جۇمىسىڭ جۇيەلى بولماي, ءىسىڭ ءبىر ەلى العا جىلجىمايدى. ناقتى جوسپارىڭ, باعىت-باعدارىڭ, دامۋ جولىڭ بولماسا, وركەنيەتتىڭ جالىنا جارماسا المايسىڭ. قاراپايىم ادامنىڭ ءوزى كۇندەلىكتى تىرشىلىگىن جوسپارلاپ وتىرادى. سول سەكىلدى, مەملەكەت تە الدىنا مەجە قويادى. ونى باعىندىرادى. جوسپار ورىندالعان سوڭ كەلەسى بيىكتى كوزدەيدى.
«بەس جىلدىعىن ويلاماعان ەركەكتەن بەز» دەگەندەي, ءبىزدىڭ بابالارىمىز وسىنى مەڭزەسە كەرەك. بىلتىر ەلباسى «100 ناقتى قادامىن» جاريالاپ, 5 ينستيتۋتتىق رەفورمانىڭ جولىن كورسەتتى. بيىلعى جىلدىڭ العاشقى كۇندەرىندە ومىرىمىزگە ۇلكەن وزگەرىستەر اكەلەتىن جۇمىستىڭ جاي-جاپسارىن, قالاي اتقارىلماعىن تاپسىرلەپ بەردى.
ال قىزىلوردا وبلىسى ەلىمىزدە ەڭ ءبىرىنشى بولىپ «100 ناقتى قادام» ۇلت جوسپارىن جۇزەگە اسىرۋ بويىنشا كەڭەيتىلگەن سەمينار-كەڭەس وتكىزدى. ايماق باسشىسى قىرىمبەك كوشەرباەۆ پەن جەرگىلىكتى جانە اۋماقتىق ورگانداردىڭ قاتىسۋىمەن وتكەن سەمينار-كەڭەستە ەلباسىنىڭ «100 ناقتى قادام» ۇلت جوسپارىن جۇزەگە اسىرۋ بويىنشا جوسپارلانعان شارالار بارىسى قارالدى. كەڭەستە ءسوز العان وبلىس اكىمى وتاندىق جانە شەتەلدىك ساراپشىلاردىڭ قاتىسۋىمەن جاسالعان ۇلت جوسپارىنىڭ ستراتەگيالىق ماڭىزىن ايرىقشا اتاپ ءوتتى.
– «100 ناقتى قادام» ۇلت جوسپارى ورتالىقتا عانا ءجۇزەگە اسىپ, ۇكىمەت دەڭگەيىندە جاۋاپتىلىق جۇكتەلەتىن رەفورما ەمەس. بۇل – بۇكىل قازاقستاندىقتاردىڭ ءىسى. بۇل ىسكە ءبىر ادامداي جۇمىلۋىمىز قاجەت. بارلىق مەملەكەتتىك ورگانداردان, قوعامدىق ينستيتۋتتار مەن ازاماتتاردان ءىس-قيمىلدىڭ ۇيلەسىمدىلىگى, تاباندىلىق, كرەاتيۆتىلىك جانە قاجىرلىلىق تالاپ ەتەدى, – دەدى قىرىمبەك ەلەۋ ۇلى.
سەمينار-كەڭەسكە قاتىسۋشى سالالىق ۇيىمداردىڭ باسشىلارى زاڭناماعا ەنگىزىلەتىن وزگەرىستەر تۋرالى باياندادى. 5 ينستيتۋتتىق رەفورمادان تۋىندايتىن ۇلت جوسپارى مەملەكەت جانە قوعام ومىرىندەگى ەڭ ماڭىزدى سالالاردى قامتيدى. ماسەلەن, مەملەكەتتىك قىزمەتتە بىرقاتار وزگەرىستەر ورىن الادى. بۇرىنعى «مەملەكەتتىك قىزمەتشىلەردىڭ ار-نامىس» كودەكسىنىڭ ورنىنا «مەملەكەتتىك قىزمەتشىلەردىڭ ەتيكا كودەكسى» جاسالدى. بۇل قۇجاتتا مەملەكەتتىك قىزمەتشىنىڭ سىرتقى كەلبەتى مەن مورالدىق-رۋحاني قاسيەتتەرى جانە ءجۇرىپ-تۇرۋى مەن قوعاممەن بايلانىس نورمالارى قاراستىرىلعان. مەملەكەتتىك قىزمەتكە ورنالاسۋ, مانساپتىق ءوسۋى, ولاردىڭ ەڭبەكاقىسىندا دا ءبىرشاما وزگەرىستەر بار. ەنگىزىلگەن وزگەرىستەردىڭ قاتارىندا ادەپ بويىنشا كەڭەستەر جانە ادەپ جونىندەگى ۋاكىل لاۋازىمى پايدا بولدى. بۇل لاۋازىمعا ۇجىم ىشىندە بەدەلدى, ءبىلىمدى قىزمەتكەر تاعايىندالادى.
ۇلتتىق ەكونوميكا مينيسترلىگىنىڭ قۇرىلىس, تۇرعىن ءۇي-كوممۋنالدىق شارۋاشىلىق ىستەرى جانە رەسۋرستارىن باسقارۋ كوميتەتىنىڭ جەرگە ورنالاستىرۋ, گەودەزيا جانە جەر قاتىناستارىن دامىتۋ باسقارماسىنىڭ باسشىسى ارداق سامامبەتوۆ اۋىل شارۋاشىلىعى باعىتىنداعى جەرلەردى جەكەشەلەندىرۋ تۋرالى اڭگىمەلەدى. «پايدالانىلماي تۇرعان جەر ۋچاسكەلەرىن نارىقتىق اينالىمعا ەنگىزۋ جاۋاپتى جالعا الۋشىلاردىڭ مۇددەلەرىن قورعاپ, بوس تۇرعان جەر تەلىمدەرىن ءتيىمدى پايدا كوزىنە اينالدىرۋعا مۇمكىندىك بەرەدى», – دەدى ول.
– وسىنداي اۋقىمدى سەمينار-كەڭەستى ۇيىمداستىرعانى ءۇشىن وبلىس باسشىلىعىنا العىسىمدى ايتامىن. بۇگىنگى شارانىڭ قورىتىندىسى بويىنشا وسىنداي سەمينارلاردى باسقا دا وڭىرلەردە وتكىزۋ تۋرالى ۇسىنىستار ايتىلاتىن بولادى, – دەدى ارداق سامامبەتوۆ. سونىمەن قاتار, باسقارما باسشىسى مەملەكەتارالىق, رەسپۋبليكالىق جانە وڭىرارالىق دەڭگەيدە بايقوڭىر قالاسىنىڭ جەر تەلىمدەرىن پايدالانۋ تۋرالى ماسەلە شەشىمىن تاپقانىن ايتتى. وبلىستىڭ اۋماعىن ۇلعايتىپ, سىرداريا وزەنىنىڭ سول جاعالاۋىن يگەرۋ, ونداعى جەر تەلىمدەرىن ءبولۋ جۇمىستارى دا شەشىلگەن.
سەميناردا باسقا دا وزگەرىستەر تۋرالى ءسوز بولدى. ماسەلەن, زاڭ بۇزۋشىلىقتار كارتاسىن جاساقتاۋ, كەدەندىك جانە سالىقتىق زاڭنامانى جەڭىلدەتۋ, وندىرىسكە ينۆەستيتسيا تارتۋ سياقتى تاقىرىپتار دا نازاردان تىس قالعان جوق.
ەرجان بايتىلەس,
«ەگەمەن قازاقستان».
قىزىلوردا.