استانا. 17 ناۋرىز. سارسەنبىدەن بەيسەنبىگە قاراعان ءتۇنى ۋەفا چەمپيوندار ليگاسىنىڭ شيرەك فينالىنا شىققان تاعى ەكى كوماندا انىقتالدى. قارىمتا كەزدەسۋدە ءوز الاڭدارىندا جەڭىسكە جەتكەن يسپانيانىڭ «بارسەلوناسى» مەن گەرمانيانىڭ «باۆاريا» كوماندالارى جارىستىڭ كەلەسى كەزەڭىنە ءوتتى. بۇل تۋرالى egemen.kz ءتىلشىسى حابارلادى.
«بارسەلونا» (بارسەلونا, يسپانيا) – «ارسەنال» (لوندون, انگليا) 3:1 (2:0)
گولدار: نەيمار 18, سۋارەس 65, مەسسي 88 – ەل-نەني 51.
الاڭ يەلەرى العاشقى ويىندا قاجەتتى ناتيجەگە قول جەتكىزگەنىمەن, بۇل كەزدەسۋدە دە بارىن سالدى. كەزەكتى شابۋىلداردىڭ بىرىندە نەيماردىڭ كومەگىمەن يسپانيالىق كلۋب العاش بولىپ ەسەپ اشتى. «ارسەنال» كومانداسىنىڭ ويىنشىلارى قانشا تىرىسسا دا, العاشقى 45 مينۋتتا قارىمتا گول سوعا المادى.
ال ماتچتىڭ ەكىنشى جارتىسىندا قوناقتار ساپىنان ەل-نەني تارازى باسىن تەڭەستىرىپ, جانكۇيەرلەرىنە ءۇمىت سىيلاعان ەدى. دەگەنمەن, اراعا كوپ ۋاقىت سالماي, «بارسەلونانىڭ» ورتالىق شابۋىلشىسى لۋيس سۋارەس مەرگەندىگىمەن كوزگە ءتۇسىپ, كومانداسىن العا شىعاردى. ويىننىڭ اياقتالار تۇسىندا ليونەل مەسسي ءۇشىنشى گولدى سوعىپ, كەزدەسۋدىڭ نۇكتەسىن قويدى.
«باۆاريا» (ميۋنحەن, گەرمانيا) – «يۋۆەنتۋس» (تۋرين, يتاليا) 4:2 (2:2)
گولدار: لەۆاندوۆسكي 73, ميۋللەر 90+1, الكانتارا 108, كومان 110 – پوگبا 5, كۋادرادو 28
ميۋنحەندەگى «اليانتس ارەنا» ستاديونىندا جانكۇيەرلەر ناعىز تارتىستى باسەكەنى تاماشالادى. «يۋۆەنتۋس» كومانداسى ويىن باستالا سالا, جۇيەلى ويناپ, شابۋىلعا قاتتى ءمان بەردى. وسىنداي شابۋىلداردىڭ سوڭى پول پوگبا مەن كۋادرادونىڭ گول سوعۋىمەن اياقتالدى. «باۆاريا» قارسىلاستارىنان مۇنداي ويىندى كۇتپەگەن بولسا كەرەك, قانشا قارىمتا شابۋىلدار ۇيىمداستىرسا دا, ءبىرىنشى تايمدا گول سوعا المادى.
ال ەكىنشى تايم الاڭ يەلەرى ءۇشىن ءساتتى اياقتالدى. الدىمەن شابۋىل شەبىندە ونەر كورسەتەتىن روبەرت لەۆاندوۆسكي ەسەپتى قىسقارتسا, كەزدەسۋدىڭ سوڭعى مينۋتتارىندا توماس ميۋللەر تارازى باسىن تەڭەستىرىپ, قوسىمشا ەكى تايم ويناۋ مۇمكىندىگىنە قول جەتكىزدى. ماتچتىڭ نەگىزگى ۋاقىتىندا يتاليا كومانداسى فاۆوريت بولىپ كورىنگەنىمەن, وۆەرتايم ءساتسىز اياقتالدى. شارشاڭقىراپ قالعان «يۋۆەنتۋسكە» نەمىس كومانداسىنىڭ ويىنشىلارى ەكى بىردەي گول سوعىپ, شيرەك فينالدىڭ جولداماسىن يەمدەندى.
ايان ءابدۋالي.
دەرەك: egemen.kz.
سۋرەت: vk.com.