2002 جىلدىڭ 17 ماۋسىمىندا ەلباسىنىڭ جارلىعىمەن قۇرىلعان ريددەردەگى سپورتتاعى دارىندى بالالارعا ارنالعان رەسپۋبليكالىق مەكتەپ-ينتەرنات سەگىز جىلدىڭ ىشىندە تالاي اسۋلاردان استى دەسەك, قاتەلەسە قويمايتىنىمىز انىق. مەكتەپ-ينتەرناتتى قۇرۋداعى ماقسات ەلىمىزدىڭ بارلىق وبلىستارىنداعى قىسقى سپورتقا بەيىمى بار تالانتتاردى جيناپ, الەمدىك, حالىقارالىق جارىستاردا جولدارى بولىپ جاتسا, ءتىپتى قىسقى اق وليمپيا ويىندارىنا قاتىستىرىپ, ءۇلكەن ومىرگە قانات قاقتىرۋ بولاتىن. سەگىز جىلدا بۇل ءۇمىت اقتالدى ما؟ ونىڭ ۇستىنە باستالۋىنا نەبارى بەس اي قالعان الماتى مەن استاناداعى ءVىى قىسقى ازيا ويىندارىندا كەم دەگەندە ەكىنشى نەمەسە ءۇشىنشى ورىنعا تابان تىرەۋ مىندەتى قويىلعانى تاعى بار.
جاقىندا تابيعاتى سۋرەتتەۋگە ءتىل جەتپەيتىن نۋ ورمان ىشىندەگى سپورت مەكتەپ-ينتەرناتتىڭ تابالدىرىعىن اتتاۋدىڭ ءساتى ءتۇستى.
ءبىزدى وسى ۇلاندار ۇياسىنىڭ ديرەكتورى, ۆولەيبولدان سپورت شەبەرى, كەزىندە وبلىس, ەل قۇرامالارى ساپىندا ونەر كورسەتكەن ۆلاديمير كناۋب قارسى الدى. بۇل ازامات رەسەيدە دە ۆولەيبول ويناپ, سان رەت چەمپيون اتانعان. ءتىپتى تۋريزم جانە سپورت مينيسترلىگىندە ءبولىم باسقارىپ, سوڭعى سەگىز جىل بويى مەكتەپكە جەتەكشىلىك ەتىپ كەلەدى. ءبىز ەل سپورتى جولىندا ايانباي تەر ءتوگىپ جۇرگەن ازاماتتى كەلە جاتقان ەردىڭ جاسى ەلۋىمەن قۇتتىقتاپ, سپورت مەكتەبى قابىرعاسىندا ءتاربيەلەنگەن شاكىرتتەرى اراسىنان وليمپيا ويىندارىنىڭ چەمپيونى شىعۋىنا اق جول تىلەدىك. ۆ.كناۋب قازاقشاعا سۋداي, ۇزاق جىلدار ءۇرجار اۋدانىندا تۇرىپ, اۋداندىق اتقارۋ كوميتەتىندە جاۋاپتى حاتشى بولعان ازامات سويلەگەن كەزدە قازاقتاردىڭ ءوزىن جاڭىلدىرىپ كەتەدى.
– مەكتەپ-ينتەرنات قۇرىلعاننان بەرى 7 حالىقارالىق دارەجەدەگى سپورت شەبەرى, 44 سپورت شەبەرى ازىرلەندى, – دەيدى ول.
– سپورت مەكتەبى اشىلعان 2002 جىلى ۇكىمەت ونى قارجىلاندىرۋعا 52 ملن. تەڭگە قارجى ءبولىپتى. وتكەن جىلى ول ءتورت ەسەگە جۋىق ءوسىپ, 198 ملن. تەڭگەنى قۇراعان. بيىل 194 ملن. تەڭگە ءبولىنگەن. ۇكىمەت پەن تۋريزم جانە سپورت ءمينيسترى تەمىرحان دوسمۇحامبەتوۆتىڭ ءوزى مەكتەپ-ينتەرناتتى ۇنەمى قامقورلىعىنا الىپ وتىرادى. پرەمەر-مينيستردىڭ ءبىرىنشى ورىنباسارى ومىرزاق شوكەەۆتىڭ رەسپۋبليكالىق شاڭعى سپورتى فەدەراتسياسىنىڭ تىزگىنىن ۇستاعانى دا قىسقى سپورتتىڭ وركەندەۋىنە جول اشقالى وتىر.
