قاراعاندى. 7 ءساۋىر. قاراعاندى قالاسىندا پوليتسيا قىزمەتكەرلەرى ءبىر تاۋلىك ىشىندە ەگدە جاستاعى ايەلدەردى توناۋمەن اينالىسقان التى ادامدى قولعا ءتۇسىردى. بۇل تۋرالى قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
ەڭ الدىمەن 64 جاستاعى كەيۋانانى توناپ, 12 مىڭ تەڭگەسى مەن ۇيالى تەلەفونىن الىپ كەتكەن ءۇش كۇدىكتى ۇستالدى. ولار وزدەرىنىڭ كىنالارىن تولىقتاي مويىندادى. سول كۇنى ءۇش ادامنان قۇرالعان توپ 73 جاستاعى زەينەتكەرگە شابۋىل جاساعان. ولار زارداپ شەگۋشىنى باسىنان ۇرىپ قۇلاتقان دا جەكە زاتتارىن الىپ كەتكەن.
كۇدىكتىلەردىڭ بارلىعىن دا ءتارتىپ ساقشىلارى ارنايى ورناتىلعان بەينە باقىلاۋ كامەرالارى ارقىلى ۇستادى. قازىرگى تاڭدا قاماۋعا الىنىپ, وسى ەكى وقيعا بويىنشا سوتقا دەيىنگى تەرگەۋ امالدارى جۇرگىزىلۋدە.
قايرات ءابىلدينوۆ.
دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
فوتو: mega-u.ru.