ەلىمىزدە ەرەكشە ءبىلىم بەرۋ قاجەتتىلىگى بار بالالارعا كورسەتىلەتىن كومەكتى جەتىلدىرۋ ماسەلەسى ۇكىمەت دەڭگەيىندە قارالدى. پرەمەر-مينيستر ولجاس بەكتەنوۆ بۇل باعىتتاعى جۇمىستى كۇشەيتىپ, ءتيىستى مينيسترلىككە ناقتى تاپسىرمالار جۇكتەدى, دەپ جازادى Egemen.kz.
ۇكىمەت وتىرىسىندا ءسوز سويلەگەن پرەمەر-مينيستر ەرەكشە بالالاردى سۇيەمەلدەۋ جۇيەسىندە بىرقاتار تۇيتكىل بار ەكەنىن اشىق ايتتى. ونىڭ سوزىنشە, بۇگىنگى تاڭدا پسيحولوگيالىق-مەديتسينالىق-پەداگوگيكالىق كوميسسيالاردىڭ جۇمىسى تولىق جۇكتەمەنى كوتەرە الماي وتىر.
«پسيحولوگيالىق-مەديتسينالىق پەداگوگيكالىق كوميسسيا مۇقتاج بالالاردى تۇگەل كەشەندى تەكسەرۋدەن وتكىزىپ ۇلگەرە الماي جاتىر. ۇزىن كەزەك بىرنەشە ايعا دەيىن سوزىلىپ كەتىپ وتىر.
ارنايى ماماندار – ياعني لوگوپەدتەر, سۋردولوگتار, رەابيليتولوگتار جەتىسپەيدى. پەداگوگتەردە ەرەكشە بالالارمەن جانە ەرەسەكتەرمەن جۇمىس ىستەۋ داعدىسى تولىق قالىپتاسپاعان.
مىسالى, مۇعالىمدەردىڭ بارلىعى بىردەي ەرەكشە ءبىلىم بەرۋ قاجەتتىلىكتەرى بار وقۋشىلارمەن قالاي ءتيىمدى قارىم-قاتىناس ورناتۋ كەرەكتىگىن بىلە قويمايدى. ونى ازاماتتاردىڭ كوپتەگەن وتىنىشتەرىنەن بايقاۋعا بولادى», دەدى ولجاس بەكتەنوۆ.
پرەمەر-مينيستر اتاپ وتكەندەي, كادر تاپشىلىعى مەن ادىستەمەلىك دايىندىقتىڭ السىزدىگى ەرەكشە ءبىلىمدى قاجەت ەتەتىن بالالارعا ساپالى قولداۋ كورسەتۋگە كەدەرگى كەلتىرىپ وتىر. وسىعان بايلانىستى ۇكىمەت جۇيەلى شارالار قابىلداۋعا نيەتتى.
اتاپ ايتقاندا, وقۋ-اعارتۋ مينيسترلىگىنە مۇعالىمدەرگە ارنالعان ارنايى وقىتۋ كۋرستارىن تۇراقتى تۇردە ۇيىمداستىرۋ تاپسىرىلدى. بۇل كۋرستار پەداگوگتەردىڭ ەرەكشە بالالارمەن جۇمىس ىستەۋ داعدىلارىن جەتىلدىرۋگە باعىتتالماق.
سونىمەن بىرگە 1 قىركۇيەككە دەيىن ينكليۋزيۆتى ءبىلىم بەرۋدىڭ ساپالى جاڭا مودەلىن ەنگىزۋ مىندەتى قويىلدى. جاڭا ءتاسىل اياسىندا كادرلارمەن قامتاماسىز ەتۋ دەڭگەيىن ارتتىرۋ, سونداي-اق قولداۋ قىزمەتتەرىن كۇشەيتۋ كوزدەلگەن.
الماتىداعى جەكە وڭالتۋ ورتالىعىندا ەرەكشە بالالاردى ۇرىپ-سوققان