استانا. 11 ناۋرىز. «مانچەستەر يۋنايتەدتىڭ» شابۋىلشىسى رادامەل فالكاو مەن قاقپاشى ۆيكتور ۆالدەس كوماندانىڭ U-21 قۇرامى ءۇشىن الاڭعا شىقپاق. بۇل تۋرالى egemen.kz حابارلادى.
«ميۋ»-دىڭ باس جاتتىقتىرۋشىسى لۋي ۆان گال وسىنداي شەشىم قابىلداپ وتىر. سوعان وراي, فۋتبولشىلار بۇگىن «توتتەنحەممەن» بولاتىن ويىنعا قاتىسۋ ءۇشىن جاتتىعۋ جاساۋدا. ۆان گال فالكاونى نەگىزگى قۇرامدا الاڭعا شىعارماق. اتالعان ەكى فۋتبولشىدان بولەك, 21 جاسقا دەيىنگى ويىنشىلاردىڭ قاتارىندا اندرەاس پەرەيرا مەن دجەيمس ۋيلسون دا بار. «ميۋ»-دىڭ باس كومانداسىنان ورىن تابا الماي جۇرگەندەردى ۆان گال مىرزا وسىلاي سىناپ كورمەك. فالكاو وسى ماۋسىمنىڭ باسىندا فرانتسيانىڭ «موناكوسىنان» اۋىسىپ كەلسە, ۆالدەستىڭ «قىزىل سويقانداردىڭ» ساپىنا قوسىلعانىنا كوپ بولعان جوق. يسپانيالىق قاقپاشى وتكەن قىسقى ترانسفەرلىك ماۋسىمدا كەلگەن ەدى. ازىرگە «مانچەستەر يۋنايتەد» ءۇشىن ەشقانداي ويىن وتكىزبەدى. ال فالكاو بۇگىنگە دەيىن 20 ويىن وتكىزىپ, 4 گولدىڭ اۆتورى اتاندى. ايتسە دە, سوڭعى ەكى ويىندا ۆان گال فالكاونى الاڭعا شىعارمادى.
ەلامان قوڭىر.
دەرەك: egemen.kz.
سۋرەت: vk.com.