«اق جول» دەموكراتيالىق پارتياسىنىڭ باس كەڭسەسىندەگى وتكەن قوعامدىق قابىلداۋعا تۇيتكىلدى ماسەلەنىڭ ءتۇيىنىن تارقاتا الماي جۇرگەن جاندار جينالدى دەسە بولعانداي. كەرەناۋ كەڭسەلەردىڭ تابالدىرىعىن توزدىرىپ, قۇزىرلى ورگاندارعا جازعان شاعىمدارىنان وڭ ناتيجە شىقپاعان سوڭ, ارىز-ارمانىن ارقالاپ, ۇكىلى ءۇمىتتىڭ جەتەگىندە «اق جولعا» كەلگەن.
سەكسەننىڭ سەڭگىرىنە شىققان قورعان ءامىرحامزين اقساقال قورعانسىزدىققا كۇيىنىپ, ەندىگى بار ءۇمىتى ازات پەرۋاشەۆ باسقاراتىن پارتياعا تىرەلگەنىن كەمسەڭدەي وتىرىپ جەتكىزدى. اشپاعان ەسىگى, بارماعان كەڭسەسى قالماپتى. اقساقالدىڭ ايتۋىنشا, كومىر تاسىمالىمەن اينالىساتىن ۇلىن اقمولا وبلىسىنداعى تسەلينوگراد اۋدانى اكىمدىگىنىڭ قىزمەتكەرلەرى تاقىرعا وتىرعىزىپتى. وسىدان ەكى جارىم جىل بۇرىن اكىمدىكتىڭ جىلۋ قازاندىعىنا جەتكىزىلگەن كومىرگە تيەسىلى تولەمنىڭ 1 ميلليون تەڭگەسى عانا تولەنىپ, 9 ميلليون 500 مىڭ تەڭگەسىن ءالى كۇنگە دەيىن الا الماي ءجۇر ەكەن. اۋداندىق اكىمدىك قىزمەتكەرلەرىنىڭ ادىلەتسىزدىگىنەن بۇگىندە اقساقالدىڭ بالاسى اۋرۋعا شالدىعىپ, جۇمىسسىز قالعان كورىنەدى.
جەتىمدەر ءۇيىنىڭ تاربيەلەنۋشىسى گالينا كيل دە «جەتىمدى جەبەيتىن ۇيىم» رەتىندە قوعامدىق قابىلداۋعا سەنىم ارتىپ كەلىپتى. ول قازىر ءۇش بالاسىمەن باراكتا تۇرىپ جاتىر ەكەن. استانا قالالىق اكىمدىگىنىڭ تۇرعىن ءۇي باسقارماسىنا بارسا, تۇرعىن ءۇي كەزەگىنە تىركەۋ تۋرالى ءوتىنىشىن قابىلداماعان. ەندى اقجولدىق زاڭگەرلەر گ.كيلگە تۇرعىن ءۇي كەزەگىنە تۇرۋ ءۇشىن كەڭەس بەرىپ, قۇجاتتارىن ازىرلەۋگە كومەكتەسەتىن بولادى.
ال «ورتوپەديا اكادەمياسى» جشس-ءنىڭ باس ديرەكتورى يننا كامالوۆا بولسا, قوعامدىق قابىلداۋعا جەكە باسىنىڭ قامىمەن ەمەس, ەلدىڭ مۇددەسىنە ورايلاساتىن ارنايى ۇسىنىسىمەن كەلىپتى. «ءبىز تىرەك-قيمىل اپپاراتى اۋرۋلارىن, ياعني مايتابان, وكشە, دەنە تۇرقىنىڭ بۇگىلۋى دەگەن سياقتىلاردى ەمدەۋمەن اينالىسامىز. ءبىز بۇرىن ونىمدەردى رەسەي, ەۋروپا, قىتاي ءتارىزدى ەلدەردەن اكەلەتىنبىز. ال قازىرگىدەي ەكونوميكالىق قيىن كەزەڭدە سىرتتان تاسىمالداناتىن تاۋارلاردىڭ باعاسى شارىقتاپ كەتتى. ساتىپ الۋ قابىلەتى تومەندەگەن سوڭ, اتالعان ونىمدەر ارقىلى ەم قابىلداۋ تۇتىنۋشىعا ءتيىمسىز. سول سەبەپتى, وتاندىق ءوندىرىستى ىسكە قوسۋ توڭىرەگىندە ويعا كەلدىك. ال وندىرىسكە قاجەتتى شيكىزات تا ەلىمىزدە وندىرىلمەيدى. سىرتتان تاسىمالداعان كۇندە ونىڭ وزىندىك قۇنى تاعى دا ءوسىپ شىعا كەلەدى. وندىرىسكە قاجەتتى ساپالى بىلعارىنى شىعارۋ ءۇشىن جۇزدەگەن ميلليون دوللار كولەمىندە قارجى كەرەك. ورتا بيزنەس ءۇشىن بۇل – قول جەتپەيتىن ينۆەستيتسيا. ەگەر دە مەملەكەت تاراپىنان وسىنداي ءوندىرىس قولعا الىنىپ, دايىن ونىمىنە دەيىن ەلىمىزدە شىعارىلاتىن بولسا, ءبىز, شاعىن جانە ورتا بيزنەس وكىلدەرى يمپورت الماستىرۋ باعدارلاماسىنا ءوزىمىز دە ۇلەسىمىزدى قوسقان بولار ەدىك», دەيدى يننا ۆلاديميروۆنا.
