قوستاناي. 19 ناۋرىز. قوستانايدا قۇتقارۋشىلار بىرنەشە كۇن ىشىندە بوراندا, قار قۇرساۋىندا قالعان 200 ادامدى امان الىپ قالدى. بۇل تۋرالى وبلىستىق توتەنشە جاعدايلار دەپارتامەنتى مەملەكەتتىك ءتىل جانە اقپارات توبىنا سىلتەمە جاساعان egemen.kz ءتىلشىسى حابارلادى.
قورعان جاعىنان سوققان انتيتسيكلون قوستاناي وڭىرىنە قار مەن بوران الا كەلدى. سونىڭ سالدارىنان جولداردا كورۋ قاشىقتىعى جوعالىپ, جولاۋشىلار كولىگى قارعا كەپتەلىپ قالدى. سارىكول اۋدانىندا كۇرە جولدىڭ بويىندا ءورت ءسوندىرۋ جانە اپات-قۇتقارۋ قىزمەتىنىڭ قىزمەتكەرلەرى قار قۇرساۋىندا قالعان جەتى ادامدى الىپ شىقتى. ودان كەيىن وسى اۋداننان وتەتىن «ەكاتەرينبۋرگ –الماتى» كۇرە جولىنىڭ بويىنان قۇتقارۋشىلار 92 جولاۋشىنى بوراننان امان الىپ قالدى. ونىڭ 10-ى بالالار. سونىمەن قاتار 33 كولىكتى دە قار قۇرساۋىنان قۇتقاردى. ەشكىم زارداپ شەككەن جوق.
«كوستاناي–ۆۆەدەنكا» تاس جولىنىڭ جانە فەدوروۆ اۋدانىنداعى جول بويىندا بوران ءۇرىپ تاستاعان قار ۇيىندىسىنەن شىعا الماي تۇرعان 111 ادام قۇتقارىلدى. ونىڭ 15-ءى بالالار. سونداي-اق, قارعا كەپتەلگەن 30 ماشينانى سۇيرەپ, جولعا سالىپ جىبەردى.
قازىر بوراننىڭ باسىلماۋىنا بايلانىستى وبلىس وڭىرىندەگى وبلىستىق جانە رەسپۋبليكالىق ماڭىزى بار بىرنەشە جولدار جابىق تۇر.
ءنازيرا جارىمبەتوۆا.
دەرەك, سۋرەت: egemen.kz.