تاراز. 15 قاڭتار. «تاراز – ارەنا» سپورت كەشەنىندە ەرلەر جانە ايەلدەر اراسىندا گرەك-ريم جانە ەركىن كۇرەستەن قازاقستان چەمپيوناتى جالاۋىن كوتەردى. بۇل تۋرالى egemen.kz ءتىلشىسى حابارلادى.
ايتۋلى باسەكەگە ەلىمىزدىڭ بارلىق ايماعىنان 600-گە جۋىق بالۋان قاتىسىپ جاتىر. العاشقى كۇنى گرەك-ريم كۇرەسى بويىنشا بەس سالماقتىڭ ۇزدىكتەرى انىقتالدى. 59 كيلودا جامبىلدىق داستان ۇسكەمبەكوۆ فينالدا اقمولالىق مەيىربەك دونەنبەكوۆتى ۇتىپ, جامبىل وبلىسى قۇراماسىنىڭ قورجىنىنا العاشقى التىن مەدالدى سالدى. وسى سالماقتا تاعى ءبىر جامبىلدىق جانسەرىك سارسەنبيەۆ ءۇشىنشى ورىن ءۇشىن تالاستا اقمولالىق ساعدات تۇرباەۆتان شەبەرلىگىن اسىرىپ, قولا جۇلدەنى يەلەندى. 71 كيلو سالماقتا شەشۋى بەلدەسۋگە القىنباي جەتكەن جامبىلدىق ءابۋناسىر ومىرزاق التىن جۇلدە جولىندا ءساتتى ونەرىن جالعاستىرا المادى. ول فينالدا شىعىس قازاقستاندىق دارحان باياحمەتوۆكە جول بەرىپ, كۇمىس جۇلدەنى قاناعات تۇتتى.
75 كيلودا لوندون وليمپياداسىنىڭ قولا جۇلدەگەرى, الماتى قالاسىنىڭ بالۋانى دانيل گادجيەۆ بۇل جولى دا بىلگەنىنەن جاڭىلمادى. ول شەشۋى بەلدەسۋدە قوستانايلىق قارسىلاسى تەمىرلان سادۋكاەۆتى ايقىن ۇتىپ, بۇل سالماقتىڭ №1 سپورتشىسى ەكەنىن تاعى ءبىر دالەلدەدى. 80 كيلو سالماقتا الماتى وبلىسىنىڭ وكىلى اسحات دىلمۇحامبەتوۆ استانالىق سۇلتانبەك شالاباەۆتى ۇتىپ, چەمپيون اتاندى. 98 كيلو سالماقتا دا الماتى وبلىسىنىڭ بالۋانى مارعۇلان اسەمبەكوۆ التىن تۇعىرعا كوتەرىلدى. ول وسىمەن 12-رەت ەل چەمپيونى اتانىپ وتىر.
سەنبى كۇنى ءتۇس قايتا بوز كىلەمگە ەركىن كۇرەس شەبەرلەرى شىعادى. بۇل كۇنى 74 كيلودا لوندون وليمپياداسىنىڭ قولا جۇلدەگەرى اقجۇرەك تاڭاتاروۆ, ەل چەمپيونى مەيىرجان ءاشىروۆ بوز كىلەمگە كوتەرىلەتىن بولادى.
ورالحان ءداۋىت.
دەرەك: egemen.kz
سۋرەت: اقادىل رىسماحان.