قاي زاماندا بولسىن ادامزاتتى بولاشاقتىڭ قالاي بولاتىندىعى قىزىقتىرعان. كەيبىر ادامدار ءتىپتى وسى شارۋانىڭ سوڭىنا ءتۇسىپ, بۇكىل ومىرلەرىن سونى زەرتتەۋمەن وتكىزگەن. بىراق بۇل ماسەلەنىڭ سوڭىنا جەتۋ مۇمكىن ەمەس ەدى! بۇل تۋرالى قاسيەتتى قۇراندا بىلاي جازىلعان: «كوكتەردەگى جانە جەردەگى سىر اللاعا ءتان» (16-ناحىل سۇرەسى, 77-ايات) جانە دە «كومەستىڭ كىلتتەرى ونىڭ (اللانىڭ) جانىندا. ونى ول, ءوزى عانا بىلەدى» (6-انعاپ سۇرەسى, 59-ايات). ال ادامدار اراسىندا بولاشاقتى بولجاي ءبىلۋ تەك اللا تاعالا ەلشىلەرى پايعامبارلار قۇزىرىندا عانا بولعان, ونى قۇراننىڭ مىنا جولدارىنان كورەمىز: «كومەستى ءبىلۋشى اللا, ونىڭ سىرىن ەشكىمگە اشپايدى. بىراق ۇناتقان ەلشىسىنە بىلدىرەدى. ويتكەنى, اللا ەلشىسىنىڭ الدى ارتىنا كۇزەتشى قويادى» (72-جىن سۇرەسى, 26, 27-اياتتار).
دەگەنمەن دە, ادامدار اراسىندا بولاشاقتى بولجاۋعا ۇمتىلىس جاساپ, سول ارقىلى ءوز اتتارىن تاريح بەتىنە جازىپ كەتكىسى كەلگەندەر بولعان. سولاردىڭ ءبىرى XVI عاسىردا ءومىر سۇرگەن نوسترادامۋس دەگەن دارىگەر. ول 1503 جىلى فرانتسيانىڭ وڭتۇستىگىندەگى سەن-رەمي قالاسىندا ەۆرەي وتباسىندا تۋعان, شىن اتى-ءجونى ميشەل دە نوتر دام. 1525 جىلى مونپەلە ۋنيۆەرسيتەتىنىڭ مەديتسينا فاكۋلتەتىن ءبىتىرىپ, ەڭبەك جولىن باستايدى. بۇل كەزدە فرانتسيانىڭ وڭتۇستىگىن وبا دەرتى قاتتى شارپىعان ەدى. نوسترادامۋس ءوزىن دارىگەر رەتىندە وتە تاماشا كورسەتە ءبىلىپ, كوپتەگەن ادامداردى ەمدەپ جازادى. 1529 جىلى مەديتسينا دوكتورى اتاعىن الادى. العاشقى ايەلىنەن ءبىر ۇل مەن ءبىر قىزى بولعانمەن, وبادان ولاردى نوسترادامۋس امان الىپ قالا المايدى. ءبىراز جىل شەت ەلدە ءجۇرىپ, 1544 جىلى فرانتسياعا قايتا ورالادى. ەكىنشى رەت ۇيلەنەدى. وباعا قارسى كۇرەسىن ول ودان ارى جالعاستىرادى. سونىمەن قاتار كورىپكەلدىك قاسيەتىن كورسەتە باستايدى. ونىڭ اتاق-داڭقى پاتشا قۇلاعىنا دا شالىنادى. ول پاتشا جانىنا شاقىرتىلىپ, سول جەردە كوپتەگەن تاريحي بولجاۋلار ايتىپتى-مىس جانە ونىڭ ايتقاندارى ورىندالعان ەكەن دەگەن اڭگىمەلەردىڭ شەت جاعاسىن قازىر كوبىمىز بىلەمىز. الايدا, ونىڭ كورىپكەل ەمەس, جاي عانا كوز بوياۋشى بولعانىن ەكىنىڭ ءبىرى بىلە بەرمەيتىندەي.
نوسترادامۋس شىنىمەن كورىپكەل بولعان با؟ ونىڭ بولاشاقتى بولجاۋشى ەمەستىگىنە كوز جەتكىزۋ ءۇشىن مىنا جاعدايلاردى بىلسەك تە جەتكىلىكتى.
سونىمەن, بىرىنشىدەن, ول جوعارىدا ايتقانىمىزداي بولاشاقتى بولجاي بىلەتىن قۇدايدىڭ ەلشىسى پايعامبار ەمەس, جاي عانا قاراپايىم ادام بولعان.
ەكىنشىدەن, قاراپايىم دا سەنگىش قارا حالىقتى ول كەزدە الداۋ تىپتەن وڭاي ەدى. قازىرگى زاماندا, ءبارىمىزدىڭ كوزىمىز اشىق دەگەننىڭ وزىندە بالگەر-الاياقتاردىڭ الداۋىنا سەنەمىز. وعان قاراپايىم ءبىر مىسال, جاقىندا تانىمال بلوگەر ەلۆيرا ەرعالينا ەلورداداعى بازاردا بالگەرگە جولىعىپ, ونىڭ قالايشا وتىرىكتى ساپىراتىنىن دالەلدەپ بەرگەن ۆيدەوماتەريالىن جاريالادى.