الايدا, شالعايدا جاتقان سوڭ مۇندا پروبلەمالار جوق دەسەك, ارتىق ايتقان بولار ەدىك. بياتلون كوپ قارجىنى تالاپ ەتەتىن كۇردەلى دە قيىن سپورت ءتۇرى ەكەنى بەلگىلى. ءبىر قاراعاندا, مىلتىق اتىپ, ءجۇگىرۋدىڭ ونشا قيىندىق تۋعىزبايتىن سياقتى بولىپ كورىنۋى زاڭدى دا. بىراق بياتلونشىلار ازىرلىگىن كوزبەن كورگەن كەزدە بۇل سپورتتىڭ ەرەكشە كۇردەلى ەكەنىنە كوز جەتكىزەدى ەكەنسىز. بىرىنشىدەن, جاز ماۋسىمىندا شاڭعىنىڭ ورنىنا اياققا كروسسوۆكي كيىپ, يىعىڭا مىلتىق اسىنىپ, ورمان ءىشىن ارالاپ جۇگىرۋ قاجەت. ال بيىل كەندى التايدا جاۋىن-شاشىن مول, سوندىقتان باتپاققا مالشىنىپ, جۇگىرۋ وڭاي شارۋا ەمەس. ەكىنشىدەن, مىلتىق اتاتىن الاڭعا بەتون توسەلۋى قاجەت. بياتلون الاڭىندا وعان مۇمكىندىك بولماي تۇر. باپكەر ۆ.لاريونوۆ 70-كە جاقىنداپ قالسا دا, شاكىرتتەردى ۇزاق جىلدار بويى بياتلونعا باۋلىپ ءجۇر. ونىڭ ايتۋىنشا, جۋىق ارادا بياتلونشىلارعا جاعداي جاسالمايتىن سياقتى. بارلىق ماسەلە قارجى تاپشىلىعىندا.
بۇدان بەس جىل بۇرىن سپورت مەكتەبى اۋلاسىندا قاشىقتىعى ءبىر شاقىرىمعا ارەڭ جەتەتىن روليك تراسساسى جاسالىنعان. نەگىزىندە بۇل شاعىن بولعاندىقتان, شاكىرتتەردىڭ جاتتىعۋىنا كوپ قيىندىق تۋعىزىپ وتىر. بالالارعا كەزەككە تۇرۋعا تۋرا كەلەدى. ەگەر بۇل قاشىقتىقتى ءۇش نەمەسە بەس شاقىرىمعا دەيىن ۇزارتىپ, روليكپەن جۇگىرۋ الاڭىن سالىپ بەرسە, اسىعىمىز الشىسىنان تۇسەر ەدى دەگەندى ايتادى شاڭعىدان الەم چەمپيوندارىن ازىرلەگەن باپكەرلەر پاۆەل چەرەپانوۆ پەن ۆالەري تريفونوۆ.
بۇدان كەيىن ۆ.كناۋبپەن اڭگىمەمىز ەلىمىزدىڭ قىسقى ازيا ويىندارىندا قانشا مەدال, نەشىنشى ورىندى قاناعات تۇتاتىنىنا, ريددەردەگى سپورت مەكتەبى تۇلەكتەرىنىڭ ءمۇمكىندىكتەرىنە قاراي اۋىستى. ونىڭ پىكىرىنشە, ازيا ويىندارىندا كوماندالىق ەسەپتە ەكىنشى نەمەسە ءۇشىنشى ورىنعا تالاسۋ وڭاي مىندەت ەمەس. سەبەبى, قىتاي, جاپونيا, وڭتۇستىك كورەيا ەلدەرى سوڭعى كەزدە حالىقارالىق جارىستاردى بىلاي قويعاندا, وليمپيا ويىندارىندا جۇلدەلى ورىنداردى يەلەنۋدە. بياتلون جانە شاڭعى جارىسىنان الەم كۋبوگىن ساراپقا سالۋ كەزەڭدەرىندە قىتايدىڭ ۇل-قىزدارى نامىستى قولدان بەرمەۋدە. ءتىپتى, سولتۇستىك كورەيانى دا نازاردان شىعارماعان ءجون. كىلەڭ “سەن تۇر, مەن اتايىن” دەيتىن ساڭلاقتار اراسىندا توپ جارۋ شىنىندا دا قيىن ماسەلە. ءبىزدىڭ تۇلەكتەر نامىستى قولدان بەرمەس. الەم چەمپيوندارى ا.پولتورانين, و.چەرەپانوۆتان باسقا د.كەنەشەۆ, س.مالاحوۆا, و.ياتسكايا, يا.ساۆيتسكي, و.دۋدچەنكو, تاعى باسقالاردىڭ التىن القا ءۇشىن كۇرەسەتىنى بەلگىلى. كەم دەگەندە وننان استام التىن جۇلدە الۋ ماقسات بولسا كەرەك. بولاشاعىنان ءۇمىت كۇتتىرەتىن ر.دەمين, ە.دەمينا, ل.چەليششەۆا مەن باسقا دا سپورتشىلار ەل نامىسى ءۇشىن قولدان كەلگەننىڭ بارلىعىن جاساماق.
