرعان 60 ازاماتتىڭ قۋانىشىنا كۋا بولىپ وتىرمىز. بىلتىر الەۋمەتتىك وسال توپتاعى ازاماتتارعا 269 ءۇي مەن پاتەر ساتىپ الىندى. بيىل وتەگەن باتىر اۋىلىندا جاڭا سالىنعان 144 پاتەردى تاپسىرۋ, سونىمەن قاتار الەۋمەتتىك وسال ساناتتاعى ازاماتتارعا تاعى 36 پاتەر ساتىپ الۋ جوسپاردا بار», دەدى اكىم.
جاڭا قونىس يەلەرىنىڭ ءبىرى سارسەنگۇل ابدىكەرىمقىزى: ء«ۇي كەزەگىنە كوپبالالى انا رەتىندە تىركەلدىم. 15 جىل بويى سابىرمەن كۇتىپ, ءوز باسپاناما قول جەتكىزدىم. ءتورت قىز, ءبىر ۇلىم بولعاندىقتان, ءۇش بولمەلى پاتەر بۇيىردى. ساپاسى كوڭىلىمىزدەن شىقتى. قۋانىشتىمىز, العىسىمىز شەكسىز», دەپ اعىنان جارىلدى.
الماتى وبلىسى