كەشە قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ شانحاي ىنتىماقتاستىق ۇيىمى ميسسياسىنىڭ باسشىسى ازيز نوسيروۆپەن كەزدەستى. كەزدەسۋدە وسك باسشىسى ميسسيا جەتەكشىسىن ءماجىلىس دەپۋتاتتارى سايلاۋىنا دايىندىق بارىسىمەن تانىستىردى.
«جالپى, مەن قازاقستانداعى سايلاۋعا بايلانىستى جاريالانعان بىرقاتار ماقالامەن تانىسىپ شىققان ەدىم. بۇل رەتتە ورتالىق سايلاۋ كوميسسياسى بەلسەندى جۇمىس ىستەپ, اتقارىلعان ىستەر جايىنداعى اقپاراتتارىن ۇنەمى جاڭارتىپ وتىراتىندىعىن بايقادىم. باسىلىمداردا سايلاۋعا قاتىساتىن ساياسي پارتيالارعا تەڭدەي جاعداي جاسالعان», – دەدى ا.نوسيروۆ باق وكىلدەرىنە بەرگەن سۇحباتىندا.
سونىمەن قاتار, ول شىۇ ميسسياسىنىڭ وكىلدەرى ءبۇگىن-ەرتەڭ كەلەتىندىگىن, سودان كەيىن قاي ۋچاسكەلەردە بايقاۋ جۇرگىزەتىندىكتەرىن ايقىندايتىنىن اتاپ ءوتتى. «ال 21 ناۋرىز كۇنى شانحاي ىنتىماقتاستىق ۇيىمى اتىنان ءمالىمدەمە جاساۋعا تىرىساتىن بولامىز. بۇگىن ءبىز قر سىرتقى ىستەر ءمينيسترىنىڭ ورىنباسارى اقىلبەك كامالدينوۆپەن كەزدەسۋ وتكىزدىك. كەزدەسۋ بارىسىندا قر سىرتقى ىستەر مينيسترىنە شىۇ جۇمىسىنا ايرىقشا كوڭىل بولگەندىگىنە جانە سايلاۋعا بايقاۋشى رەتىندە شاقىرتۋ جىبەرگەندىگىنە ريزاشىلىعىمىزدى بىلدىردىك», – دەدى ا.نوسيروۆ.
ءاليسۇلتان قۇلانباي,
«ەگەمەن قازاقستان».