استانا. 12 قاڭتار. بۇكىل الەمدىك بوكس سەرياسىندا (WSB) ەل نامىسىن قورعايتىن «استانا ارلاندارى» كلۋبى چەمپيوندىق اتاعىن قورعاپ قالۋ جولىنداعى جاڭا ماۋسىمدى 23 قاڭتاردا باستايدى. كوماندانىڭ العاشقى كەزدەسۋى سول كۇنى قاراعاندىدا وتەدى. بۇل تۋرالى egemen.kz ءتىلشىسى حابارلادى.
بيىل التىنشى ماۋسىمى باستالاتىن سايىسقا الەمنىڭ 16 ەلىنەن 16 كلۋب قاتىسادى. ولاردىڭ ىشىندە وسى جارىستى ەكى مارتە جەڭىپ العان «استانا ارلاندارىنىڭ» بەدەلى جوعارى.
ايتا كەتەيىك, وسى ماۋسىمدا ءبىزدىڭ كوماندا تەك وتاندىق بوكسشىلارمەن سىنعا تۇسەدى. ەشقانداي لەگيونەرسىز سايىسۋدى كوزدەپ وتىرعان ۇجىم ساپىندا سامات باشەنوۆ, ولجاس ساتتىباەۆ, زاكىر سافيۋللين, تەمىرتاس ءجۇسىپوۆ سىندى تاجىريبەلى بوكسشىلار بار.
كوماندانىڭ باس جاتتىقتىرۋشىسى نۇرلان اقۇرپەكوۆتىڭ ايتۋىنشا, «ارلاندار» العاشقى كەزدەسۋىندە ازەربايجاننىڭ «باكۋ وتتارى» كومانداسىمەن كۇش سىناسادى. ودان بولەك, ءبىزدىڭ توپتا وزبەكستان جانە پۋەرتو-ريكو ەلدەرىنىڭ كلۋبتارى بار.
ماماندار بيىلعى ماۋسىم بۇرىنعىلاردان دا قىزىقتى بولاتىنىن ايتىپ وتىر. سەبەبى, بوكستان الەم بويىنشا الدىڭعى ساپتا تۇرعان قازاقستانمەن قاتار, جارىس جولىندا رەسەي, كۋبا, ۋكراينا سياقتى ازۋلى ەلدەردىڭ ۇجىمدارى بار. سونداي-اق, ۇلىبريتانيانىڭ دا كومانداسى قايتادان قاتارعا قوسىلدى.
ايبا-نىڭ جوباسى بولىپ سانالاتىن WSB دوداسى العاش رەت 2010-2011 جىلعى ماۋسىمدا ۇيىمداستىرىلدى. سودان بەرگى بەس ماۋسىمعا دا قاتىسقان «استانا ارلاندارى» ۇزدىك ۇشتىكتەن تومەن ءتۇسىپ كورگەن جوق. اتاپ ايتقاندا, ەكى مارتە چەمپيون اتانسا (2013-2014, 2015), ءبىر رەت – كۇمىس (2010-2011), ەكى رەت قولا جۇلدەگە (2011-2012, 2013-2014) قول جەتكىزدى.
تاعى ءبىر ەسكەرە كەتەتىن جايت, «ارلانداردىڭ» ماۋسىم بارىسىنداعى بارلىق كەزدەسۋلەرى «حابار» تەلەارناسىنان تىكەلەي ەفيردە كورسەتىلەدى. 23 قاڭتار كۇنگى قاراعاندى قالاسىندا بولاتىن العاشقى ايقاس استانا ۋاقىتىمەن ساعات 18:00-دە باستالادى.
ەلامان قوڭىر.
دەرەك: egemen.kz.
سۋرەت: vk.com.