فرانتسيانىڭ سولتۇستىك-شىعىسىنداعى يادرولىق قالدىقتار قويماسىندا بولعان تاۋ جىنىسىنىڭ قۇلاۋى سالدارىنان ءبىر ادام قازا تاۋىپ, تاعى ءبىر ادام جاراقات العان.
قازىرگى ۋاقىتتا وقيعا سەبەپتەرىنە تەرگەۋ جۇرگىزىلۋدە. جەر قىرتىسى وپىرىلىپ تۇسكەن ساتتە قويمادا يادرولىق قالدىقتاردىڭ بولماعانى انىقتالىپ وتىر. بۇگىنگى كەزەڭدە ونى زەرتحانا رەتىندە پايدالانىپ, بولاشاقتا قالدىقتار قويماسىن جاساۋعا دايىنداۋدا ەكەن. بۇل تۋرالى ۆۆس-ءدىڭ ورىس قىزمەتى حابارلاپ وتىر.
دانيا بوسقىندار اقشالارىن تاركىلەمەك
دانيادا سيريالىق بوسقىنداردان قالتالارىن «اۋدارىپ» كورسەتۋدى تالاپ ەتۋى مۇمكىن. اتالمىش كورولدىكتە مەملەكەتتى ميگرانتتار ءۇشىن مەيلىنشە تارتىمسىز ەتۋگە باعىتتالعان جاڭا زاڭدار قابىلدانۋدا.
پارلامەنتتەگى ءۇش ساعاتقا سوزىلعان پىكىرتالاستاردان كەيىن دەپۋتاتتار بوسقىنداردى قابىلداۋ ەرەجەسىن ايتارلىقتاي قاتاڭداتقان زاڭ جوباسىنا قولداۋ كورسەتكەن. ەۋروپانىڭ قۇقىق قورعاۋ ۇيىمدارى بولسا زاڭنامانىڭ كەيبىر ەرەجەلەرىنە قاتىستى قاتاڭ سىن ايتىپ دابىل قاعۋدا. بارىنەن بۇرىن ولارعا زاڭنىڭ پوليتسەيلەرگە بوسقىنداردى تىنتۋگە جانە ولاردىڭ اقشالارى مەن 1340 ەۋرودان اساتىن قۇندى زاتتارىن تاركىلەۋگە رۇقسات بەرەتىن بابى ۇناماي وتىر.
قار استىندا قالعان ايەل قۇتقارىلدى
اقش-تىڭ مەريلەند شتاتىندا ءورت سوندىرۋشىلەر, مەديكتەر مەن ۇلتتىق گۆارديا وكىلدەرى ىشىندە ءۇش كۇن بويىنا ايەل وتىرعان اۆتوماشينانى قار استىنان ارشىپ العان.
زارداپ شەككەن ايەل ماشينادان كەتۋدەن باس تارتقان كورىنەدى. دەگەنمەن, ءبىراز ۇگىتتەگەننەن كەيىن ونى گيپوتەرميادان ەم الۋ ءۇشىن اۋرۋحاناعا جىبەرۋدىڭ ءساتى تۇسكەن. بەلگىلى بولعانىنداي, ول ايەل 22 قاڭتاردان باستاپ اۆتوموبيل ىشىندە وتىرىپ, تەك دۇيسەنبى كۇنى كەشكىلىك قانا قۇتقارىلعان. ابىروي بولعاندا, زارداپ شەككەن ايەلدىڭ اقىل-ەسى ءبۇتىن جانە دەنەسىندە ەشقانداي جاراقات جوق بولىپ شىققان.
ءوز ليدەرىنىڭ مەرزىمىن بەس جىلعا ۇزارتتى
حانويدا ءوتىپ جاتقان ۆەتنام كومپارتياسىنىڭ حح سەزى ەل باسشىلىعىن ايتارلىقتاي جاڭارتقان. وتكەن سارسەنبى كۇنى سەزد دەلەگاتتارى ۆەتنام كومپارتياسى ورتالىق كوميتەتىنىڭ باس حاتشىسى نگۋەن فۋ چونگتى كەلەسى بەس جىل مەرزىمگە قايتا سايلادى.
نگۋەن فۋ چونگ ءوزىنىڭ پارتياداعى پوزيتسياسىن ساقتاعان جانە نىعايتقان بۇرىنعى ەل باسشىلىعى اراسىنداعى بىردەن-ءبىر ليدەر بولىپ تابىلادى دەپ اتاپ كورسەتىلگەن وسى تۋرالى اقپارات تاراتقان تايلاند تەلەكانالىنىڭ حابارىندا. نگۋەن فۋ چونگ باسقاراتىن توپ اقش-پەن جاقىنداسۋدى ونشا قالامايدى جانە وڭىردەگى قىتاي ىقپالىنىڭ ءوسۋىن بۇلجىماس پروتسەسس دەپ قابىلدايدى.
سولداتتار «اساد, پۋتين!» دەپ ۇراندادى
ار-رابيا قالاسىنداعى جەڭىسىن تويلاعان سيريا ارمياسىنىڭ جاۋىنگەرلەرى سيريا جانە رەسەي پرەزيدەنتتەرىنىڭ اتتارىن اتاي وتىرىپ, ولارعا قوشەمەت كورسەتۋ تۇرعىسىندا ۋرالاپ ۇرانداعان.
