استانا. 1 ناۋرىز. بۇگىن قازاقستاندىق الپينيستەر ماقسۇت جۇماەۆ, ماعجان ساعىمباەۆ جانە يۆان بورودا وڭتۇستىك امەريكا قۇرلىعىنداعى ەڭ بيىك نۇكتە – اكونكاگۋا شىڭىن (ارگەنتينا) باعىندىردى. استانا ۋاقىتىمەن ساعات تاڭعى 4:00 شاماسىندا الپينيستەر بايلانىسقا شىعىپ, قۋانىشتى حاباردى جەتكىزدى. بۇل تۋرالى قازاقستان گەوگرافيالىق قوعامىنىڭ مالىمەتىنە سىلتەمە جاساعان egemen.kz ءتىلشىسى حابارلادى.
اتالعان قوعامنىڭ facebook الەۋمەتتىك جەلىسىندەگى رەسمي پاراقشاسىندا جاريالانعان جازبادا: «الاقاي! قازاق گەوگرافيالىق قوعامى ەكسپەديتسياسىنىڭ اكونكاگۋاداعى كوماندا مۇشەلەرى ماعجان ساعىمباەۆ پەن ماقسۇت جۇماەۆ تەڭىز دەڭگەيىنەن 6962 مەتر بيىكتىكتە ورنالاسقان شىڭدى باعىندىردى! ەلىمىزدىڭ, قازاقستاننىڭ تۋى مەن قازاق گەوگرافيالىق قوعامىنىڭ تۋى وڭتۇستىك امەريكانىڭ ەڭ بيىك جەرىنە تىگىلدى! العا قازاقستان!», – دەلىنگەن.
ايتا كەتەيىك, وسىدان ەكى اپتا بۇرىن الپينيستەرىمىز اتالعان شىڭدى باعىندىرۋ ءۇشىن ەكسپەديتسياعا شىققان بولاتىن. ۇشاقپەن ارگەنتينانىڭ مەندوسا قالاسىنا جەتكەن ولار سول جەردەن كوزدەگەن ماقساتتارىن ىسكە اسىرۋ ءۇشىن جولعا شىقتى.
ماقسۇت جۇماەۆ تەك قازاقستاننىڭ ەمەس, الەمنىڭ بىرەگەي ءالپينيسى ەكەنىن ەرەكشە اتاپ وتكەن ءجون. ول جەر بەتىندە 8000 مەتردەن اساتىن بارلىق 14 شىڭدى قوسىمشا وتتەگىسىز باعىندىرعان الەمدەگى 12 ءالپينيستىڭ ءبىرى.
ەلامان قوڭىر.
دەرەك: قازاق گەوگرافيالىق قوعامى.
سۋرەت: facebook.com.