ەۋروپاداعى قاۋىپسىزدىك جانە ىنتىماقتاستىق ۇيىمىنىڭ 1975 جىلدىڭ 1 تامىزىندا قول قويىلعان حەلسينكي قورىتىندى اكتىسىنىڭ 35 جىلدىق مەرەيتويىنىڭ قارساڭىندا ەقىۇ-نىڭ ءىس باسىنداعى توراعاسى, قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ بىلاي دەپ مالىمدەدى:
“حەلسينكي قورىتىندى اكتىسى 35 جىل ىشىندە ءوزىنىڭ وزەكتىلىگىنەن ايىرىلعان جوق. 35 مەملەكەتتىڭ باسشىلارى حەلسينكي قالاسىندا باس قوسىپ, ماقۇلداعان بۇل جاڭاشىل جانە جان-جاقتى قاۋىپسىزدىك تۇجىرىمداماسى ءبۇگىنگى كۇنى دە ەقىۇ جاۋاپكەرشىلىگىنىڭ ايماعىندا قاۋىپسىزدىك پەن ىنتىماقتاستىقتىڭ ماڭىزدى فاكتورى بولىپ تابىلادى. 35 جىل بۇرىن بەكىتىلگەن قاۋىپسىزدىكتىڭ اسكەري-ساياسي, ەكونوميكالىق-ەكولوگيالىق جانە گۋمانيتارلىق دەگەن ءۇش ولشەمى وسى كۇنگە دەيىن ۇيىم قىزمەتىنىڭ نەگىزى بولىپ قالۋدا”.
“سونىمەن قاتار الەمدە سوڭعى جىلدارى بولىپ جاتقان كۇردەلى وزگەرىستەر ەقىۇ-عا مۇشە مەملەكەتتەردەن, اسىرەسە, ولاردىڭ باسشىلارىنان, ۆانكۋۆەر مەن ۆلاديۆوستوك اراسىنداعى ۇيىم جاۋاپكەرشىلىگىندەگى ايماقتا تۋىندايتىن جاڭا قاۋىپ-قاتەرلەرگە لايىقتى شارا قولدانۋدى تالاپ ەتەدى. سوندىقتان, ەقىۇ-عا توراعالىق ەتىپ وتىرعان مەملەكەتتىڭ باسشىسى قازاقستان پرەزيدەنتى نۇرسۇلتان نازارباەۆتىڭ بيىل استانادا ەقىۇ ءسامميتىن شاقىرۋ تۋرالى باستاماسى قانشالىقتى دەر كەزىندە ايتىلعانىنا لايىقتى باعا بەرۋدىڭ ءوزى وڭاي ەمەس. ءبىزدىڭ بۇگىنگى ماقساتىمىز – “ۆانكۋۆەر مەن ۆلاديۆوستوك اراسىنداعى قاۋىپسىزدىك كەڭىستىگى تۇجىرىمداماسىن تاريحتا قالدىرىپ, جاڭادان ەۋرازيالىق جانە ەۋراتلانتيكالىق قاۋىپسىزدىك قاۋىمداستىعىن قۇرۋ ىسىنە كوشۋ. جاڭا گەوساياسي جاعدايدا حەلسينكي قورىتىندى اكتىسى تۇجىرىمداماسىنان ورىندى تۇردە “استانا رۋحى” سەكىلدى جاڭا ۇعىم پايدا بولىپ, وسىنداي كەزدەسۋلەردىڭ اسا ماڭىزدى قورىتىندىسىنا اينالاتىنىنا ءبىز كامىل سەنەمىز. بۇل ءبىزدىڭ ۇيىمنىڭ مەرەيتويىن لايىقتى اتاپ وتۋگە جانە ونى ءXXى عاسىردا جاڭا جەتىستىكتەرگە جەتەلەۋگە جول اشۋى ءتيىس”.
اتالعان سامميت بۇگىنگى ەقىۇ-نى قۇرايتىن 56 مەملەكەت باسشىلارىنىڭ باسىن قوسىپ, وسى جىلدىڭ اياعىنا دەيىن قازاقستان ەلورداسى استانا قالاسىندا وتكىزىلەدى دەپ كوزدەلگەن.
سىرتقى ىستەر مينيسترلىگىنىڭ ءباسپاسوز قىزمەتى.