استانا. 11 ناۋرىز. وزبەكستان استاناسى – تاشكەنت قالاسىندا 13-15 ناۋرىز ارالىعىندا قازىرگى زامانعى جاپون فيلمدەرىنىڭ كۇندەرى وتەدى. ۇستىمىزدەگى جىلعى شارا بۇل ەلدە وسىمەن 10-شى مارتە وتكىزىلگەلى وتىر. بۇل تۋرالى anhor.uz سايتى حابارلادى.
باعدارلامادا بەس كوركەم جانە ءبىر انيماتسيالىق فيلم بار. ولار وتباسىلىق باقىت, ۋاقىتقا فانتاستيكالىق ساياحات جاساۋ, ادام مەن ءيتتىڭ اراسىنداعى شىنايى دا تەرەڭ دوستىق سەزىمى, كەزدەيسوق ماحابباتتىڭ ماشاقاتتارى تۋرالى, سونداي-اق حوككايدو ارالىنداعى تابيعاتتىڭ كەرەمەت سۇلۋلىعى جايلى سىر شەرتەدى.
قازىرگى زامانعى جاپون فيلمدەرىنىڭ تاشكەنتتەگى كۇندەرىن جاپونيانىڭ وزبەكستانداعى ەلشىلىگى «وزبەككينو» اگەنتتىگىنىڭ ىقپال ەتۋىمەن ۇيىمداستىرىپ وتىر.
سالتاناتتىڭ اشىلۋ ءراسىمى 13 ناۋرىز كۇنى ساعات 18:00-دە كينو ءۇيىنىڭ ۇلكەن زالىندا باستالادى. وعان جاپونيانىڭ وزبەكستانداعى توتەنشە جانە ۋاكىلەتتى ەلشىسى كاتو فۋميحيكو قاتىسادى.
ءبىرىنشى كورسەتىلىمگە رەجيسسەر سينوبۋ ياگۋتيدىڭ «ءساتتى ۇشۋ ساپارى» دەگەن كومەدياسى ۇسىنىلادى. ول اۆياتسيانىڭ ادەتتە جولاۋشىلارعا بەيمالىم بولىپ كەلەتىن جاقتارىن كورسەتۋگە ارنالعان. ءفيلمنىڭ وقيعاسى اەروپورتتان باستالىپ, ۇشاقتىڭ بورتىندا جالعاسادى.
مۇرات ايتقوجا.