استانا. 14 قاڭتار. اقش-تا ەكى ادام دجەكپوت سوماسى 1,5 ملرد. دوللار بولاتىن Powerball لوتەرەياسىن ۇتىپ الدى. بۇل تۋرالى Interfax اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
Associated Press-ءتىڭ حابارلاۋىنشا, جۇلدەلى بيلەتتەر اقش-تىڭ فلوريدا جانە تەننەسسي شتاتتارىندا ساتىلعان. وسىلايشا امەريكالىق Powerball لوتەرەياسىنىڭ جەڭىمپازدار سانى ءۇش ادامعا جەتىپ وتىر. رەكوردتىق جۇلدە قورىنا يە بولعان جەڭىمپازدار 1,5 ملرد. كولەمىندەگى دجەكپوتتى ءوزارا بولىسەدى. اگەنتتىكتىڭ مادىمدەۋىنشە, تاياۋ ۋاقىتتا جەڭىمپازداردىڭ قاتارى كوبەيۋى مۇمكىن. جۇلدەلى بيلەت يەلەرى تۋرالى ازىرگە اقپاراتتار جاسىرىن ۇستالۋدا. CNN تەلەارناسى حابارلاعانداي, لوتەرەيانى ۇيىمداستىرۋشىلار دجەكپوتتى ۇتىپ العان جەڭىمپازدارعا ازىرگە قۇپيالىق ساقتاپ, جۇلدەلەرىن الىپ كەتپەس بۇرىن قارجى كەڭەسشىسىن جالداۋعا كەڭەس بەرگەن.
بۇدان بۇرىن قۇتتى بيلەتتەردىڭ ءبىرى كاليفورنياداعى چينو-حيللس قالاسىندا ساتىپ الىنعانى تۋرالى حابارلانعان ەدى. ۇتىس بيلەتىنىڭ ساندارى 4-8-19-27-34 جانە 10 بولعان. لوتەرەيا وكىلدەرىنىڭ ءبىرىنىڭ سوزىنە قاراعاندا, بۇل ءساتتى بيلەت 7-Eleven دۇكەنىندە ساتىلعان ەكەن. ەرەجە بويىنشا, ساتۋشى دۇكەن بونۋس رەتىندە 1 ميلليون اقش دوللارىن الادى.
لوتەرەيا تالاپتارىنا سايكەس, جۇلدە ساندارى Powerball دەپ اتالاتىن بەس اق ءتۇستى جانە ءبىر قىزىل ءتۇستى شارلارمەن سايكەس كەلگەن ادامعا بۇيىرادى. Powerball لوتەرەياسى اقش-تىڭ 44 شتاتىندا, ۆاشينگتوندا (كولۋمبيا وكرۋگى), امەريكانىڭ ۆيرگينيا ارالدارىندا جانە پۋەرتو-ريكودا ويناتىلادى. بيلەت قۇنى 2 جانە 3 اقش دوللارى اراسىندا وزگەرىپ تۇرادى.
جەڭىمپاز دجەكپوتتى 30 جىل بويىنا ءبولىپ تە الا الادى, نەمەسە ءبارىن بىردەن الىپ كەتۋگە قۇقىلى. الايدا, دجەكپوتتىڭ ءبارىن بىردەن العان جاعدايدا جۇلدە قورى ازايادى. سالىق تولەگەننەن كەيىن باقىتتى جان وزىمەن بىرگە 930 ميلليون اقش دوللارىن قولما-قول ساناپ الادى. ساراپشىلار مۇنداي جۇلدەگە يە بولۋ 292,2 ميلليونعا شاققاندا 1 ادامعا عانا بۇيىرۋى مۇمكىن دەپ باعا بەردى.
ەستەرىڭىزگە سالا كەتەيىك, امەريكا تاريحىندا ەڭ قوماقتى جۇلدە قورى 656 ميلليون اقش دوللارى بولعان ەدى. بۇل قارجىنى 2012 جىلى MegaMillions ۇتىس بيلەتىنىڭ يەگەرى جەڭىپ الدى.
ەلامان قوڭىر.
دەرەك: Interfax.ru.
سۋرەت: reuters.