ۇشىنشىدەن, نوسترادامۋستى زەرتتەگەن عالىمدار ە.رۋسسەل, پ.ۋيتمور مەن ە.بەرزيندەردىڭ ايتۋى بويىنشا, ول بولجاعان 946 وقيعانىڭ تەك 70-ءى عانا ورىندالعان. بۇل دەگەنىڭىز 7 پايىز عانا دەگەن ءسوز! ونىڭ ايتقان بولجامى ورىندالسا, ونىڭ اتاق-داڭقىن اسىرا سىلتەپ ماداقتاعان دا, ال ورىندالماسا ول جاعداي ۇمىتىلىپ كەتىپ وتىرعان. ياعني, كەز كەلگەن ادام بالاسى قولىنا قالام الىپ, بىرنەشە مىڭداعان بولاشاققا بولجاۋلار جاساسا, ونىڭ كەيبىرەۋى ارينە وتە از مولشەردە بولسا دا ورىندالىپ ىسكە اسۋى ابدەن ىقتيمال. سول ءۇشىن دە ول پاقىرىمىزدى كورىپكەل بىلگىش ەكەن دەپ قابىلداۋعا بولمايدى عوي. بۇل دا وتە-موتە ەسكەرىلەتىن جاعداي.
تورتىنشىدەن, ول بولجاعان كەزەڭ 3 797 جىلعا دەيىنگى ارالىقتى قامتيدى دەپ ايتىلادى دا, ال XXI عاسىردان باستالعان بولجاۋلار تۋرالى دەرەكتەر جوعالىپ كەتكەن. ال ەندى نەگە جوعالعاندىعىن ءوزىڭىز تۇسىنە بەرىڭىز.
بەسىنشىدەن, نوسترادامۋستىڭ بولجاۋلارى جۇمباقتاپ (كەيبىرەۋلەردىڭ ايتۋى بويىنشا لاتىن تىلىندە) جازىلعاندىقتان, ولاردىڭ ماعىناسىن اشۋ كەزىندە بولجامداردى كەز-كەلگەن باعىتقا بۇرمالاپ كورسەتۋگە بولاتىندىعىن ەسكەرۋ كەرەك..
التىنشىدان, زامانداسى چارلز ۋاردتىڭ جازۋىنشا نوسترادامۋس پوۋزەن قالاسىنداعى ءورتتى بولجاپ ايتىپ, قالانى ءوز قولىمەن ورتەگەن. بۇل ادامگەرشىلىك تۇرعىسىنان الىپ قاراعاندا وتە قىنجىلارلىق جاعداي جانە ونى ءتىپتى قىلمىسقا تەڭەۋگە دە بولادى.
جەتىنشىدەن, نوسترادامۋس ماماندىعى دارىگەر بولعاندىقتان, ماڭايىنداعى ءبىراز ادامداردىڭ قاشان ولەتىنىن دارىگەرلىك تاجىريبەسىنە سۇيەنە وتىرىپ-اق, مولشەرمەن بولجاي بىلگەن. بۇل ماسەلە سول زامانداعى فرانتسيا پاتشاسى گەنريح II-ءنىڭ وتباسىنا دا قاتىستى. ول پاتشانىڭ وتباسى مەن تۋىستارىن ەمدەپ, جازىپ وتىرعان, ءارى ولارعا دا تيىسىنشە بولجامدارىن ايتقان.
سەگىزىنشىدەن, ونىڭ بولجاۋلارىنىڭ استرولوگياعا نەگىزدەلۋى. ال استرولوگيا زاڭدارىنا سەنسەك, بەلگىلى ءبىر مەزەتتە بىرنەشە ميلليونداعان ادامداردىڭ ءومىرى بىردەي بولاتىنىنا قالاي سەنە الاسىز. مىسال كەلتىرسەك, جۇلدىز-جورامال بويىنشا مەن شايان بولىپ ەسەپتەلەمىن. سوندا دۇنيە جۇزىندەگى ميلليونداعان شايانداردىڭ ءبىر كۇندىك نەمەسە ءبىر اپتالىق تاعدىرى بىردەي بولعانى ما؟ اقىلعا سيعىسىز دەۋگە بولادى.
اتالعان جايلاردى زەردەلەپ قاراپ, وي تارازىسىنا سالساڭىز اڭگىمە ەتىپ وتىرعان «كورىپكەلىمىزدىڭ» كىم ەكەنىن ءوزىڭىز-اق انىقتاپ الارسىز.
اتاقتى دەگەن نوسترادامۋستىڭ ءوزىنىڭ جاعدايى وسىنداي بولعاننان كەيىن ءبارىمىز كۇندەلىكتى كورىپ جۇرگەن باقسى-بالگەر, كورىپكەلدەردىڭ الداپ-ارباۋىنا قالاي سەنەرسىز. وكىنىشكە قاراي, اڭقاۋ حالىقتىڭ سەنىمىنە كىرۋشىلەر وڭاي اقشا تاۋىپ, بالگەرلىكتى وزىنشە ءبىر ۇلكەن كاسىپكە اينالدىرعان.
سول ءۇشىن دە اعايىن, ءبىر اللاعا دەگەن سەنىمدى كۇشتى ۇستاپ, ءوز-وزىمىزگە بەرىك بولايىق! بولاشاعىمىزدىڭ جارقىن دا باياندى بولاتىنىنا «كورىپكەلدەرسىز-اق» سەنەيىك.
سەرىكقازى كاكىبالانوۆ.
دەرەك: Islam.ru.
سۋرەت: news.nur.kz.