ەلباسىنىڭ «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسىن ەلىمىزدەگى بارشا حالىقتى ءبىر ماقسات جولىندا جۇدىرىقتاي جۇمىلدىرىپ, ورتاق ىسكە, ورتاق بولاشاققا باستايتىن باستاما رەتىندە قابىلداپ وتىرمىز.
بىلتىر 26 ءساۋىر كۇنى قازاقستان حالقى ءوزىنىڭ جارقىن بولاشاعى ءۇشىن اسا ماڭىزدى, تاريحي تاڭداۋ جاساپ, قازاقستان رەسپۋبليكاسىنىڭ پرەزيدەنتى ەتىپ زاماننىڭ دا, ۋاقىتتىڭ دا, حالىقتىڭ دا تاڭداۋى تۇسكەن تۇلعا نۇرسۇلتان نازارباەۆتى سايلاعان بولاتىن. سايلاۋ وتكەن بويدان ەلباسى 5 ينستيتۋتتىق رەفورما جاساۋدى كوزدەيتىن «100 ناقتى قادام» ۇلت جوسپارىن ۇسىنعان ەدى. مەملەكەت باسشىسى ۇلت جوسپارىندا تاۋەلسىز قازاقستاننىڭ بولاشاققا ءىلگەرىلەيتىن 100 قادامىن ناقتى بەلگىلەپ, ەلىمىزدەگى جاڭعىرتۋ ۇدەرىسىنىڭ جاڭا پاراديگماسىن ۇسىندى.
ال بيىلعى 1 قاڭتاردان باستاپ «5 ينستيتۋتتىق رەفورمانى جۇزەگە اسىرۋ بويىنشا 100 ناقتى قادام» – ۇلت جوسپارىن ورىنداۋدىڭ پراكتيكالىق كەزەڭى باستالدى. پارلامەنت مەملەكەت, ەكونوميكا جانە قوعامدى دامىتۋعا ارنالعان 59 زاڭ قابىلداپ, ۇلتتىق زاڭناماعا تاريحىمىزدا بۇرىن-سوڭدى بولماعان وزگەرىستەر ەنگىزىلدى. مۇنىڭ بارلىعى ءبىزدىڭ قازاقستاندىق ارمانىمىز – ءححى عاسىردا كوشباسشى وتىز ۇلتتىڭ ءبىرى بولۋعا قول جەتكىزۋگە باعىتتالعان. ەڭ باستىسى, بەس رەفورمانىڭ ارقايسىسى بويىنشا ءىس-قيمىلدىڭ جول كارتاسى جاسالىنىپ, ولاردى دايەكتىلىكپەن جۇزەگە اسىرۋ جوسپارلانعان.
مەملەكەتىمىزدە جۇرگىزىلەتىن وسى ينستيتۋتتىق رەفورمالاردىڭ باستى مازمۇنى – ەلدى بىرىكتىرۋشى قۇندىلىقتاردى نەگىز ەتكەن «ماڭگىلىك ەل» يدەياسى. «ماڭگىلىك ەل» يدەياسى اياسىندا قوعامدا جاڭاشا يدەولوگيالىق سانا قالىپتاستىرۋ قاجەتتىلىگى تۋىنداۋدا.
ەلدى بىرىكتىرۋشى قۇندىلىقتار دەگەنىمىز – ادىلدىككە نەگىزدەلگەن ازاماتتىق قوعام قۇرۋ, ءبىلىم الۋ, ەڭبەكسۇيگىشتىك, زايىرلىلىق پەن توزىمدىلىك, ادامشىلىق, يماندىلىق. ەلباسى «ەلدى بىرىكتىرۋشى ورتاق قۇندىلىقتاردى ەتنوستىق مىنەز-ق ۇلىق مودەلدەرىنەن جوعارى قويۋعا قول جەتكىزۋىمىز كەرەك» دەگەن بولاتىن. ازاماتتىق قوعام دا وسىنداي ورتاق ادامزاتتىق قۇندىلىقتارعا سۇيەنە قۇرىلۋى قاجەت. وسى رەتتە «ادامزاتتىڭ ءبارىن ءسۇي باۋىرىم دەپ» دەگەن دانىشپان حاكىم ابايدى تىڭداعانىمىز ءجون.
