استانا. 14 قاڭتار. استانادا ينتەللەكتۋالدىق بايلانىس ورتالىعى اشىلدى. ونىڭ جۇمىس جوسپارى جانە استانالىق سمارت-باستامالار تۋرالى شاھار باسشىسىنىڭ ورىنباسارى ءنۇرالى اليەۆ بايانداپ بەردى. بۇل تۋرالى استانا قالاسى اكىمدىگىنىڭ رەسمي سايتى astana.gov.kz-كە سىلتەمە جاساعان egemen.kz ءتىلشىسى حابارلادى.
استانا قالاسىنىڭ ينتەللەكتۋالدىق بايلانىس ورتالىعى ەلوردا تۇرعىندارىنىڭ وتىنىشتەرىن نەعۇرلىم ءتيىمدى وڭدەۋگە مۇمكىندىك بەرەدى. وسىلايشا جەتىلدىرىلگەن بايلانىس ورتالىعى بىردەن 60 قوڭىراۋعا دەيىن قابىلدايدى.
اكىم ورىنباسارىنىڭ ايتۋىنشا, وپەراتوردىڭ قاتىسۋىنسىز اۆتوماتتى تۇردە وزەكتى اقپارات بەرۋ مۇمكىندىگىنىڭ ارقاسىندا 50 مىڭعا جۋىق ءوتىنىش وڭدەلدى, بۇل جالپى قوڭىراۋلار سانىنىڭ 62 پايىزىن قۇرايدى.
2015 جىلدىڭ تەك جەلتوقسان ايىندا بايلانىس ورتالىعىندا 6 وپەراتور جۇمىس ىستەگەن كەزدە 80 مىڭعا جۋىق ءوتىنىش وڭدەلدى, بۇل 2014 جىلدىڭ سايكەس مەرزىمىمەن سالىستىرعاندا, 2 ەسەگە كوپ. قازىرگى كەزدە وپەراتورلار سانى 15-كە جەتتى, بۇل استانالىق «109» قىزمەتىنىڭ تيىمدىلىگى مەن جەدەلدىگىن ارتتىرۋعا مۇمكىندىك بەرەدى.
بۇعان قوسا, ءنۇرالى اليەۆ: «بايلانىس ورتالىعىنىڭ ماقساتى وتىنىشتەردى تەك تەلەفون قوڭىراۋلارى, smart.astana.kz پورتالى جانە ەلەكتروندى پوشتا ارقىلى وڭدەۋ عانا ەمەس, ەندى استانا تۇرعىندارى ءوز وتىنىشتەرىن #astana109 حەشتەگىن كورسەتە وتىرىپ Facebook, Twitter جانە Instagram الەۋمەتتىك جەلىلەرى ارقىلى دا بەرە الادى. سونداي-اق, Astana 109 پاراقشاسىندا دا استانالىق ءبىلىم مەكەمەلەرىندە ساباقتىڭ بولۋ/بولماۋى تۋرالى حابارلامالار لەزدە جاريالاناتىنىن ايتا كەتۋ قاجەت. مۇنداي ءتاسىل حالىق تاراپىنان جوعارى باعا الۋدا. سوڭعى مالىمەتتەر بويىنشا, بار-جوعى ەكى تاۋلىكتىڭ ىشىندە Facebook جەلىسىنىڭ 5800-دەن استام قولدانۋشىسى بايلانىس ورتالىعىنىڭ رەسمي پاراقشاسىنا كىرگەن. اناعۇرلىم تانىمال الەۋمەتتىك پلاتفورما Instagram بولىپ تابىلادى. ول جەردە ساناۋلى ۋاقىتتا Astana 109 اككاۋنتىنا 4800-دەن استام جازىلۋشى تىركەلگەن», – دەدى.
بۇدان بولەك, جۋىردا استانا اكىمدىگى «استانا Innovations» اق بىرلەسە وتىرىپ, اۋا رايىنىڭ جاعدايلارىنا بايلانىستى مەكتەپتەردە ساباقتىڭ بولۋ/بولماۋى تۋرالى حابارلاما الۋدىڭ تاعى ءبىر سمارت-ءتاسىلىن ۇسىنادى.
«الداعى ەكى اپتادا استانالىق وقۋشىلاردىڭ اتا-انالارى Smart Astana موبيلدىك قوسىمشاسىنىڭ بەتا-نۇسقاسىن ءبىرىنشى بولىپ پايدالانىپ كورەدى. اتالعان قوسىمشا ساباقتىڭ بولماۋى تۋرالى push-حابارلامانى لەزدە الۋ فۋنكتسياسىمەن قولايلى بولىپ وتىر. بۇل تەك باسى عانا جانە «Smart استانانىڭ» الەۋمەتتىك-ماڭىزدى جوبالارى ەلوردا تۇرعىندارىنىڭ ءومىرىن بارىنشا جەڭىلدەتەتىنىنە سەنىمدىمىن», – دەدى ءنۇرالى اليەۆ.
وسىلايشا, العاشقى ەكى كۇننىڭ ىشىندە 18 000-نان استام ەلوردالىق اتا-انا مەن مۇعالىمگە Smart Astana قوسىمشاسى تاراتىلىپ, ورناتىلدى.
ايتا كەتەيىك, 2016 جىلعى 1 قاڭتاردان باستاپ «051-قىزمەت» مم نەگىزىندەگى استانا قالاسىنىڭ ينتەللەكتۋالدىق بايلانىس ورتالىعى تاجىريبەلىك پايدالانۋعا بەرىلدى. بۇل بارلىق كوممۋنالدىق-تۇرمىستىق سيپاتتاعى ماسەلەلەر بويىنشا ەلوردا تۇرعىندارىنىڭ وتىنىشتەرىن قابىلداۋدىڭ بىرىڭعاي ورتالىعى بولىپ تابىلادى.
ەلامان قوڭىر.
دەرەك, سۋرەت: astana.gov.kz.