كونگرەسسمەنگە قاستاندىق جاسالدى
اريزونا شتاتىنان وكىلدەر پالاتاسىنىڭ ءمۇشەلىگىنە سايلانعان قىرىق جاستاعى گابريەل دجيففوردسقا سايلاۋشىلارمەن كەزدەسۋى كەزىندە قاستاندىق جاسالدى. كەزدەسۋ تۋسون قالاسىنداعى Safeway سۋپەرماركەتىندە ءوتىپ جاتقان بولاتىن.
گابريەل دجيففوردس باسىنان اۋىر جاراقات الىپ, اۋرۋحاناعا ءتۇستى. قاستاندىق كەزىندە اتىلعان وقتان, سونداي-اق التى ادام قازا تاپتى, ونىڭ ىشىندە فەدەرالدىق سۋديا مەن 9 جاسار قىز بار. بۇدان بولەك تاعى 12 ادام جاراقات الدى. وق اتقان 22 جاستاعى دجەرەد لي لافنەر تۇتقىندالدى. اقپارات كوزدەرىنە قاراعاندا, دجەرەد لي لافنەر بۇرىن سوتتالعان, جۇيكە اۋرۋىمەن اۋىرادى. ال گابريەل دجيففوردس حانىم دەموكراتيالىق پارتيانىڭ مۇشەسى. ونىڭ جاراقاتى اسا اۋىر.
تاعى ءبىر مەملەكەتپەن تولىعۋى مۇمكىن
جەكسەنبى كۇنى سۋداننىڭ وڭتۇستىگىندە رەفەرەندۋم باستالدى. ونىڭ قورىتىندىسى بويىنشا سۋدان ەكى مەملەكەتكە ءبولىنۋى ءمۇمكىن. بۇل جونىندە رەيتەر اگەنتتىگى حابارلادى.
اگەنتتىكتىڭ تاراتقان اقپاراتتارىنا قاراعاندا, ەلدىڭ وڭتۇستىك پروۆينتسيالارىندا وننان استام, ال سولتۇستىگىندە جانە شەت ەلدەردە ءۇش مىڭعا جۋىق داۋىس بەرۋ ۋچاسكەلەرى اشىلعان. رەفەرەندۋمعا 4 ميلليوننان استام ادام قاتىسادى دەپ كۇتىلىپ وتىر. تىركەلگەن وسى سايلاۋشىلاردىڭ كەمىندە 60 پايىزى قولداپ داۋىس بەرگەن جاعدايدا رەفەرەندۋم ءوتتى دەپ تانىلادى. ال داۋىس بەرۋ 15 قاڭتارعا دەيىن جالعاسادى, رەفەرەندۋمنىڭ ءناتيجەسى 6 اقپاندا جاريا ەتىلەدى. قازىرگى كەزدە رەفەرەندۋمدى 17 مىڭعا جۋىق بايقاۋشى قاداعالاۋدا. ولاردىڭ ىشىندە اقش-تان, ەۋرووداقتان, قىتايدان جانە رەسەيدەن بايقاۋشىلار بار. سۋدان مەملەكەتى 38 ميلليون حالقى بار افريكاداعى ءىرى مەملەكەت بولىپ تابىلادى.
جولاۋشىلار ۇشاعى اپاتقا ۇشىرادى
يتار-تاسس اگەنتتىگىنىڭ حابارلاۋىنشا, «يران ەير» اۆياكومپانياسىنىڭ بوينگ-727 جولاۋشىلار ۇشاعى ۋرميا قالاسى اۋەجايىنىڭ ماڭىندا اپاتقا ۇشىراعان. وعان قالىڭ قار مەن تۇمان سەبەپ بولعان.
يراندىق فارس اگەنتتىگىنىڭ اقپاراتتارىنا قاراعاندا, اۋەجاي ديسپەتچەرى ۇشاقتى اۋا رايىنىڭ قولايسىزدىعىنا بايلانىستى تەھرانعا ورالۋ قاجەتتىگىن ەسكەرتكەن. وسىدان كەيىن-اق ۇشاق راداردان جوعالىپ كەتكەن. اپات سالدارىنان ۇشاقتاعى جولاۋشىلار مەن ەكيپاج مۇشەلەرىنىڭ 77-ءسى قازا تاپتى جانە 27 ادام جاراقات الدى. ال ءبىر ادام حابارسىز كەتكەندەردىڭ قاتارىندا. يراننىڭ باتىس ءازىربايجان پروۆينتسياسىندا ءۇش كۇندىك ازا تۇتۋ جاريالاندى.
قىتايدىڭ قارۋلانۋىنان سەسكەنەدى
«نيۋ-يورك تايمس» باسىلىمىنىڭ اقپاراتتارى بويىنشا, امەريكالىق بارلاۋ قىزمەتى قىتايدىڭ قارۋلانۋدى دامىتۋ دەڭگەيىن جەتكىلىكتى باعالاماعان. بۇل تۋرالى اقش-تىڭ قورعانىس ءمينيسترى روبەرت گەيتس ءوزىنىڭ پەكينگە ساپارمەن بارا جاتقان كەزىندە ۇشاق ىشىندە مالىمدەدى.
قورعانىس ءمينيسترىنىڭ مالىمدەۋىنشە, ۆاشينگتوندى قىتايدىڭ كورابلدەرگە قارسى بالليستيكالىق راكەتالار جاساۋى ەرەكشە مازاسىزداندىرادى. بۇل اسكەري قارۋ ءتۇرى وڭىردەگى امەريكالىق اۆياتاسىمالداۋشىلاردى, سونداي-اق بەسىنشى بۋىندى اسكەري ۇشاقتاردى اتىپ تۇسىرە الادى. پەنتاگون باسشىسىنىڭ بۇل مالىمدەمەسى تۋرالى قىتاي تارابى قازىرگە پىكىر بىلدىرگەن جوق. بىرقاتار ءمالىمەتتەرگە قاراعاندا, قىتايدىڭ 2010 جىلعى اسكەري بيۋدجەتى 76-78 ميلليارد دوللار ارالىعىندا. ال اقش-تىڭ وتكەن جىلعا اسكەري ماقساتقا جۇمساعان شىعىنى 636 ميلليارد دوللاردى قۇراعان.