ساندىقتاۋ اۋدانىنداعى پەتروۆكا اۋىلىنىڭ تۇرعىندارى جاڭا جىلدا ايرىقشا قۋانىشقا يە بولدى. جۋىردا مۇندا جاڭارتىلعان مادەنيەت وشاعى پايدالانۋعا بەرىلدى.
اۋىل قۋانىشىنا قۇتتى بولسىن ايتقان اۋدان اكىمى اسىلبەك يسماعامبەتوۆ بۇل كلۋبتىڭ جەرگىلىكتى اۋىلشارۋاشىلىق قۇرىلىمدارىنىڭ قارجىسى ارقىلى اشىلىپ وتىرعانىنا ريزاشىلىق ءبىلدىردى. الەۋمەتتىك ماڭىزدى نىساننىڭ بوي كوتەرۋىنە «ساندىقتاۋ-استىق», «بالقىشىن» اسىل تۇقىمدى مال زاۋىتى» جانە «جاباي» جاۋاپكەرشىلىگى شەكتەۋلى سەرىكتەستىكتەرى دەمەۋشىلىك كومەك كورسەتتى.
جاڭا مادەنيەت وشاعى 100 ورىنعا لايىقتالعانىمەن, سالتانات شاراسىنا كورشى اۋىلداردىڭ ونەرپازدارى دا قاتىسىپ, ارنايى كونتسەرتتىك باعدارلامالارىن ۇسىندى. اۋدان اكىمدىگى تاراپىنان سىي-ساۋعالار جاسالدى.
وسى ورايدا, اۋداندا سوڭعى ءبىر ايدا مەملەكەت-جەكەمەنشىك ارىپتەستىگى باستاماسىمەن اۋىلداردا فەلدشەرلىك-اكۋشەرلىك پۋنكت, كىتاپحانا, كلۋب جانە دۇكەن كۇردەلى جوندەۋدەن وتكىزىلگەنىن اتاپ وتكەن ءجون. بۇل جۇمىستارعا 30 ميلليون تەڭگە قارجى جۇمسالدى.
باقبەرگەن امالبەك,
«ەگەمەن قازاقستان».
اقمولا وبلىسى,
ساندىقتاۋ اۋدانى.