«اق جول» پارتياسى تاراپىنان قوعامدىق قابىلداۋلار ءار اپتا سايىن وتكىزىلىپ تۇرادى. وتكەن شاقىرىلىمدا پارتيا فراكتسياسىنىڭ مۇشەلەرى ازاماتتاردىڭ تالاپ-تىلەكتەرىنە بايلانىستى ۇكىمەتكە, باس پروكۋراتۋراعا جانە دە باسقا دا قۇزىرلى ورگاندارعا 190-نان استام دەپۋتاتتىق ساۋال جولداعان. ءتورت جىلعا جۋىق ۋاقىتتىڭ ىشىندە قوعامدىق قابىلداۋدا ۇزىن-سانى 2000-عا جۋىق ادام بولعان.
قوعامدىق قابىلداۋ توڭىرەگىندەگى ويىن پارتيانىڭ توراعاسى ازات پەرۋاشەۆ تومەندەگىشە تارقاتتى: «پارلامەنتتىك پارتيا بولعان سوڭ ازاماتتاردىڭ وتىنىشتەرىمەن جۇمىس ىستەۋگە مىندەتتىمىز. ازاماتتاردان تۇسەتىن ارىز-شاعىمنىڭ دەنىن جەر تەلىمى, تۇرعىن ءۇي, يپوتەكالىق نەسيە, ۇلەسكەرلەر پروبلەماسى قۇرايدى. جۇمىسسىزدىق ماسەلەسى دە الدىڭعى قاتاردا. كاسىپكەرلىكپەن اينالىساتىن ورتا بيزنەستىڭ وكىلدەرى دە وزدەرىنىڭ تالاپ-تىلەكتەرىن جەتكىزەدى. نەمەسە مەملەكەتتىك ساتىپ الۋعا قاتىستى زاڭسىزدىققا كەزىككەن, تەكسەرۋشى ورگاندار تاراپىنان قىسىمعا ۇشىراعان ازاماتتار دا قابىلداۋعا ءجيى كەلەدى. پارتيانىڭ قوعامدىق قابىلداۋىنا كەلگەن ازاماتتاردىڭ شاعىمىنا قاتىستى ءتيىستى ورگاندارعا حات جولداپ قانا قويماي, قاجەتتى جەرىندە زاڭگەرلەرىمىز ولاردىڭ قۇقىعىن سوت ورگاندارىندا قورعاۋعا دا كومەكتەسەدى», دەپ ءسوزىن تۇيىندەدى ازات تۇرلىبەك ۇلى.
قوعامدا ءتۇيىنى تارقاتىلماعان ماسەلە بارشىلىق ەكەن. قوعامدىق قابىلداۋعا كەلگەن ازاماتتاردىڭ ارىز-شاعىمىنان وسىنى پايىمدادىق. اتقارۋشى, سوت بيلىگى سياقتى قۇزىرەتتى ورگانداردىڭ قىزمەتىنىڭ ولقى تۇستارى وسىندايدا كورىنىپ قالادى. ناتيجەلى بولسا, جەمىستى بولسا, ەل-جۇرتتىڭ پارتيالارعا ارىزداناتىنداي نەسى بار؟!
عابيت ىسكەندەر ۇلى,
«ەگەمەن قازاقستان».