وبلىس ورتالىعىنداعى “دوستىق” ۇيىندە باتىس قازاقستان وبلىسىنىڭ ونەر شەبەرلەرىنىڭ ۇسىنۋىمەن وتكەن “اقجايىق — ءان ولكەم” اتتى ادەمى كەش اقتوبەلىك كورەرمەندەردىڭ كوڭىلىنەن شىقتى. الاشتان ءان وزدىرعان مۇحيت مەرالى ۇلى, عاريفوللا قۇرمانعاليەۆ, داۋلەسكەر كۇيشىلەر داۋلەتكەرەي, دينا سياقتى نەبىر ءدۇلدۇلدەر دۇنيەگە كەلگەن ءوڭىر ونەرپازدارىنىڭ ورەسى بيىك ونەرىن تاماشالاۋعا اقتوبەلىكتەر كوپ جينالدى. “دوستىق” ءۇيىنىڭ ۇلكەن زالى كورەرمەندەرگە لىق تولدى. زالدا ينە شەنشار جەر بولماۋىنىڭ ءوزى حالىقتىڭ ۇلتتىق ونەرىمىزگە شولىركەپ قالعانىنداي اسەر ەتتى.
ەكى وبلىستىڭ مادەنيەت باسقارمالارىنىڭ كەلىسىمىمەن باتىس قازاقستان وبلىسىنىڭ شىعارماشىلىق ۇجىمدارى جانە ونەر قايراتكەرلەرى, بارلىعى 170 ادامنان قۇرالعان ۇلكەن توپ ۇسىنعان كەڭەيتىلگەن كونتسەرتتىك باعدارلامانى اقتوبەلىكتەر مەن بىرگە كورشىلەس باتىس قازاقستان جانە اقتوبە وبلىستارىنىڭ اكىمدەرى – باقتىقوجا ءىزمۇحامبەتوۆ پەن ەلەۋسىن ساعىندىقوۆ تا تاماشالاپ وتىردى.
ادەمى كەشتىڭ شىمىلدىعىن قازاقستاننىڭ ەڭبەك سىڭىرگەن قايراتكەرى قىرىمگەرەي قاجىموۆتىڭ ديريجەرلىك ەتۋىمەن داۋلەتكەرەي اتىنداعى حالىق اسپاپتار وركەسترى قۇرمانعازىنىڭ “بالبىراۋىن” كۇيىمەن كۇمبىرلەتە اشتى. ودان سوڭ ساحناعا كوتەرىلگەن حالىقارالىق بايقاۋلاردىڭ لاۋرەاتى اقمارال احمەتوۆا “ازاتتىق ءانى — ماحامبەت” ءانىن اسقاقتاتا شىرقاپ, حالىقتىڭ پاتريوتتىق رۋحىن ءبىر كوتەرىپ تاستادى.
قازاقستاننىڭ ەڭبەك سىڭىرگەن مادەنيەت قىزمەتكەرى قاتيموللا بەردىعاليەۆ جەرلەسىمىز عازيزا جۇبانوۆانىڭ “جىر جازامىن جۇرەگىمنەن” ءانىن ناقىشىنا كەلتىرە ورىنداپ, حالىقتىڭ دۋ قول شاپالاقتاۋىنا يە بولدى. ال قازاقستاننىڭ ەڭبەك سىڭىرگەن قايراتكەرى جۇماعانىم راقىموۆا لاتيف ءحاميديدىڭ “بۇلبۇل” ءانىن تامىلجىتا ورىنداعان كەزدە كۇمىس كومەيدەن توگىلگەن اسەم داۋىس پەن ورىنداۋشىلىق شەبەرلىككە سۇيسىنبەگەندەر كەمدە-كەم. سونداي-اق كەشتىڭ ەڭ كىشكەنتاي ونەرپازى – بوكەي ورداسى اۋدانىنان كەلگەن ءتورتىنشى سىنىپ وقۋشىسى نۇرعيسا تولەگەنوۆ “انا” ءانىن ورىنداپ, كورەرمەن كوزايىمىنا اينالدى.
كەشتىڭ سوڭىندا تولىق قۇرامدا ساحنا تورىنە كوتەرىلگەن ورالدىق ونەر شەبەرلەرى كومپوزيتور ەسكەندىر حاسانعاليەۆتىڭ “اتامەكەن” ءانىن اسقاقتاتا شىرقادى. ادەمى كەشتىڭ اسەرى باۋراعان اقتوبەلىكتەر دۋىلداتا قول سوعىپ تۇرىپ الدى. وسى ساتتە اقتوبە وبلىسىنىڭ اكىمى ەلەۋسىن ساعىندىقوۆ ساحنا تورىنە كوتەرىلىپ, كورشى وبلىستىڭ ونەر شەبەرلەرىنە العىسىن ايتىپ, عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنا اقتوبەلىكتەر اتىنان شەتەلدىك شاعىن اۆتوبۋستى سىيلادى.
ساتىبالدى ءساۋىرباي, اقتوبە وبلىسى.