ۇلەسكەرلەرگە قاتىستى تۇرعىن ءۇي ماسەلەسى بۇگىنگى تاڭدا ەلىمىزدەگى كۇرمەۋى قيىن پروبلەمالاردىڭ ءبىرى بولىپ وتىرعانى بەلگىلى. مۇنىڭ سالماعى, اسىرەسە, استانا مەن الماتى قالالارىنداعى تۇرعىن ءۇي قۇرىلىسى نىساندارىندا باسىم بولىپ وتىرعاندىعى جاسىرىن ەمەس. الايدا ۇكىمەتتىڭ ۇلەسكەرلەر مۇددەسىن قورعاۋ ساياساتىنىڭ ارقاسىندا بۇل ماسەلەلەر دە بارىنشا شەشىلۋگە قادام باسىپ كەلەدى. كەشە ەلوردادا قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ دەپارتامەنت ديرەكتورى كەنجەبولات مىڭباەۆتىڭ باق وكىلدەرىمەن وتكىزگەن بريفينگتە ۇلەسكەرلەر ماسەلەسىن شەشۋ جونىندە اڭگىمە ءوربىدى.
– 2007 جىلدىڭ سوڭىندا ەلىمىزدە 62 مىڭنان استام ۇلەسكەر بولسا, قازىرگى كۇنى ۇكىمەتتىڭ كومەگى ارقاسىندا ولاردىڭ 45 مىڭنان استامىنىڭ ماسەلەلەرى تولىعىمەن شەشىلگەن. جالپى, سانى ۇلەسكەرلەرگە قاتىستى 450 قۇرىلىس نىسانى بولسا, بۇگىندە سونىڭ 97-ءسىنىڭ ماسەلەسىن شەشۋ قالىپ وتىر. سونىڭ ىشىندە استانادا 42 نىسان (8774 ۇلەسكەر), الماتىدا 27 نىسان (7704 ۇلەسكەر) بولسا, ەلىمىزدىڭ وزگە ايماقتارىندا شەشىمىن تابۋى ءتيىس 28 نىسان (5534 ۇلەسكەر) بار. بيۋدجەتتەن بولىنگەن 215,782 ملرد. تەڭگەنىڭ 75 پايىزى يگەرىلسە, بۇل ۇلەسكەرلەر ماسەلەلەرىن شەشۋدەگى جۇمىستاردىڭ جەمىستى ناتيجەسى دەپ ايتۋعا بولادى. ال قالعان قارجى وسى ماقساتتا ۇلەسكەرلەر يگىلىگى ءۇشىن ءارى قاراي جۇمسالا بەرمەك, – دەدى دەپارتامەنت ديرەكتورى.
ءابدىراحمان قىدىربەك.