استانا. 27 قاڭتار. بۇگىن قۇرلىقتىق حوككەي ليگاسى شەڭبەرىندە استانانىڭ «بارىسى» چەليابىنىڭ «تراكتورىن» قابىلدادى. سايىستىڭ پلەي-وفف ساتىسىنا جولداما الۋ ءۇشىن بارىن سالعان استانالىقتار ويىن سوڭىنداعى بۋلليتتەن 5:4 ەسەبىمەن جەڭىسكە جەتتى. بۇل تۋرالى egemen.kz ءتىلشىسى حابارلادى.
اتالعان ماتچ ليگانىڭ تۇراقتى چەمپيوناتى اياسىندا «بارىستىڭ» بيىلعى ماۋسىم بارىسىندا ءوز ايدىنىنداعى سوڭعى ويىنى ەكەنىن اتاپ وتكەن ءجون. كەزدەسۋ ايدىن يەلەرىنىڭ شابۋىلىمەن باستالدى. ناتيجەسىندە 4-مينۋتتا ويىنشى باسىمدىعىن جۇزەگە اسىرعان استانالىقتار نايدجەل دوۋستىڭ كومەگىمەن ەسەپ اشتى. ال 13-مينۋتتا ءبىزدىڭ كوماندا ساپىنان رومان ستارچەنكو تورەشى بەلگىلەگەن ءبۋلليتتى ءساتتى ورىنداپ, ەسەپتى ەسەلەدى. ارادا ءتورت مينۋت وتكەندە, «تراكتور» ويىنشى باسىمدىعىن پايدالانىپ, اندرەي پوپوۆ مەرگەندىگىمەن كوزگە ءتۇستى. الايدا, 19-مينۋتتا رومان ساۆچەنكو تاعى دا «بارىستى» ەكى شايبا ايىرماسىمەن العا شىعاردى.
ەكىنشى كەزەڭنىڭ العاشقى ءۇش مينۋتى ەلوردالىقتار ءۇشىن ناعىز سىن ساعاتى بولدى. كەزەڭ باستالا سالىسىمەن العا ۇمتىلعان رەسەيلىكتەر اينالدىرعان 52 سەكۋندتىڭ ىشىندە ءبىزدىڭ قاقپاعا ءۇش شايبا ەنگىزدى. الدىمەن, 23-مينۋت باستالعان تۇستا تاعى دا ءبىر ويىنشىسى ارتىق بولعان «تراكتور» حوككەيشىلەرى انتون گلينكيننىڭ ناتيجەلى سوققىسىمەن ەكىنشى شايبالارىن سوقتى. ارادا بار بولعانى 20 سەكۋند وتكەندە, مارتين رۋجيچكا تارازى باسىن تەڭەستىردى. وسى گولدان كەيىن «بارىستىڭ» باس جاتتىقتىرۋشىسى اندرەي نازاروۆ قاقپاشى يان لاتسونىڭ ورنىنا پاۆەل پولۋەكتوۆتى شىعاردى. دەگەنمەن, پاشا دا ايدىنعا اياعى تيگەن بويدا قاقپادان شايبا الىپ شىعۋعا ءماجبۇر بولدى. ياعني, رۋجيچكانىڭ گولىنان كەيىن 32 سەكۋند ۋاقىت وتكەندە, ماكسيم ياكۋتسەنيا ەسەپتى «تراكتوردىڭ» پايداسىنا 4:3-كە جەتكىزىپ, كومانداسىن العا شىعاردى. ۇزىلىسكە دەيىن وسى ەسەپ ساقتالدى.
سوڭعى بولىكتە «بارىس» ويىنشىلارى ساۋاتتى قيمىلدادى. ناتيجەسىندە 51-مينۋتتا داستين بويد قارسىلاستار قاقپاسىن ءدال كوزدەپ, ەسەپتى تەڭەستىردى. كەزدەسۋدىڭ نەگىزگى ۋاقىتىندا ەسەپ وزگەرمەي, كوماندالار وۆەرتايمدا سىنعا ءتۇستى. بۇل ۋاقىتتا دا ءبىرىن ءبىرى الا الماعان «بارىس» پەن «تراكتور» جەڭىمپازدى انىقتاۋ ءۇشىن ويىن سوڭىنداعى بۋلليتكە جۇگىندى. ال اتالعان سىندا استانالىقتاردىڭ جولى بولىپ, «بارىس» ماڭىزدى جەڭىسكە قول جەتكىزدى.
بۇگىندە «بارىس» 80 ۇپايمەن شىعىس كونفەرەنتسياسىندا 7-ورىندا كەلەدى. ال 8-ورىندا تۇرعان «اۆتوموبيليستە» 79 ۇپاي بولسا, 9-ساتىداعى «نەفتەحيميكتىڭ» قورجىنىندا 78 ۇپاي بار. ودان بولەك, بۇل ەكى كوماندانىڭ بىزدەن ءبىر ويىنى كەم ەكەنىن دە ەسكەرگەنىمىز ءجون.
ەندى ەلوردالىقتار ليگانىڭ تۇراقتى چەمپيوناتى شەڭبەرىندە 5 كەزدەسۋ وتكىزەدى. نازار اۋدارارلىعى, بەس ويىن دا قوناقتا وينالادى. سوندىقتان سايىستىڭ پلەي-وفف ساتىسىنا ءوتۋ ءۇشىن ءبىزدىڭ جىگىتتەرگە قالعان ءار ماتچتان ۇپاي الۋ كەرەك.
«بارىس» كەلەسى كەزدەسۋىن 1 اقپاندا ۋفادا جەرگىلىكتى «سالاۆات يۋلاەۆپەن» وتكىزەدى. ال تۇراقتى چەمپيونات 18 اقپاندا اياقتالادى.
ەلامان قوڭىر.
دەرەك: egemen.kz.
سۋرەت: hcbarys.kz.