استانا. 12 قاڭتار. قارۋلى كۇشتەردى جاۋىنگەرلىك دايارلىعىنىڭ جوعارى دارەجەسىنە كەلتىرۋ جاقسى دارەجەدە اسكەردىڭ شىنايى جاۋىنگەرلىك ازىرلىگىن كورسەتەدى. 2016 وقۋ جىلىندا جاسالعان العاشقى وقۋ دابىلى اسكەرلەردىڭ جاۋىنگەرلىك دايارلىعىن كورسەتتى. بۇل تۋرالى egemen.kz ءتىلشىسى حابارلادى.
«ءبىز جەكە قۇرامدى حاباردار ەتۋ, جيناۋ, بەلگىلەنگەن اۋدانداردا قۇرامالار مەن بولىمدەردىڭ وقۋ-جاۋىنگەرلىك تاپسىرمالاردى ورىنداۋىنان باستاپ سۇراقتاردى پىسىقتادىق. اتالعان ساباقتارعا 40 مىڭنان اسا ادام تارتىلدى, 1 500-دەن استام بىرلىك قارۋ-جاراق پەن اسكەري تەحنيكا شىعارىلدى. جەكە قۇرام جاڭا وقۋ كەزەڭىنە دەگەن دايارلىعى مەن ازىرلىگىن پاش ەتتى. 2016 جىلى باسقارۋ ورگاندارىمەن, «شىعىس», «استانا» وڭىرلىك قولباسشىلىقتارىنىڭ قۇرامالارى جانە بولىمدەرىمەن, اەروۇتقىر اسكەرلەرىمەن «ايبالتا-2016» ءىرى اۋقىمدى وقۋ-جاتتىعۋ وتكىزۋدى جوسپارلاپ وتىرمىز. جوسپارىمىزدا كوپتەگەن وقۋ-جاتتىعۋلار مەن پراكتيكالىق ساباقتار بار», دەدى قر قك قۇرلىق اسكەرلەرى باس قولباسشىسىنىڭ ءبىرىنشى ورىنباسارى – قر قك قا باس شتابىنىڭ باستىعى گەنەرال-مايور ادىلبەك الدابەرگەنوۆ.
سونىمەن بىرگە جاۋىنگەرلىك ازىرلىكتىڭ جوعارى دارەجەسىنە كەلتىرۋ كەزىندە اۋە قورعانىسى كۇشتەرىنىڭ قۇرامىنان جاۋىنگەرلىك كەزەكشىلىكتى اتقاراتىن كۇشتەر مەن قۇرالدار اۋەگە كوتەرىلدى, ءارتۇرلى تيپتەگى اۆياتسيالىق تەحنيكا قوزعالتقىشتارىنىڭ ىسكە قوسىلۋى جۇزەگە اسىرىلدى, قوسالقى اۋەايلاقتار پايدالانۋعا دايىندالدى.
«قر قك-ءنىڭ ءتۇرى رەتىندە اۋە قورعانىسى كۇشتەرى تاكتيكالىق-ارنايى ساباقتارعا قاتىستى. بارلىق اسكەري بولىمدەر مەن بولىمشەلەر تارتىلدى. جاتتىقتىرۋ ۇدەرىسىندە حاباردار ەتۋدى, اشقق جاۋىنگەرلىك ەسەپتوپتار اۆياتسياسى ەكيپاجدارىنىڭ ۇيلەسۋىن پىسىقتادىق», دەدى قر قك اقك باس قولباسشىسىنىڭ جاۋىنگەرلىك دايارلىق جونىندەگى ورىنباسارى – باس باسقارما باستىعىنىڭ مىندەتىن ۋاقىتشا اتقارۋشى پولكوۆنيك يگور سۆيريدوۆ.
كورابلگە قارسى, اۋەگە قارسى جانە سۋاستىعا قارسى-ديۆەرسيالىق قورعانىس بويىنششا وقۋ تاپسىرمالارىن پىسىقتاۋ ءۇشىن تەڭىزگە اسكەري-تەڭىز كۇشتەرىنىڭ كورابلدەرى شىعارىلدى. «جەكە قۇرام باس شتابتىڭ قويعان تاپسىرمالارىن ورىندادى. بايلانىس جۇيەلەرى, باسقارۋ پۋنكتتەرى اقاۋسىز. اسكەري-تەڭىز كۇشتەرىندەگى جاۋىنگەرلىك ازىرلىكتىڭ جوعارى دارەجەسىنە كەلتىرۋ قورىتىندىسىنا ءدان ريزامىز», دەپ ءتۇسىندىردى قر قك اتك باس شتابىنىڭ باستىعى 1-دارەجەلى كاپيتان قايىرگەلدى ەسەنەەۆ.
2016 جىلعا قاتىستى ول جاۋىنگەرلىك كەزەكشىلىكتى اتقارۋعا, كورابلدەردى, كۇشتەر مەن قۇرالداردى دايىنداۋعا ەرەكشە نازار اۋدارىلاتىنىن اتاپ ءوتتى. سونداي-اق, بيىلعى جىلى قازاقستاننىڭ اسكەري-تەڭىز كۇشتەرىندە ماڭىزدى وقيعا بولماق. ياعني, كورابلدەر ارسەنالى جاڭا جاۋىنگەرلىك بىرلىكپەن تولىعادى دەپ كۇتىلۋدە.
بيىلعى جىلى قر قك-دە اسكەري قىزمەتشىلەردىڭ جاۋىنگەرلىك دايارلىعىنا اسا ءمان بەرىلەدى. بۇل رەتتە جاياۋ اسكەرلەرىمىز, اسكرەي تەڭىزشىلەرىمىز بەن اسكەري ۇشقىشتارىمىز ارميالىق حالىقارالىق ويىندارعا قاتىساتىنىن ايتا كەتكەن ءجون. اسكەرلەردە وسىناۋ ءىرى حالىقارالىق دەڭگەيدەگى سايىسقا دايىندىق باستالىپ تا كەتتى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.