قارۋلى كۇشتەردىڭ جاۋىنگەرلىك الەۋەتى ءبىر جارىم ەسەگە ۇلعايدى

استانا. 12 قاڭتار. 2015 جىلى قازاقستاننىڭ قارۋلى كۇشتەرىندە قابىلدانعان بارلىق شارالار ولاردىڭ جاۋىنگەرلىك الەۋەتىن 1,5 ەسەگە ۇلعايتۋعا مۇمكىندىك بەردى. بۇل تۋرالى egemen.kz ءتىلشىسى حابارلادى. وسى جىلى جۇمىس 6 نەگىزگى باعىت, ياعني, جاۋىنگەرلىك, جەدەل جانە جۇمىلدىرۋ دايارلىعى, قورعانىس-ونەركاسىبى كەشەنىن دامىتۋ, اسكەري ينفراقۇرىلىمنىڭ قۇرىلىسى, اسكەري ءبىلىم بەرۋ جۇيەسىن جەتىلدىرۋ, حالىقارالىق ىنتىماقتاستىق, قازاقستان رەسپۋبليكاسى قارۋلى كۇشتەردەگى يدەولوگيالىق جۇمىس بويىنشا جۇرگىزىلدى. 2015 جىلى قر قارۋلى كۇشتەرىندە 170-تەن اسا جوسپارلى تەكسەرىس وتكىزىلدى. ونىڭ ىشىندە: 71-ءى قۇرلىق اسكەرلەرىندە, 17-ءسى اۋە قورعانىسى كۇشتەرىندە, 1-ەۋى اسكەري-تەڭىز كۇشتەرىندە, 85-ءى وزگەلەردە وتكىزىلدى. كەلىسىمشارت نەگىزىندەگى اسكەري قىزمەتشىلەر مەن مەرزىمدى ساربازدار سانىنىڭ اراسالماعى وزگەردى. بۇگىنگى تاڭدا ارميانىڭ 80 % كەلىسىمشارت بويىنشا اسكەري قىزمەتشىلەر مەن  20 % مەرزىمدى قىزمەتتەگى ساربازداردان قۇرالعان. ەلەۋلى وزگەرىستەر اسكەري ءبىلىم بەرۋ سالاسىن دا قامتىدى. بيىلعى جىلى اسكەري كافەدرالاردا جاڭا ەرەجەلەر ەنگىزىلدى جانە 26 ماماندىق بويىنشا قىز بالالاردى ىرىكتەۋ جۇرگىزىلۋدە, بارلىق وقۋ ورىندارىنا قابىلداۋ بويىنشا جاڭا قاعيدالار بەكىتىلدى, جاڭا پسيحولوگيالىق تەستىلەر ەنگىزىلدى. ودان باسقا, اسكەري ءبىلىم بەرۋدىڭ ەرەكشەلىكتەرىن ەسكەرە وتىرىپ, كرەديتتىك تەحنولوگيا بويىنشا وقىتۋعا كوشىرۋ جۇزەگە اسىرىلدى. بۇل ۇيرەنۋشىلەر ءۇشىن اسكەري تاعىلىمدامانىڭ كولەمىن 2,5 ەسەگە ارتتىرا تۇسەدى. قازاقستان رەسپۋبليكاسىنىڭ اقپاراتتىق قاۋىپسىزدىگىن قامتاماسىز ەتۋدەگى وزگەرىس تە ماڭىزدى بولىپ تابىلادى. كيبەرشابۋىلدارعا دۋشار ەتۋگە قيىن بولىپ كەلەتىن تەحنيكالىق قامتاماسىز ەتۋدىڭ اناعۇرلىم كۇردەلى جۇيەسى ەنگىزىلۋدە. سونداي-اق كادرلاردى دايارلاۋدىڭ تۇتاستاي ءارى ءتيىمدى جۇيەسى قۇرىلۋدا. داستان كەنجالين. دەرەك, سۋرەت: egemen.kz