كەشە اقوردادا مەملەكەت باسشىسى نۇرسۇلتان نازارباەۆ اۋىل شارۋاشىلىعىنىڭ كوكەيكەستى ماسەلەلەرىنە ارنالعان كەڭەس وتكىزدى. ونىڭ جۇمىسىنا پرەمەر-مينيستر ك.ءماسىموۆ, پرەزيدەنت اكىمشىلىگىنىڭ باسشىسى ا.مۋسين, پرەزيدەنتتىڭ كومەكشىسى ب.سۇلتانوۆ جانە اۋىل شارۋاشىلىعى ءمينيسترى ا.كۇرىشباەۆ قاتىستى.
ا.كۇرىشباەۆ پرەزيدەنت الدىندا بيىلعى ەگىن وراعىن وتكىزۋگە دايىندىقتىڭ بارىسى تۋرالى ەسەپ بەرىپ, سونىمەن بىرگە مەملەكەت باسشىسىنا ەلدىڭ اگرارلىق سەكتورىنىڭ نەعۇرلىم كوكەيكەستى دەگەن ماسەلەلەرى تۋرالى حابارلادى. بيىل قازاقستاندا 14-15 ملن. توننا كولەمىندە استىق الىنادى دەپ كۇتىلۋدە, ول رەسپۋبليكانىڭ ىشكى قاجەتتىلىكتەرىن تولىق قامتاماسىز ەتۋگە جاعداي جاسايتىن بولادى. بۇگىنگى كۇنى كۇزدىك جانە جازدىق داقىلداردى قوسا العاندا ەگىستىك كولەمى 16,7 ملن. گەكتاردى قۇرايدى. الماتى, اقتوبە, جامبىل, باتىس قازاقستان, قىزىلوردا جانە وڭتۇستىك قازاقستان وبلىستارىندا ەگىن وراعى باستالىپ تا كەتتى. 2 تامىزعا دەيىن 450 مىڭ گەكتاردىڭ ەگىنى ورىلدى. قازاقستان بويىنشا ورتاشا ءتۇسىم تازاداي سالماقتا العاندا گەكتارىنا 9,4 تسەنتنەردى قۇرايدى.
اۋىلشارۋاشىلىق تاۋارلارىن وندىرۋشىلەردى جانار-جاعارمايمەن قامتاماسىز ەتۋ ءۇشىن ەگىن وراعى جۇمىستارىنا 408 مىڭ توننا ديزەل وتىنى دايىندالدى, سونىمەن بىرگە وپەراتورلاردىڭ قىزمەتىن قوسا العاندا ديزەل وتىنىنىڭ تۇپكى باعاسى 1 ليتر ءۇشىن 62 تەڭگە ءمولشەرىندە بەلگىلەندى. استىق قابىلداۋ كاسىپورىندارىن دايىنداۋ جۇمىستارى جان-جاقتى جۇرگىزىلۋدە. وسى كاسىپورىندارداعى ارتىق استىق پروبلەمالارىن شەشۋ ماقساتىندا, سونداي-اق ازىق-ت ۇلىك قاۋىپسىزدىگى ستراتەگياسى شەڭبەرىندە سولتۇستىك جانە شىعىس وڭىرلەرىندەگى استىعى كوپ قويمالارداعى 400 مىڭ توننا استىقتى وزگە وبلىستاردىڭ ەلەۆاتورلارىنا اۋىستىرۋ جونىندە شەشىم قابىلداندى. ەگىن ورۋ تەحنيكالارىنىڭ 90 پايىزعا جۋىعى دايىندىق جاعدايىندا تۇر. رەسپۋبليكالىق بيۋدجەتتەن بولىنگەن 80 ملرد. تەڭگە نەسيە ەسەبىنەن “قازاگرو” ەنشىلەس ۇيىمى ارقىلى اۋىلشارۋاشىلىق تاۋارلارىن وندىرۋشىلەر 42,5 ملرد. تەڭگەگە قارجىلاندىرىلدى. كوكتەمگى دالا جانە ەگىن ورۋ جۇمىستارىن مەملەكەتتىك قارجىلاندىرۋدىڭ جالپى سوماسى 96 ملرد. تەڭگەدەن استامدى قۇرايتىن بولادى.
