استانا. 14 قاڭتار. تاراز گارنيزونىندا قورعانىس مينيسترلىگىنىڭ كوشپەلى القا ءماجىلىسى ءوتتى. وعان قورعانىس مينيسترلىگى باسشىلىعىنىڭ وكىلدەرى, دەپارتامەنتتەر مەن باسقارمالاردىڭ باسشىلارى, «وڭتۇستىك» وڭىرلىك قولباسشىلىعى قۇرامالارى مەن بولىمدەرىنىڭ باسشىلارى قاتىستى. بۇل تۋرالى egemen.kz ءتىلشىسى حابارلادى.
كوشپەلى وتىرىس پراكتيكاسى العاش رەت ەنگىزىلىپ وتىر. «وڭتۇستىك» وڭىرلىك قولباسشىلىعىندا وتكىزىلىپ جاتقانى دا جايدان-جاي ەمەس. ويتكەنى, وڭتۇستىك باعىت ستراتەگيالىق باعىتتاردىڭ ءبىرى بولىپ تابىلادى. وسىعان بايلانىستى, «وڭتۇستىك» وڭىرلىك قولباسشىلىعىنىڭ اسكەرلەرىنە قورعانىس مينيسترلىگىنىڭ, سونداي-اق مەملەكەت باسشىسىنىڭ تاراپىنان ەرەكشە كوڭىل بولىنەدى.
«وسى جىلى «وڭتۇستىك» وڭىرلىك قولباسشىلىعىندا العاشقى القا ءماجىلىسىن وتكىزۋىمىز كەزدەيسوق ەمەس». سەبەبى, بۇل جاۋىنگەرلىك, جەدەل-اۋماقتىق جانە جۇمىلدىرۋ جاعىنان ەڭ ءىرى قۇرالىم عانا ەمەس, سونىمەن بىرگە قارۋلى كۇشتەرى گەوساياسي اۋقىمدا ەلدى قورعاۋ جونىندە جاۋىنگەرلىك تاپسىرمالاردى ورىندايتىن ماڭىزدى ستراتەگيالىق شەپ», دەپ اتاپ ءوتتى قورعانىس ۆەدومستۆوسىنىڭ باسشىسى يمانعالي تاسماعامبەتوۆ.
اسكەرلەردىڭ جاۋىنگەرلىك ازىرلىگى مەن جاۋىنگەرلىك قابىلەتتىلىگى اسكەري ءتارتىپ پەن قۇقىقتىق ءتارتىپتىڭ جاي-كۇيىنە تىكەلەي بايلانىستى. «وڭتۇستىك» وڭىرلىك قولباسشىلىعىنىڭ اسكەرلەرىندەگى وسى تۇستاعى ماسەلەلەر بۇگىنگى وتىرىستىڭ نەگىزگى سەبەبى بولدى. وسىعان بايلانىستى, «وڭتۇستىك» وڭىرلىك قولباسشىلىعى قۇرامالارى مەن بولىمدەرىنىڭ اسكەري ءتارتىبى مەن قۇقىقتىق ءتارتىبىنىڭ جاي-كۇيى تۋرالى ماسەلە قاراۋعا ۇسىنىلدى.
«ۇدايى جاۋىنگەرلىك ازىرلىكتەگى بارلىق بولىمشەلەر جەدەل دەن قويۋدىڭ ۇجىمدىق كۇشتەرى رەجىمىندە ارەكەت ەتۋى ءتيىس. بۇل تۋرالى جوعارعى باس قولباسشى قارۋلى كۇشتەردىڭ باسشىلىق قۇرامىمەن جۋىرداعى كەزدەسۋى بارىسىندا ەرەكشە قاداپ ايتتى. بۇل فاكتى باسشىلىقتىڭ جوعارعى باس قولباسشىنىڭ تالاپتارىنا ساي كەلۋدى عانا ەمەس, جاۋىنگەرلىك قابىلەتتىلىكتىڭ جوعارى دارەجەسىندە بولۋعا مىندەتتەيدى», - دەپ ەرەكشە اتاپ ءوتتى قورعانىس ءمينيسترى يمانعالي تاسماعامبەتوۆ.
كوشپەلى القا ءماجىلىسىنىڭ ماڭىزدى اسپەكتىسى «وڭتۇستىك» وڭىرلىك قولباسشىلىعىن ءارى قاراي جەتىلدىرۋ جونىندە وزەكتى ماسەلەلەردى كوتەرۋ جانە شەشۋ بولعانىن ايتا كەتۋ قاجەت. سونداي-اق, تاربيە جۇمىسىنىڭ فۋنكتسيونالدىلىعى مەن پاندىك جۇيەلەندىرىلۋىن ارتتىرۋ ماسەلەلەرى قوزعالدى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.