ريددەردەگى سپورتتاعى دارىندى بالالارعا ارنالعان مەكتەپ-ينتەرناتتا بۇل كۇندەرى 150 بالا تاربيەلەنىپ جاتىر. ولارعا 14 ۇستاز جەتىنشى سىنىپتان باستاپ ءبىلىم بەرۋدە. ۇستازدار بىلىكتى دە ءبىلىمدى جاندار. ورال مەن اقتوبەدەن, سەمەي مەن وسكەمەننەن, شىعىس قازاقستان وبلىسىنىڭ ءۇرجار, كۇرشىم, شەمونايحا, گلۋبوكوە اۋداندارى مەن زىريان, سەرەبريانكا, ريددەر سياقتى ءىرى قالالارىنان كەلىپ ءبىلىم الىپ, ۇلكەن سپورتپەن دوستاسقان بولاشاق چەمپيوندارعا مۇندا بارلىق جاعداي جاسالىنعان. جاقىندا ءبىز تۋريزم جانە سپورت مينيسترلىگى سپورت ىستەرى جونىندەگى كوميتەتىنىڭ توراعاسى ەلسيار قاناعاتوۆپەن اڭگىمەلەسكەنىمىزدە, قىسى التى ايعا سوزىلاتىن پەتروپاۆل, استانا مەن قوستاناي قالالارىندا دا دارىندى جاستاردىڭ مول ەكەنى, ولاردى ريددەردەگى سپورت مەكتەبىندە باۋلۋعا كوڭىل بولىنەتىنى جايلى ايتقان ەدى. ول قىسقى سپورتتىڭ كەندى التايدا وركەن جايعانى جايلى ايتا كەلىپ, كيكبوكستان الەمنىڭ بەس دۇركىن چەمپيونى اسقان موجانوۆ باسقاراتىن وبلىس سپورتشىلارىنىڭ ازيا ويىندارىندا كەم دەگەندە 20-عا تارتا مەدالدى الۋعا ءمۇمكىندىكتەرى مول ەكەنىن تىلگە تيەك ەتتى.
كۇرشىمنەن كەلگەن سپورت شەبەرلىگىنە كانديدات سىمبات قۇماربەكوۆا, ۇرجارلىق زۋرا قاليپەنوۆا, ريددەرلىك ا.پولتوراتسكي, ۆ.چالبۋشەۆ, ۆ.سيدەلنيكوۆ سياقتى جاستار ىزدەنىس ۇستىندە. ولار قازىردىڭ وزىندە جاستار اراسىندا ەلىمىزدىڭ بىرنەشە دۇركىن چەمپيوندارى اتاندى. سونىمەن بىرگە اننا ستويان, نيكيتا ستويان, ارتەم يگناتۋشكين, ارسەن قوجاحمەتوۆ سەكىلدى دارىندى سپورتشىلار دا ەلىمىزدىڭ جاستار اراسىنداعى قۇراما كوماندالارىنىڭ مۇشەلەرى.
سەگىز جىلدىڭ بەلەستەرى وسىنداي. تابىس وزدىگىنەن كەلمەيتىنى بەلگىلى. تاجىريبەلى باپكەر ۆ.كناۋب جەتەكشىلىك ەتەتىن مەكتەپ-ينتەرنات تۇلەكتەرى الداعى ۋاقىتتا دا ەلىمىزدە سپورت الەمىن باعىندىرعان بيىك اسۋلارمەن قۋانتا بەرمەك.
وڭداسىن ەلۋباي.