قازاقستاندا 2011 جىلى جەكە تابىس سالىعى بويىنشا (جتس) پروگرەسسيۆتى شكالا ەنگىزۋ قولعا الىنادى.
“قازاقستان جاڭالىقتارى” اقپاراتتىق اگەنتتىگىنىڭ حابارلاۋىنشا, رەسپۋبليكانىڭ قارجى ءمينيسترى بولات جامىشەۆ وسىلاي دەپ مالىمدەگەن.
“كەلەسى 2011 جىلى جەكە تابىس سالىعى بويىنشا قازاقستاندا پروگرەسسيۆتى شكالا ەنگىزىلەدى دەپ كۇتىلىپ وتىر” دەدى ول ۇكىمەت وتىرىسىنان كەيىن جۋرناليستەرمەن كەزدەسۋىندە. ول سونىمەن بىرگە قازىرگى تاڭدا ەلىمىزدە جەكە تابىس سالىعى كولبەۋ شكالا بويىنشا الىنىپ, سالىق مولشەرى 10 پايىزدى قۇراپ وتىرعانىن ايتتى.
“ەندى جاڭا مولشەرلەمە بويىنشا ەسەپتەلىپ شىعارىلاتىن جالاقىنىڭ مولشەرىنە قاراي ول 10, 15 جانە 20 پايىزدى قۇراۋى مۇمكىن. مىسالى, قىزمەتكەردىڭ جالاقى ستاۆكاسى 250 مىڭ تەڭگەدەن جوعارى اسسا, ودان ۇستالاتىن جتس 15 پايىزعا تەڭەسەدى, ال 500 مىڭ تەڭگەدەن كوپ بولسا, 20 پايىزدىق سالىق ۇستالادى”, – دەدى مينيستر سوزىندە.
“ەگەمەن-اقپارات”.
پرەزيدەنتتىڭ قارجى جۇيەسىن تۇراقتاندىرۋ تۋرالى تاپسىرمالارى ورىندالدى
قازاقپارات اگەنتتىگىنىڭ حابارلاۋىنشا, كەشە سەلەكتورلىق كەڭەستە پرەمەر-مينيستر كارىم ءماسىموۆ وسىلاي دەپ مالىمدەگەن. مەملەكەت باسشىسى نۇرسۇلتان نازارباەۆتىڭ قازاقستاننىڭ قارجى جۇيەسىن تۇراقتاندىرۋ تۋرالى ۇكىمەتكە بەرگەن تاپسىرمالارىنىڭ بارلىعى تولىق جۇزەگە اسىرىلدى.
“جاعدايدى پايدالانا وتىرىپ مىنانى ايتقىم كەلەدى: كەشە بتا بانكتىڭ قارىزىن قايتا قۇرىلىمداۋ اياقتالدى, ول تۋرالى مەملەكەت باسشىسى دا رەسمي تۇردە مالىمدەدى, بانكتىڭ ءباسپاسوز بايانىندا دا ايتىلدى. مەملەكەت باسشىسىنىڭ قيىن دا كۇردەلى 2009 جىلدىڭ باسىندا قويعان ەلىمىزدىڭ بانك جۇيەسىن تۇراقتاندىرۋ جونىندەگى مىندەتتەرىنىڭ بارلىعى ورىندالدى, دەدى ۇكىمەت باسشىسى.
وسى ورايدا پرەمەر-مينيستر قازاقستاننىڭ قارجى جۇيەسىن تۇراقتاندىرۋدا اتقارعان جۇمىستارى ءۇشىن قارجى قاداعالاۋ اگەنتتىگىنە, ۇلتتىق بانككە, “سامۇرىق-قازىنا” قورىنا, سونداي-اق ەلىمىزدەگى جۇيە قۇراۋشى بانكتەردىڭ مەنەدجمەنتتەرىنە ريزاشىلىعىن ءبىلدىردى. “وتكەن قيىن جىلداردا, كۇردەلى كەزەڭدەردە ءبىز سىننان سۇرىنبەي وتتىك. بىزدەر قيىن دا كۇردەلى ءبىر جارىم جىلدىڭ ىشىندە ءىس جۇزىندە اپتا سايىن كۇردەلى شەشىمدەردى قابىلدادىق. ورتاق جاۋاپكەرشىلىكتى سەزىندىك. سونىڭ ناتيجەسىندە قارجى جۇيەسىندەگى جاعداي تۇراقتاندىرىلدى”, دەدى ك. ءماسىموۆ.
ۇكىمەت باسشىسىنىڭ ايتۋىنشا, بۇل رەتتە بانك جۇيەسىنە قاتىستى ەلىمىزدە جيناقتالعان تاجىريبەلەردى ەسكەرە وتىرىپ, بۇل باعىتتاعى كەلەشەكتەگى ءىس-قيمىلداردى ناقتى جولعا قويۋ كەرەك. بۇل ەلىمىزدىڭ ەكونوميكاسىن, تۇپتەپ كەلگەندە حالقىمىزدى قورعاۋ ءۇشىن, ولاردىڭ باسەكەگە قابىلەتتى بولۋى ءۇشىن قاجەت.
ايتا كەتۋ كەرەك, وسى رەتتە ۇكىمەت بۇگىن بانك قىزمەتىنىڭ جانە قارجىلىق ۇيىمدار تاۋەكەلدەردىڭ تومەندەتۋ بولىگىندەگى ماسەلەلەر بويىنشا بىرقاتار زاڭنامالىق اكتىلەرگە وزگەرتۋلەر مەن تولىقتىرۋلار ەنگىزۋ تۋرالى زاڭ جوباسىن ماقۇلدادى.