كەشە استاناداعى “ريكسوس” قوناقۇيىنىڭ “جەرۇيىق” زالىندا ەلباسى نۇرسۇلتان نازارباەۆ قازاقستان مۇسىلماندارى قاۋىمىنا ارناپ قاسيەتتى رامازاننىڭ قۇرمەتىنە يفتار داستارقانىن جايعىزىپ, اۋىزاشار بەردى.
وعان ەلوردانىڭ ءدىن يسلامدى بەك تۇتىناتىن مۇسىلماندارى اراسىنان ءۇش جۇزدەي وكىل جينالدى. ونىڭ ىشىندە مەملەكەتتىك ساياسي قىزمەتكەرلەر, دەپۋتاتتار, ءدىني قىزمەتكەرلەر مەن نامازحاندار, قۇرمەتتى اقساقالدار مەن انالار, ءمادەنيەت جانە باق وكىلدەرى بولدى.
داستارقاندى اشقان قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ءابساتتار قاجى دەربىسالى العاشقى ءسوزدى ءدىنباسى پرەزيدەنت نۇرسۇلتان نازارباەۆقا بەردى. ەلباسى قازاقستان مۇسىلماندارىن قاسيەتتى رامازانمەن قۇتتىقتاپ, ورازا ۇستاعان بارلىق جاماعاتتىڭ قۇلشىلىعىنىڭ قابىل بولۋىن, وتباسىلارىنىڭ امان, جۇزدەرىنىڭ جارقىن بولۋىن تىلەدى. ودان ءارى ەلباسى يسلام ءدىنىنىڭ يگى قاسيەتتەرىن ايتىپ بەردى. ءبىزدىڭ ءدىنىمىز جوق-جىتىككە, قارىپ-قاسەرگە كومەك بەرۋدى ۋاعىزدايتىن بارىنشا ءادىلەتتى ءدىن. ەلىمىزدە تىنىشتىق بولىپ, ەشقانداي قان توگىلمەي, بەيبىت ءومىر ءسۇرىپ كەلە جاتقانىمىزعا يسلام ءدىنىنىڭ اسەرى مول. ويتكەنى, يسلام ءدىنىن بەك تۇتىناتىن حاق مۇسىلمان ارقاشاندا ءتوزىمدى بولىپ, باسقالاردىڭ سەنىمىنە قۇرمەتپەن قاراۋدى تالاپ ەتەدى, دەي كەلىپ وسىدان ءارى ەلباسى الەمدىك جانە ءداستۇرلى دىندەر كوشباسشىلارى سەزىنىڭ قازاقستاندا تۇراقتى تۇردە وتكىزىلىپ كەلە جاتقاندىعىن, كەلەسى جىلى قازاقستاننىڭ يكۇ توراعاسى بولاتىندىعىن اۋىزعا الىپ, وسىنىڭ ءبارى ەلىمىزدەگى تۇراقتىلىق پەن تىنىشتىقتىڭ ارقاسى ەكەندىگىن ايتتى. بۇل ىستە يسلامنىڭ اتقارىپ وتىرعان ءرولى زور, دەدى پرەزيدەنت.
جىلدان-جىلعا جاستار اراسىندا يسلام ءدىنىن قادىر تۇتىپ, ونىڭ تالاپتارىنا مويىن ۇسىنۋشىلار سانى كوبەيىپ كەلەدى. بىراق ادام ءدىننىڭ سىرتقى ءپىشىنىن عانا ساقتاپ, نيەتى دۇرىس بولماسا ەشقانداي قۇلشىلىقتىڭ قابىل بولماسى حاق. سوندىقتان ادام ەڭ باستىسى ءوزىنىڭ نيەت-قۇلقىن دۇرىس جولعا قويىپ, شىن جۇرەگىمەن اللاعا سەنۋىنىڭ ماڭىزى زور, دەدى ەلباسى. ودان ءارى مۇسىلمان ءدىنىن تۇتىنۋشىلارعا ارنالعان قۇرمەت بيلىكتىڭ بارلىق دەڭگەيىندە دە تۇراقتى تۇردە جاسالىپ كەلە جاتقانىن ايتتى. قازىر بارلىق وبلىستار مەن اۋدان اكىمدەرى دە وزدەرىندەگى مۇسىلمانداردىڭ وكىلدەرىنە ارناپ يفتار داستارقانىن جايعىزۋدا, دەدى ءسوزىنىڭ سوڭىندا.
ءابساتتار قاجى دەربىسالى قازاقستاندىق بارشا مۇسىلماندار اتىنان رامازاننىڭ قۇرمەتىنە جايعىزعان يفتار داستارقانى ءۇشىن ەلباسى ن.نازارباەۆقا العىسىن ايتتى. ەلىمىزدە جۇرگىزىلىپ وتىرعان بەيبىتسۇيگىش, دۇرىس ساياساتتىڭ ارقاسىندا مۇسىلماندار قاۋىمى ءوزىنىڭ سەنىم بوستاندىعىنا تولىق يە بولىپ, جىلدان-جىلعا سانى قاتتى ءوسىپ كەلەدى. ءدىنىمىز قۇرساۋدا, رۋحىمىز تۇساۋدا بولعان كەڭەستىك كەزەڭدە ەلىمىزدە بار بولعانى 68 مەشىت بولسا, قازىر ولاردىڭ سانى 2 مىڭنان اسىپ بارادى جانە ولاردىڭ ءبارى دە ارنايى سالىنعان عيباداتحانالار, دەدى ول. سودان كەيىن ءدىنباسىلاردىڭ ەلباسى تۋرالى جازعان پىكىرلەر جيناعىنان تۇراتىن كىتاپتى سىيعا تارتتى.
يفتار داستارقانى باسىندا اقساقالدار اتىنان زەينوللا مۇحامەدجان ۇلى جانە باسقالار سويلەپ, ەلباسىنا وزدەرىنىڭ ريزاشىلىقتارىن ءبىلدىردى. سەناتور ومىربەك بايگەلدي توگىلدىرىپ تۇرىپ باتا بەردى.
جاقسىباي سامرات.