مۇنداعى باستى يدەيا – ەلىمىزدەگى ۇلتتاردى بىرىكتىرەتىن ورتاق, ءبىرتۇتاس بولاشاققا قادام باسۋ. قازاق حالقى مەملەكەتتى قۇراۋشى ۇلت رەتىندە «ءبىرتۇتاس بولاشاق» يدەياسى اياسىندا ءوز اينالاسىنا وزگە ۇلت وكىلدەرىن توپتاستىرىپ, بىرلىككە شاقىرۋى, بولاشاققا بىرگە جوسپار قۇرۋدى ۇيلەستىرۋى قاجەت.
رەفورمانىڭ تاعى ءبىر باعىتى – اشىق, ترانسپارەنتتىك مەملەكەت قۇرۋ. ياعني, مەملەكەتتىك ۇيىمدار مەن قۇرىلىمداردى قاراپايىم حالىقپەن جاقىنداستىرۋ. حالىققا ەسەپ بەرۋشى, حالىقتىڭ الدىندا تىكەلەي جاۋاپتى مەملەكەت قالىپتاستىرۋ. بۇل باعىتتاعى جوسپارلار ورىندالعاندا ءاربىر ازامات قوعامداعى بارلىق ءىستەرگە ارالاسىپ, مەملەكەتتەگى ءوزىنىڭ ءرولىن ناقتى سەزىنەتىن بولادى. سوندىقتان, ەلباسىنىڭ ازاماتتىق قوعام وكىلدەرىنىڭ بيۋدجەت قارجىسىن بولۋگە قاتىسۋىن, قوعامنىڭ ءوزىن-ءوزى رەتتەۋىن ەنگىزۋدى, ازاماتتىق قوعام ينستيتۋتتارىنا بيلىك وكىلەتتىلىكتەرىن بەرە وتىرىپ, مەملەكەتتىك ورگانداردىڭ ارالاسۋ ايماعىن قىسقارتۋ تۋرالى ايتقاندارىنىڭ ماڭىزى زور.
ەلباسى «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسىندا «ءبىز كوپتەگەن سىناقتارعا ابىرويلى توتەپ بەردىك, شىنىقتىق, رۋحىمىزدى كۇشەيتتىك. ءبىز جاڭا قازاقستاندى – ۇلى دالا ەلىن قۇردىق. ۇلت جوسپارىن ورىنداي وتىرىپ, ءبىز ءوزىمىزدىڭ ۇلتتىڭ ورلەۋ ءداۋىرىنىڭ كوكجيەكتەرىن كەڭەيتەمىز, ءوزىمىز تاۋەلسىزدىك جىلدارى ىشىندە قول جەتكىزگەن جانە بىزگە جاھاندىق دامۋ بەرگەن بارلىق مۇمكىندىكتەردى پايدالانامىز... ءبىز قازاقستاننىڭ وسىناۋ تاريحي تاعدىرىنا سەنەمىز. ءبىز ءوزىمىزدىڭ قازاقستاندىق ارمانىمىزدىڭ ورىندالۋىنا جانە قازاقستاننىڭ وركەندەۋىنە سەنىمدى تۇردە قول جەتكىزەتىن بولامىز!», – دەپ ايقىنداي تۇسكەن.
سوندىقتان جۇزەگە اسىرىلاتىن ۇلتتىق جوسپاردى ەل ىرىسىن ەسەلەپ ارتتىرۋعا, ەكونوميكامىزدىڭ دامۋ قارقىنىن ءوسىرىپ, حالىقتىڭ ءال-اۋقات دەڭگەيىن كوتەرۋگە, باسقارۋ جۇيەسىنىڭ ادىلەتتىلىگى مەن زاڭنىڭ ۇستەمدىگىن قالىپتاستىرۋعا, ءبىلىم مەن عىلىمنىڭ دامۋىنا, ەلىمىزدىڭ ىنتىماعىنىڭ, ءبىرتەكتىلىگىنىڭ, وتانسۇيگىشتىك رۋحىنىڭ كەمەلدەنۋىنە باستايتىن باعدارلاما رەتىندە قابىلداپ, ونى جۇزەگە اسىرۋعا جۇمىلا كىرىسۋىمىز قاجەت.
باۋىرجان ەلەۋسىنوۆ,
«ورلەۋ» باۇو اق فيليالى قىزىلوردا وبلىسى بويىنشا پەداگوگيكالىق
قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ ديرەكتورى, پروفەسسور.
قىزىلوردا.