ماقسات – ىشكى رىنوكتى قامتاماسىز ەتىپ, ەكسپورت الەۋەتىن ارتتىرۋ

12 قاڭتاردا اقوردادا مەملەكەت باسشىسى نۇرسۇلتان نازارباەۆتىڭ توراعالىعىمەن مال شارۋاشىلىعىن دامىتۋدىڭ كوكەيكەستى ماسەلەلەرى بويىنشا جۇمىس كەڭەسى بولىپ ءوتتى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. جۇمىس كەڭەسىنە پرەمەر-مينيستر ك.ءماسىموۆ, پرەمەر-ءمينيستردىڭ ءبىرىنشى ورىنباسارى ءو.شوكەەۆ, پرەزيدەنتتىڭ كومەك­شىسى ب.سۇلتانوۆ, اۋىل شارۋا­شى­لىعى ءمينيسترى ا.كۇرىشباەۆ, «قاز­اگرو» اق باسقارما ءتور­اعا­سى ا.مامىتبەكوۆ قاتىستى. كەڭەس بارىسىندا مال شارۋا­­شىلىعىن ودان ءارى دامىتۋدىڭ ماسەلەلەرى, سونداي-اق ەل ەكونو­مي­كاسىنداعى اگرارلىق سەكتور­دىڭ جالپى جاعدايى تالقىلاندى. 2010 جىلى قازاقستان رەسپۋب­ليكاسىندا كەيىنگى ناقتىلانعان ەسەپ بويىنشا 12,2 ميلليون توننا استىق جينالدى. مايلى دا­قىل­داردىڭ جالپى جيىنى – 775,5 مىڭ توننا, كوكونىس 2,6 ميل­ليون توننا بولدى. 2010 جىلى قا­زاق­ستانداعى ەت ءونىمى – 1,4 ميلليون توننانى, ءسۇت – 5,1 ميلليون تون­نانى, جۇمىرتقا – 3 432,5 ميلليون دانانى, ءجۇن 35,8 مىڭ تون­نانى قۇرادى. ەلىمىزدەگى بارلىق مال تۇرلەرىنىڭ جانە قۇستىڭ سا­نى: ءىرى قارا – 6,5 ميلليون باس; قوي مەن ەشكى – 19,0 ميلليون باس; جىلقى – 1,56 ميلليون باس; تۇيە – 164,9 مىڭ باس; قۇس – 34,8 ميلليون باس; شوشقا 1,56 ميلليون باس بولدى. قازاقستاندا مال شارۋاشى­لى­عى سالاسىن دامىتۋداعى باستى ماقسات ەلدىڭ مال ونىمدەرىنە دەگەن ىشكى سۇرانىسىن تولىق قام­تا­ماسىز ەتۋ, سونداي-اق ونىڭ ەكس­پورتتىق الەۋە­تىن جۇزەگە اسىرۋ بولىپ تابىلادى. اتالعان ماق­ساتقا اعىمداعى جاع­دايدى جانە ىشكى تۇتىنۋ ءوسىمىنىڭ پەرسپەك­تيۆالارىن ەسەپكە العاندا, قازىرگى مال باسىن اسىلداندىرۋ مەن سا­پاسىن جاقسارتۋ ارقىلى قول جەتكىزۋگە بولادى. جۇزەگە اسىرىلىپ جاتقان شارالاردى ەسەپكە الا كەلە, ەلىمىزدەگى اسىل تۇقىمدى مال با­سىنىڭ جالپى سانىن 2015 جىل­عا قاراي 2 ەسەگە,  ال 2020 جىل­عا قاراي 4 ەسەگە كوبەيتۋ جوسپار­لانىپ وتىر. اسىل تۇقىمدى مالدىڭ جالپى سانى 2020 جىلعا قاراي 2 ەسەگە دەرلىك كوبەيمەك. بۇل, تۇپتەپ كەلگەندە, ىشكى رى­نوك­تى جوعارى ساپالى سيىر ەتىمەن تولىق قامتاماسىز ەتىپ, بىرتە-بىرتە ەكسپورتتىق الەۋەتتى ارتتىرۋعا الىپ كەلەدى. ونىڭ ۇستىنە, قا­زاقستاننان شىعارىلا­تىن سيىر ەتىنىڭ ەكسپورتى 2013 جىلى شامامەن 13 مىڭ توننانى, ال 2020 جىلعا قاراي 83 مىڭ تون­ناعا دەيىنگى كورسەتكىشتى قۇ­رايدى. كەڭەس قورىتىندىسى بويىن­شا مەملەكەت باسشىسى بىرقاتار ناقتى تاپسىرمالار بەردى. سۋرەتتى تۇسىرگەندەر س.بوندارەنكو, ب.وتارباەۆ.