الماتى. 28 قاڭتار. وسى جىلدىڭ سوڭىنا قاراي الماتى قالاسى ءوز باقشالارىندا وسكەن قيار, قىزاناقتاردى پايدالاناتىن بولادى. بۇل تۋرالى egemen.kz ءتىلشىسى حابارلادى.
وسى ۋاقىتقا دەيىن شاھار تۇرعىندارىن جاڭا پىسكەن, بالعىن كوكونىس, جيدەكتەرمەن قامتاماسىز ەتۋ وزەكتى ماسەلە بولىپ كەلدى. بۇل ماسەلە قىس ايلارىندا كوكونىستىڭ باعاسى شارىقتاپ, 4-5 ەسەگە قىمباتتاپ, ودان دا كوكەيكەستى بولا تۇسەدى.
تولايىم العاندا الماتى تۇرعىندارى جىلىنا كەم دەگەندە 48,6 توننا, ونىڭ ىشىندە 34 توننا قىزاناق, 14,6 توننا قياردى قاجەت ەتەدى.
ال قاراشا مەن ساۋىردەگى ماۋسىم ارالىعىندا قالاعا ەلىمىزدىڭ وڭتۇستىك وڭىرلەرىندە وزبەكستان مەن قىتايدا وسىرىلگەن كوكونىستەر يمپورتتالادى. ماسەلەن, تەك وتكەن 2015 جىلى قىتايدان تاسىمالدانعان كوكونىس 7,2 توننانى قۇراعان. بىراق وسىعان قاراماستان وتاندىق تاۋار وندىرۋشىلەر قالانىڭ قاجەتتىلىگىن تولىق قامتاماسىز ەتە المايدى.
سوندىقتان الماتى قالالىق اكىمشىلىگى وسى ماسەلەنى نازاردا ۇستاپ, 50 گەكتار كولەمىندە جىلىجاي كەشەندەرىن سالۋدى قولعا الدى. ءدال قازىرگى تاڭدا 17 گەكتارلىق جىلىجاي كەشەنىنىڭ قۇرىلىسى باستالدى. بۇل نىسان وسى جىلدىڭ قىركۇيەگىنە قاراي پايدالانۋعا بەرىلەتىن بولادى.
اتالمىش كەشەن جۇمىسقا كىرىسكەن كەزدە جىلىنا 8 تونناعا جۋىق بالعىن كوكونىسپەن قامتاماسىز ەتە الادى. بۇل قالانىڭ جالپى قاجەتتىلىگىنىڭ 16 پايىزىن قۇرايدى.
ايناش ەسالي.
دەرەك, سۋرەت: egemen.kz.