پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىن سايلاۋ ناۋقانى ۇكىمەتتىك ەمەس ۇيىمدار جۇمىسىن بەلسەندى ەتە ءتۇستى. وتكەن سەنبى كۇنى ىسكەر ايەلدەر قاۋىمداستىعىنىڭ پرەزيدەنتى راۋشان سارسەمباەۆا مەن دىندەردى زەرتتەۋ ورتالىعى قاۋىمداستىعىنىڭ ديرەكتورى يۋليا دەنيسەنكونىڭ ورتالىق كوممۋنيكاتسيالار قىزمەتىندە وتكىزگەن بريفينگى سونىڭ زاڭدى كورىنىسىندەي بولدى.
«الداعى وتەتىن سايلاۋ ەلىمىزدەگى ەڭ ماڭىزدى وقيعا بولىپ تابىلادى», دەپ باستادى ءوزىنىڭ ءسوزىن ىسكەر ايەلدەر قاۋىمداستىعىنىڭ پرەزيدەنتى. ونىڭ پايىمىنشا, جاھاندىق احۋالدىڭ شيەلەنىسكەن جاعدايىندا بۇل – ستراتەگيالىق تۇرعىدان ۇتىمدى شەشىم. ونىڭ ۇستىنە, ۇكىمەتتىك ەمەس ۇيىمدار مەن ساياسي كۇشتەردىڭ سايلاۋ ناۋقانىنا بەلسەندى قاتىسۋىنا, سونىمەن دە ەلباسىنىڭ الدىمىزعا مىندەت ەتىپ قويعان «100 ناقتى قادام» ۇلت جوسپارىنداعى رەفورمانى جۇزەگە اسىرۋعا جاڭا مۇمكىندىك تۋادى. ويتكەنى, ايەلدەر قاۋىمى ەلىمىز تاۋەلسىزدىگىن العان كەزدەن باستاپ پرەزيدەنت رەفورمالارىنىڭ ورىندالۋىنا ءوز ۇلەستەرىن قوسىپ كەلەدى.
مەملەكەت تاراپىنان جۇزەگە اسىرىلىپ كەلە جاتقان قولداۋدىڭ ارقاسىندا ايەلدەر ورتا جانە شاعىن بيزنەستى وركەندەتۋگە ەرەكشە ىقپال ەتۋدە ەكەن. «مەن ءوزىم استانا ماڭىنداعى قوسشى كەنتىندە بولىپ, جاڭادان اشىلعان جيھاز شىعارۋ تسەحىن بارىپ كوردىم. ءبىز داعدارىس پەن قيىنشىلىقتىڭ سالدارىنان جۇمىس ورىندارى قىسقارۋدا دەيمىز. ال مەن كورگەن تسەح 60 ادامعا جۇمىس تاۋىپ بەرىپ قانا قويماي, جاتاقحانامەن دە قامتاماسىز ەتىپ وتىر. مۇنداي مىسال ەلىمىز بويىنشا جەتكىلىكتى ەكەنى ءسوزسىز», دەدى راۋشان بىرگەبايقىزى.
سوندىقتان دا الداعى سايلاۋ ايەلدەر قاۋىمىنا ءوزىنىڭ ساياسي جانە قوعامدىق الەۋەتتەرىن كورسەتىپ, بەلسەندىلىگىن تانىتاتىن, سونىمەن قاتار, قولدارىنان بارلىعى دا كەلەتىندىگىن دالەلدەيتىن كەز ەكەندىگى دە ەرەكشە اتالدى. ولاي بولسا, قوعامنىڭ بارلىق مۇشەلەرى بولىپ جۇمىلا كىرىسىپ, ەڭبەك ەتۋ ارقىلى قازىرگى الەمدە ورىن الىپ جاتقان بارلىق جاعىمسىز فاكتورلارعا قارسى تۇرۋعا مۇمكىندىك مول. وسى رەتتە, ايەلدەر قاۋىمى دا بۇل باعىتتا بارلىق كۇش-جىگەرلەرىن سارقا جۇمسايتىن بولادى.
بۇدان كەيىن ءسوز العان يۋ.دەنيسەنكو بىلاي دەدى: «ەگەر 18 جاسقا تولعان بريتانيالىق سەبەپسىز سايلاۋدان قالىس قالاتىن بولسا, وندا ول كەلەسى سايلاۋعا قاتىسپايىنشا وعان پاسپورت بەرىلمەيدى. ارينە, بىزدە ونداي جوق. ويتكەنى, قازاقستان ازاماتتارى سوڭعى وتكەن پرەزيدەنتتىك سايلاۋدا اسقان بەلسەندىلىك تانىتىپ, بارلىعى دەرلىك ساياسي ناۋقانعا ءبىر كىسىدەي قاتىستى. سوندىقتان دا الداعى وتەتىن پارلامەنتتىك سايلاۋدا دا بەلسەندىلىك جوعارى بولادى دەگەن سەنىم بار».
ەل تۇرعىندارى سايلاۋدى وزدەرىنىڭ ساياسي جانە ازاماتتىق قۇقىقتارىن جۇزەگە اسىرۋ تەتىگى دەپ قابىلدايتىندىعىن جەتكىزگەن يۋليا ولەگوۆنا بۇل ەلىمىز قوعامدىق-ساياسي ءومىرىنىڭ تامىر سوعىسى ەكەنىن, ساياساتتانۋشىلاردىڭ ايتىپ جۇرگەنىندەي, حالىق پەن بيلىك ىنتىماعىنىڭ كورىنىسى بولىپ تابىلاتىنىن اتاپ ءوتتى. «جاھاندىق داعدارىس كەزىندە وتەتىن ايتۋلى شارا ەل ومىرىنە ايتىرلىقتاي وزگەرىستەر الىپ كەلەدى. سايلاۋدى كەزەكتەن تىس وتكىزۋ تۋرالى شەشىم تەرەڭ رەفورمالار جۇرگىزۋ تۇرعىسىنان جانە الەمدىك قارجى نارىعىنداعى تاۋەكەلدەرگە بايلانىستى ماڭىزدى بولا تۇسەدى. ەكونوميكالىق احۋالدىڭ كەزەكتەن تىس سايلاۋ وتكىزۋگە نەگىزگى سەبەپ بولۋى دا سوندىقتان», دەدى يۋ.دەنيسەنكو.
ونىڭ ۇستىنە, پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋلارىن بىرگە وتكىزۋ قارجى ۇنەمدەۋ مەن ۇيىمداستىرۋ شارالارىنا دا وڭ ىقپال ەتەتىنى كولدەنەڭ تارتىلدى. وسى تۇرعىدان كەلگەندە, دەپۋتاتتار تاراپىنان جاسالعان بەسىنشى شاقىرىلعان قازاقستان رەسپۋبليكاسى پارلامەنتىنىڭ ءماجىلىسىن تاراتۋ جانە كەزەكتەن تىس سايلاۋ وتكىزۋ تۋرالى ۇندەۋدى قولداۋ وتە دۇرىس ۇستانىم بولاتىنى اتاپ كورسەتىلدى.
اسقار تۇراپباي ۇلى,
«ەگەمەن قازاقستان».