سيريانىڭ سولتۇستىگىندەگى رابيا قالاسىن ازات ەتۋگە قاتىسۋشىلار ءوز تابىستارىن رەسەي جانە سيريا حالىقتارىنا ارنايدى, دەپ مالىمدەگەن «ءشول دالا لاشىندارى» وتريادىنىڭ ءبىر جاۋىنگەرى. دۇشپاندار مەن تەررورشىلار اتىپ تۇسىرگەن رەسەيلىك ۇشقىش ءۇشىن ءبىز قۇدايدىڭ كومەگىمەن ولاردىڭ كوزىن تولىق جويدىق. ءبىز ۇلكەن جەڭىسكە جەتتىك جانە ونى رەسەي حالقىنا جانە سيريا حالقىنا, سونداي-اق, وسى ەلدەردەگى ءاربىر ادال جاندارعا ارنايمىز دەپ اتاپ كورسەتكەن ول.
بريتانيا ەۋرووداقتان شىعا ما؟
ۇلىبريتانيا ەگەر بريتاندىقتار قولداپ داۋىس بەرەتىن بولسا, ەۋرووداقتان شىعۋ پروتسەدۋراسىن ىسكە قوسپاق. بۇل تۋرالى كورولدىكتىڭ سىرتقى ىستەر ءمينيسترى فيليپ حامموند مالىمدەدى.
سونىمەن بىرگە, ول رەفەرەندۋم ناتيجەلەرى زاڭدىق تۇرعىدان ورىنداۋعا مىندەتتى ەمەس ەكەنىن دە اتاپ كورسەتكەن. دەگەنمەن, ساياساتكەرلەر ازاماتتاردىڭ قالاۋلارىن جۇزەگە اسىرۋعا ءماجبۇر بولادى. بريتانيانىڭ ەۋرووداققا مۇشەلىگى تۋرالى رەفەرەندۋمنىڭ وسى جىلدىڭ ماۋسىم ايىندا-اق ءوتۋى مۇمكىن. ول ماقسات ەگەر الداعى اقپان ايىندا لوندون مەن بريۋسسەل ەۋرووداقتى رەفورمالاۋ تۋرالى كەلىسىمگە كەلەر بولسا عانا ورىندالماق.
سيريالىق كۇردتەر كەلىسسوزدەرگە شاقىرىلمايدى
فرانتسيا سىرتقى ىستەر ءمينيسترى لوران فابيۋس «دەموكراتيالىق وداق» اتتى سيريالىق كۇردتەر پارتياسىنىڭ جەنەۆادا وتەتىن كەلىسسوزدەرگە شاقىرىلمايتىنىن مالىمدەگەن.
ونىڭ ايتۋىنا قاراعاندا, بۇل جونىندە وعان بۇۇ-نىڭ سيريا بويىنشا ارنايى ەلشىسى ستاففان دە ميستۋرا حابارلاعان. وسىنىڭ الدىندا عانا ول جەنەۆا قالاسىندا 29 قاڭتاردا وتەتىن سيرياداعى احۋال بويىنشا كەلىسسوزدەرگە شاقىرتۋلار جىبەرۋدى باستاعان بولاتىن. ايتا كەتۋ كەرەك, رەسەي كۇردتەردى سيريا بويىنشا كەلىسسوزدەر مەن «يسلام مەملەكەتى» تەررورلىق توبىنىڭ سودىرلارىمەن كۇرەستەن شىعارىپ تاستاۋعا قارسى.
كوز ورنىنا – بەينەكامەرا
43 جاسار كانادالىق رەجيسسەر روب سپەن ءوزىنىڭ كوزىن الىپ تاستاپ, ونىڭ ورنىنا جوعارى تەحنولوگيالى پروتەز – ميني-كامەرا ورناتقان.
«ايبورگ كوزى» ماگنيتكە اسەر ەتەتىن راديوجيىلىكتى تاراتۋشىمەن جابدىقتالعان كامەرا بەينەكورىنىستەردى جازىپ الۋعا قابىلەتتى. مۇنىڭ ءوزى رەجيسسەر ءۇشىن وتە ءتيىمدى بولىپ وتىر. ول كامەراداعى جازبالاردى جاڭا روبوت جاساۋ ءۇشىن پايدالانباق. ءبىر عانا كەمشىلىگى – بەينەجازۋ نەبارى 3 مينۋتقا عانا سوزىلادى. وسى ورايدا روب سپەننىڭ ونەر ءۇشىن قۇرباندىققا بارماعانىن, ونىڭ سوناۋ بالا كەزىندە-اق ءبىر كوزىنەن سوقىر بولىپ قالعانىن ايتا كەتۋ قاجەت.
قاسكويدىڭ نيەتى جۇزەگە اسپادى
اقش-تىڭ ۆيسكونسين شتاتىندا ميلۋوكي قالاسىنىڭ تۇرعىنى ماسون حرامىنا كەلۋشىلەردى اتقىلاماق نيەتتە بولعان.
قۇقىق قورعاۋ ورگاندارىنىڭ اقپاراتى بويىنشا, فەدەرالدىق تەرگەۋ بيۋروسى قىزمەتكەرلەرىنە جاپپاي كىسى ولتىرۋگە تالپىنىستىڭ الدىن الۋدىڭ ءساتى تۇسكەن. 23 جاسار سامي موحاممەد حامزەح دىبىس تۇنشىقتىرعىشى بار ەكى اۆتوماتتى ۆينتوۆكا ساتىپ الماق بولعان جەرىندە قولعا تۇسكەن. ونىڭ قىلمىستى ىسكە بارماق بولعان ويى تەلەفون ارقىلى سويلەسكەن كەزدە ءمالىم بولىپ قالعان كورىنەدى. ول وسىلايشا ءوز اتىن بۇكىل الەمگە تانىتپاق بولىپتى.
ينتەرنەت ماتەريالدارى نەگىزىندە ازىرلەندى.