كەڭەس بارىسىندا پرەزيدەنت ەگىن وراعى ناۋقانىنىڭ پروبلەمالى ماسەلەلەرىنە ايرىقشا نازار اۋداردى. شىلدە ايىنىڭ سوڭىنا قاراستى بۇتىندەي العاندا ەلىمىز بويىنشا 13,9 ملن. گەكتار نەمەسە ءداندى داقىلداردىڭ 83,1 پايىزى جاقسى جانە قاناعاتتانارلىق جاعدايدا بولدى. قۇرعاقشىلىقتىڭ جانە كۇننىڭ تىم ىسىپ كەتۋى سالدارىنان ءداندى داقىلداردىڭ ءبىر ءبولىگى زارداپ شەكتى, ونداي جاعداي نەگىزىنەن باتىس قازاقستان جانە اقتوبە وبلىستارىندا ورىن الدى. وسى ورايدا مەملەكەت باسشىسى ىلعال ساقتاۋشى تەحنولوگيالاردى قولدانىپ, سەبۋگە ساپالى تۇقىمدى پايدالانعان, اگروتەحنيكالىق شارالاردى ۋاقىتىندا جۇرگىزگەن, ءداندى دەر كەزىندە ءسىڭىرىپ, ءونىمدى ۋاقىتىلى جيناي بىلگەن شارۋاشىلىقتاردىڭ جاعدايلارىنىڭ جاقسى بولعانىن اتاپ كورسەتتى.
– ەگىن وراعى بارلىق جەرلەردە دە ەرتە باستالادى. ويتكەنى ەگىن جەدەل پىسۋدە. سوندىقتان ەرتەرەك دايىندالۋ قاجەت. تەحنيكامەن جانە جانار-جاعارمايمەن قامتاماسىز ەتۋ كەرەك. بۇل بارلىق وبلىستارعا دا قاتىستى. بۇل بارلىق اكىمدەر مەن بۇكىل اۋىلشارۋاشىلىق تاۋارلارىن وڭدىرۋشىلەردىڭ مىندەتى بولۋعا ءتيىس. مەملەكەت ءبىرىنشى كەزەكتە وزدىگىنەن جۇمىس ىستەپ جاتقاندارعا كومەكتەسەتىن بولادى, – دەپ اتاپ كورسەتتى مەملەكەت باسشىسى.
اعىمداعى قيىنشىلىقتارعا قاراماستان, 2010-2011 ماركەتينگتىك جىلى ەكسپورتتىق الەۋەت 8 ملن. توننانى قۇرايتىن بولادى. قالىپتاسقان جاعداي قازاقستاندىق ۇن تارتۋشىلاردىڭ شەتەلدىك رىنوكتاردى جاۋلاپ الۋى ءۇشىن تاماشا مۇمكىندىك بولا الادى. وسىعان بايلانىستى پرەزيدەنت ۇكىمەتكە استىق جانە ودان وڭدەلگەن ونىمدەر ەكسپورتىنىڭ جالپى كولەمىندەگى ۇن ەكسپورتىنىڭ ۇلەسىن ۇلعايتۋ ءجونىنەن شارالار قابىلداۋ تۋرالى تاپسىرما بەردى.
كەڭەس قورىتىندىسىندا پرەزيدەنت نۇرسۇلتان نازارباەۆ ۇكىمەتكە نان مەن ۇننىڭ ىشكى باعالارىنىڭ تۇراقتىلىعىن قامتاماسىز ەتىپ, رىنوكتاعى باعانىڭ قاۋىرت ءوسىپ كەتۋىنە جول بەرمەۋدى تاپسىردى. ونىڭ سىرتىندا مەملەكەت باسشىسى قۇرعاقشىلىقتان نەعۇرلىم كوپ زارداپ شەككەن وڭىرلەردەگى اۋىلشارۋاشىلىق تاۋارلارىن ءوندىرۋشىلەردىڭ قارجىلىق جاعدايلارىنا تالداۋ جاساپ, ولارعا قولداۋ كورسەتۋ ءجونىنەن شارالار قابىلداۋ, مال شارۋاشىلىقتارىن جەمدىك استىقپەن جابدىقتاۋ, سول سياقتى جەم-ءشوپ دايىنداۋ جۇمىستارى ءۇشىن جانار-جاعارمايدىڭ جەتكىزىلۋىنە باقىلاۋ جاساپ, كەلەسى جىلعى تۇقىم سەبۋ ماۋسىمىن تۇقىم قورىمەن قامتاماسىز ەتۋ جونىندە تاپسىرما بەردى.
سۋرەتتى تۇسىرگەندەر س.بوندارەنكو, ب.وتارباەۆ.