قارسىلاسىنىڭ مىسى باسىم بولدى

سارسەنبى كۇنى قۇرلىقتىق حوككەي ليگاسى شەڭبەرىندە استانانىڭ «بارىسى» ياروسلاۆلدە جەرگىلىكتى «لوكوموتيۆپەن» كەزدەسىپ,   1:4 ەسەبىمەن ەسە جىبەردى. ماتچتىڭ ءبىرىنشى كەزەڭىندە ەسەپ اشىلمادى. كەلەسى بولىكتە جانكۇيەرلەر ءبىر عانا گولدىڭ كۋاسى بولدى. اتاپ ايتقاندا, 31-مينۋتتا ايدىن يەلەرى ساپىنان سەرگەي كونكوۆ مەرگەندىگىمەن كوزگە ءتۇستى. ال سوڭعى كەزەڭدە ءتورت بىردەي شايبا سوعىلدى. وكىنىشكە قاراي, سونىڭ ۇشەۋى ءبىزدىڭ قاق­پاعا ەندى. الدىمەن, 53-مينۋتتا «لوكوموتيۆ» ويىنشىسى دە­نيس موسالەۆ ناتيجەلى سوققى جاساسا, ارادا بار بولعانى 38 سەكۋند وتكەندە ەگور اۆەرين ەسەپتى 3:0-گە جەتكىزدى. وسىدان كەيىن «بارىس» حوككەي­شىلەرى لەزدە ەسە قايتارىپ, 54-مينۋتتا كوماندا كاپيتانى برەندون بوچەنسكيدىڭ كومەگىمەن ەسەپ ايىرماسىن قىسقارتقان بولاتىن. ار­تىنشا ويىندى قۇتقارىپ قال­­ماق بولعان جاتتىقتىرۋشى اندرەي نازاروۆ قاقپاشىنى التىنشى ويىنشىعا الماستىردى. الايد­ا, ونىڭ بۇل ارەكەتىنەن تۇك شىق­پادى. ەسەسىنە, رەسەيلىكتەر بوس قاق­پاعا ءتورتىنشى شايبانى ەنگىزىپ, ويىننىڭ نۇكتەسىن قويدى. بۇگىندە 50 ويىننان 72 ۇپاي جيعان ەلوردالىقتار شىعىس كونفەرەنتسياسىندا 7-ورىندا كەلەدى. ءبىزدىڭ ۇجىم كەلەسى ويىنىن 17 قاڭتاردا وينايدى. ول كۇنى «با­رىس» ءوز ايدىنىندا نيجني نوۆ­گورودتىڭ «تورپەدوسىن» قا­بىل­دايدى. ەلامان قوڭىر, «ەگەمەن قازاقستان».