وقيعا بىلاي بولىپتى. وڭتۇستىك قازاقستان وبلىسى قازىعۇرت اۋدانىنىڭ قوساعاش اۋىلىنىڭ جانىنان اعىپ جاتقان قارجان وزەنىنىڭ شالت مىنەز تانىتۋىنا الدىنداعى كۇندەرى قاتتى جاۋعان جاڭبىر سەبەپ بولعان. سەلدەتە توككەن جاڭبىردان سوڭ لاي سۋى ارالاس اعىپ, تاسىرلاپ جاتقان وزەن جاعاسىندا كىشكەنتاي بالالار ويناپ جۇرەدى. وزەننىڭ ءدال جيەگىندە تۇرعان 3 جاسار اقەركەنىڭ اياعىنىڭ استىنداعى توپىراق ومىرىلىپ تۇسكەندە, ءبۇلدىرشىن سۋعا اعىپ كەتە بارادى.
وزەن جاعالاپ ويناپ جۇرگەن بالالار شۋ ەتە قالعاندا سيىر باعىپ جۇرگەن مۇحامەدالى سمانوۆ سۋدا اعىپ بارا جاتقان قىزىل كويلەكتى قىزدى كورىپ, تۇرا جۇگىرەدى. جاعاعا كەلىپ ۇستىندەگى كيىمدەرىن شەشىپ, سۋعا قويىپ كەتكەن ول: «ءوزىمنىڭ جۇزە الاتىنىما سەندىم, بىراق وزەنگە تۇسكەندە قاپ-قارا لاي سۋدى كورىپ, شوشىپ كەتتىم. دەگەنمەن, سۋداعى قىزدى قالايدا الىپ شىعۋ كەرەكتىگىن ويلادىم. اعىپ كەلە جاتقان قىزدىڭ الدىنان شىعىپ, ۇستاپ الدىم دا, جاعاعا الىپ شىقتىم. سول كەزدە قىز قيمىلسىز قالدى. جەرگە جاتقىزىپ, «ءومىر قاۋىپسىزدىگى» ساباعىندا كورگەندەي, كوكىرەگىنەن باسىپ-باسىپ جىبەردىم. سول كەزدە قىزدىڭ اۋزىنان ءشوپ-شالام ارالاس سۋ اتقىلاپ شىقتى. سالدەن سوڭ ول تىنىس الا باستادى. قىزدى سول جەردە قالدىردىم دا, ارىدە مال باعىپ جۇرگەن قىزدىڭ اكەسىنە قاراي جۇگىردىم. اكەسى كەلىپ قىزىن اۋرۋحاناعا الىپ كەتتى», – دەيدى مۇحامەدالى سمانوۆ.
كەيدە بالا تۇگىل ۇلكەن ادام اقىل تاپپاي قالاتىن قىسىل-تاياڭ شاقتا ىشىنە سۋ تولىپ, تىنىسى ءۇزىلىپ, ەسسىز جاتقان قىزدى جالما-جان تىرىلتكەن قارشاداي بالانىڭ ارقاسىندا كورەر جارىعى تاۋسىلماعان ءبۇلدىرشىن امان قالادى.
وقيعانى facebook الەۋمەتتىك جەلىسىندە جاريالاپ, جۇرتشىلىقتىڭ ەرلىكتەن حاباردار بولۋىنا مۇرىندىق بولعان التىنتوبە اۋىلىنىڭ تۇرعىنى سەيدالى دۇيسەباي ۇلىنىڭ سىلتەۋىمەن كىشكەنتاي باتىردىڭ كورشىسى, ءبىر جاعىنان تۋىس اپكەسى, ءارى سول مەكتەپتىڭ مۇعالىمى جانار سەيدراحىممەن حابارلاسقانىمىزدا, ول جاڭا عانا مەكتەپ ديرەكتورى قاسىمسەيىت دۋانقۇلوۆتىڭ مۇحامەدالى سمانوۆتى ءدۇيىم جۇرتتىڭ الدىنا شىعارىپ العىس ايتىپ, ماراپاتتاعانىن ايتقان. ارتىنشا تەلەفون ارقىلى تىلدەسكەن سىنىپ جەتەكشىسى ءاليما امىرسەيىتقىزى شاكىرتىنىڭ اكەسى احمەن قۇراق ۇلى سمانوۆتىڭ اۋىلدا تۇراقتى جۇمىسى جوقتىعىن, ال اناسى راۋشان سمانوۆانىڭ ءۇي شارۋاسىنداعى 5 بالانىڭ اناسى ەكەنىن, مۇحامەدالىنىڭ وتباسىندا ءتورتىنشى بالا ەكەنىن, اناسىنىڭ جاقىندا تاعى دا بوپەلى بولعانىن ايتتى.
انار تولەۋحانقىزى,
«ەگەمەن قازاقستان».