نۇرسۇلۋ تاپالوۆا اتىنداعى رەسپۋبليكالىق بي بايقاۋى كوپشىلىكتى ءسۇيىندىردى
وبلىس ورتالىعىنداعى قازاقستان حالقى اسسامبلەياسى عيماراتىندا تاۋەلسىزدىكتىڭ 25 جىلدىعىنا جانە وبلىستىق حالىق شىعارماشىلىعى ءۇيىنىڭ 55 جىلدىعىنا ارنالعان نۇرسۇلۋ تاپالوۆا اتىنداعى III رەسپۋبليكالىق «ءبيدىڭ نۇرى – نۇرسۇلۋ» اتتى جەكە ورىنداۋشىلار بي بايقاۋى وتكىزىلدى.
بۇل بايقاۋعا كاسىبي جانە اۋەسقوي بي ۇجىمدارىنىڭ 15-25 جاس ارالىعىنداعى جەكە ورىنداۋشىلارى قاتىستى.
بايقاۋ ەكى تۋردان تۇردى. ءبىرىنشى تۋردا بي دوداسىنا قاتىسۋشىلار حالىقتىق بي مەكتەبى بويىنشا ونەر كورسەتتى. ال, ەكىنشى تۋردا بيشىلەر ءوز تاڭداعان بيلەرىن بيلەدى.
بايقاۋ شىمىلدىعى ماسكەۋ قالاسىندا وتكەن حالىقارالىق بي بايقاۋىنىڭ گران-پري جەڭىمپازى «Mega Star» ءسان جانە بي ستۋدياسى بيشىلەرىنىڭ بيىمەن اشىلدى. سودان كەيىن قازاقتىڭ تۇڭعىش بالەريناسى نۇرسۇلۋ تاپالوۆا تۋرالى بەينەفيلم كورسەتىلدى. تۋما تالانتتىڭ قازاقتىڭ بالەت بي ونەرىندە جارقىراي جانعان جۇلدىزدى ساتتەرى جاڭعىرتىلىپ, كەيىنگى تولقىن جاستارعا ونەگە رەتىندە ۇسىنىلدى. ونىڭ كەزىندە اكادەميك احمەت جۇبانوۆتىڭ كوزىنە ءتۇسىپ, كۇمىس كومەي ءانشى كۇلاش بايسەيىتوۆا, مىڭ بۇرالعان بۋىنسىز ءبيشى شارا جيەنقۇلوۆا جانە باسقا ۇلتتىق ونەرىمىزدىڭ ىرگەتاسىن قالاعان ۇلى تۇلعالارمەن بىرگە قازاق ونەرى مەن مادەنيەتىنىڭ باستاۋلارىندا تۇرىپ, ۇلتتىق ونەردىڭ قالىپتاسۋىنا ءبىر كىسىدەي ەڭبەك سىڭىرگەنى بەلگىلى. الەمگە ايگىلى بالەت ءبيشىسى گالينا ۋلانوۆامەن بىرگە بيلەدى دەگەن دە دەرەك بار. ول «جامبىل», «بەلىە روزى» فيلمدەرىنە تۇسكەن. ال, قازاق بالەتىنىڭ دامۋىنا قوسقان ۇلەسى ۇشان-تەڭىز دەۋ ورىندى. ءبىز مۇنى اتاقتى ءبيشى بولات ايۋحانوۆتىڭ ەستەلىگىنە سۇيەنىپ ايتىپ وتىرمىز, ارينە.
بايقاۋعا قاتىسۋشىلار ونەرىن ەلىمىزدەگى حورەوگرافيا سالاسىنىڭ جەتەكشى ماماندارى باعالادى.
استانالىق ءبيشى اسحات مادەن بايقاۋدىڭ گران-پري ءجۇلدەسىن جەڭىپ الدى. ءبىرىنشى ورىندى دا استانالىق ساعىنىش نۇرحايداروۆا يەلەندى. ەكىنشى ورىن وڭتۇستىك قازاقستان وبلىسىنىڭ ءبيشىسى مارجان سارسەنبەككە بۇيىردى. ءۇشىنشى ورىندى ماڭعىستاۋ وبلىسىنان كەلگەن ءبيشى انار قىدىرباەۆا مەن اقتوبەلىك كامشات بيماعانبەتوۆا ءبولىستى.
بايقاۋ جەڭىمپازدارى مەن جۇلدەگەرلەرى ديپلومدارمەن جانە اقشالاي سىيلىقتارمەن ماراپاتتالدى. بايقاۋعا قاتىسقان بيشىلەردىڭ بارلىعىنا بي ونەرى سايىسىن ۇيىمداستىرۋشىلار اتىنان سىي-سياپات جاسالدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.