مەملەكەتتىك حاتشى, قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى گۇلشارا ابدىقالىقوۆا نيۋ-يوركتە بۇۇ ايەلدەر احۋالى جونىندەگى كوميسسياسىنىڭ 60-سەسسياسىنا قاتىستى, دەپ حابارلادى ەلباسىنىڭ ءباسپاسوز قىزمەتى.
گ.ابدىقالىقوۆا ءوز سوزىندە گەندەرلىك تەڭدىك جانە ايەلدەردىڭ احۋالىن جاقسارتۋ ماسەلەلەرى بەيبىتشىلىك پەن قاۋىپسىزدىكتى نىعايتۋ, ورنىقتى دامۋ, كەدەيشىلىكتى جويۋ جانە ادام قۇقىقتارىن قورعاۋ سياقتى بۇۇ جاھاندىق كۇن ءتارتىبىنىڭ نەگىزگى ماسەلەلەرىمەن تىعىز بايلانىستى ەكەنىن اتاپ ءوتتى.
مەملەكەتتىك حاتشى قازاقستاندا گەندەرلىك ساياساتتىڭ ءوزىندىك ۇلگىسى قالىپتاسقانىن ايتتى. ۇلتتىق ەرەكشەلىكتەر ەسكەرىلگەن بۇل ۇلگى حالىقارالىق ءتاجىريبەلەرگە نەگىزدەلگەن. سونداي-اق, گەندەرلىك تەڭدىككە قول جەتكىزۋگە, ايەلدەر مەن قىز بالالاردىڭ قۇقىقتارىن قورعاۋعا جانە ولاردىڭ مۇمكىندىكتەرى اۋقىمىن كەڭەيتۋگە باعىتتالعان.
سەسسيا اياسىندا «قازاقستاننىڭ گەندەرلىك جانە وتباسىلىق-دەموگرافيالىق ساياساتى: ءوسىم, رەفورما, دامۋ» تاقىرىبى بويىنشا مينيسترلىكتىڭ جۇمىس بابىنداعى تۇسكى اسى ۇيىمداستىرىلدى. جارىسسوزگە بەلگيا, وار, چەحيا, انگولا, لاتۆيا, زيمبابۆە, ءۇندىستان, كورەيا رەسپۋبليكاسى, جاپونيا, پاراگۆاي, ارگەنتينا, مىسىر, تۇرىكمەنستان جانە باسقا دا ەلدەردىڭ دەلەگاتسيالارى قاتىستى. ءىس-شارا بارىسىندا قازاقستانداعى گەندەرلىك جانە وتباسىلىق-دەموگرافيالىق ساياساتتىڭ, سونداي-اق, ەكونوميكالىق ءمۇمكىندىكتەرىنىڭ اياسىن كەڭەيتۋ جانە اۋىلدىق ايماقتارداعى ايەلدەردىڭ دەنساۋلىعىن قورعاۋ ماسەلەلەرى جان-جاقتى تالقىلاندى.
سەسسيا بارىسىندا مەملەكەتتىك حاتشى مەن بىرىككەن ۇلتتار ۇيىمى باس حاتشىسىنىڭ ورىنباسارى, بۇۇ ايەلدەر قۇرىلىمىنىڭ اتقارۋشى ديرەكتورى ف.ملامبو-نگكۋكانىڭ كەزدەسۋى ءوتتى. تاراپتار قازاقستاننىڭ ايەلدەر مەن قىزدار قۇقىعىن قورعاۋ جانە مۇمكىندىكتەرى اۋقىمىن كەڭەيتۋ سالاسىنداعى حالىقارالىق مىندەتتەمەلەرىن ورىنداۋ ماسەلەلەرىن قارادى. گ.ابدىقالىقوۆا تاۋەلسىزدىك العالى بەرى قازاقستاننىڭ ايەل قۇقىقتارىن قورعاۋ سالاسىندا قول جەتكىزگەن وزگەرىستەرىنە جەتەكشى حالىقارالىق ساراپشىلار وڭ باعا بەرگەنىن اتاپ ءوتتى.
سونداي-اق, گ.ابدىقالىقوۆا امەريكا مەملەكەتتەرى ۇيىمىنىڭ (امۇ) ايەلدەر جونىندەگى امەريكاارالىق كوميسسياسىنىڭ اتقارۋشى حاتشىسى, ەلشى ك.مورەنومەن كەزدەستى. تاراپتار ايەلدەردىڭ ازاماتتىق, ساياسي, ەكونوميكالىق, الەۋمەتتىك جانە مادەني سالالارعا قاتىسۋىنا جانە وكىلەتتىلىك ەتۋىنە تولىق ءارى تەڭ قولجەتىمدىلىكتى قامتاماسىز ەتۋ جونىندەگى ماسەلەلەردى جان-جاقتى تالقىلادى. مەملەكەتتىك حاتشى قازاقستاننىڭ سولتۇستىك جانە وڭتۇستىك امەريكاداعى ايەل قۇقىقتارى جانە گەندەرلىك تەڭدىككە قاتىستى ساياساتتى جۇرگىزۋ ىسىندەگى باستى ۇيىم بولىپ تابىلاتىن امۇ-مەن ىنتىماقتاستىققا جەتە ءمان بەرەتىنىن اتاپ كورسەتتى.
مەملەكەتتىك حاتشى گ.ابدىقالىقوۆا بۇۇ دامۋ باعدارلامالارىنىڭ اكىمشىسى ح.كلاركپەن كەزدەسۋدە قازاقستان مەن بۇۇ دب اراسىندا 2016-2020 جىلدارعا ارنالعان جاڭا نەگىزدەمەلىك باعدارلاماعا قول قويىلعانىن ايتىپ, ورنىقتى دامۋ ماقساتتارىنا قول جەتكىزۋگە جانە ونى جۇزەگە اسىرۋعا جاردەم ەتكەنى ءۇشىن العىس ءبىلدىردى. گ.ابدىقالىقوۆا ح.كلاركقا كەدەيشىلىكتى جانە جۇمىسسىزدىقتى تومەندەتۋگە, ايەلدەردى ينفراقۇرىلىمدىق جوبالاردى جۇزەگە اسىرۋعا تارتۋعا باعىتتالعان «نۇرلى جول» جاڭا ەكونوميكالىق باعدارلاماسىنىڭ مۇمكىندىكتەرىن تانىستىردى. مەملەكەتتىك حاتشى نيۋ-يوركتەگى بۇۇ دامۋ باعدارلاماسىندا قازاقستاندىق ايەلدەردىڭ دە وكىلدىك ەتۋىنە ءمۇددەلىلىك تانىتتى.
اقش-قا جاساعان جۇمىس ساپارىنىڭ سوڭىندا مەملەكەتتىك حاتشى بۇۇ باس حاتشىسى پان گي مۋنمەن كەزدەستى. كەزدەسۋ بارىسىندا ورنىقتى دامۋدىڭ, گەندەرلىك تەڭدىكتىڭ جانە ايەلدەر مەن بالالاردىڭ قۇقىقتارى مەن مۇمكىندىكتەرى اياسىن كەڭەيتۋدىڭ, الەۋمەتتىك-گۋمانيتارلىق ىلگەرىلەۋدىڭ وزەكتى ماسەلەلەرى تالقىلاندى.